توێژە جیاوازەكان قسە لەسەر فیستیڤاڵی خێڵ و عەشیرەتەكان دەكەن

توێژە جیاوازەكان قسە لەسەر فیستیڤاڵی خێڵ و عەشیرەتەكان دەكەن

ناسك واحید: فیستیڤاڵی عەشیرەت ژن و گەنج تێیدا قوربانین و دووبارە دەبنەوە كۆیلەیەكی گۆێ رایەڵی یاساكانی عەشیرەت

هاووڵاتییەك" سازدانی ئەو جۆرە فیستیڤاڵانە شتێكی ئاساییە

رەسول قادیانی: لە جیاتی فیستیڤاڵ دەبێت كار لەسەر یەكترقبوڵكردن و بەرزكردنەوەی ئاستی زانستی بكرێت


راپۆرت محەمەد ئامۆكەیی- زاری كرمانجی: بۆ چەند ساڵێك دەچێت لە باشووری كوردستان فیستیڤاڵی شار و ناوچەو گوند و عەشیرەتەكان بوونی هەیە، لە وەرزی بەهار هەر رۆژەو ناوچەو عەشیرەتێك هەڵدەستێت بە سازدانی فیستیڤاڵی ساڵانەی خۆی، هاووڵاتیانی كوردستان، لەسەر سازدانی فیستیڤاڵەكان بەسەر چەند بەرەیەك دابەشبوون و بەشێكیان پێیان وایە سازدانی فیستیڤاڵ شتێكی ئاساییەو بۆ نزیكردنەوەی خزم و كەسە لەیەكتری كە بەهۆی سەرقالییەوە ساڵێنك نەیان توانییەوە لە نزیكەوە یەكیتری ببینن، بەشەكەی تریش پێیان وایە بوونی ئەو جۆرە فیستیڤاڵانەی بەنێوی عەشیرەت گەڕانەوەیە بۆ سەردەمی كۆن و دووبارە سەرهەڵدانەوەی كۆیلایەتی و خۆ سەپاندنی كوێخایەكانەو ئەیانەوێت عەرزی عەزەڵاتیان نیشان دەن، زاری كرمانجی بۆچوونی هاووڵاتی و رۆژنامەوان و چالاكی مەدەنی وەرگرتووە و هەریەكەو بە شێوەی جیا قسەی خۆیان هەیە.
فیستیڤاڵی عەشیرەت ژن و گەنج تێدا قوربانین و دووبارە دەبنەوە كۆیلەیەكی گوێڕایەڵی یاساكانی عەشیرەت) ئەمە دەستپێكی پەیڤەكانی رۆژنامەوان و چالاكی مەدەنی، ناسك واحیدە، بۆ زاری كرمانجی دەڵێت" ئەگەر فیستیڤاڵی عەشیرەتەكان، تەنها وەك كۆبونەوەیەكی خزمانە بێت شتێكی ئاساییە، بەڵام گەر بۆ عەرزی ژمارەی عەشیرەت و گەڕانەوەی دەستەڵاتی ئاغایەتی ناو عەشیرەت و كەڵەگایی و گەورەكردنی شەخسێك بێت لە بنەماڵەیەكدا، پێویستە زۆرینەمان نەفرەتی لێ بكەین، خەڵك لیژنەی نارد بۆ مەریخ، پێم ناڵێن تا كەی ئێمە خەریكی پێكهێنانی لیژنەی سوڵح بین"
ئەو چالاكوانە ئەوەشی خستەڕوو" زۆرینەمان عەشیرەت و بنەماڵەمان هەیە، بەڵام نەزانی ئەوەیە پێیدا بنازیت و هەوڵبدەن خۆتان بن و بوونتان لە قەرەباڵەغی عەشیرەتدا وون مەكەن، جیهان زۆر لەوە گەورەترە كە تۆ وا هەستبكەی بەبوونی عەشیرەت خاوەنی شتێكی زۆر موهیمی، ئەو كەسانەی كە لاوازن و هیچ پێگەیەكیان نییە خۆیان هەڵدەواسن بە باڵای عەشیرەت و لە قەرەباڵەغیدا نەبێت هەست بە بوونی خۆیان ناكەن، جا مەحوی زۆر جوان وەسفی ئەمانە ئەكات ئەڵێت: فەزیلەی ئەسڵ و فەسڵ ئینسانی پینابێت بە خاوەن فەزڵ كە تۆ خۆت كۆسەی، بە تۆ چی مامە ریشی باو پیرانت"
ناسك راشی دەگێنێت" لێرە فیستیڤاڵی عەشیرەت، بۆ دروستكردنی خۆشەویستی نییە لە نێوان چینە جیاوازەكانی بنەماڵە، بەڵكو بۆ ئینتاجی كەڵەگایەك لە ژێر ناوی سەرۆك عەشیرەت و دروستكردنی كۆیلەیە، بۆ گرتنی وێنەیەكە لەگەڵ ئەو بەرپرسە گەندەڵانەی كە بە جادەیەكی پڕ چاڵی و چۆڵی و تاسەدا دەگەنە فیستیڤاڵ و شعوری بیركردنەوەیان لە چاككردنی ڕێگاكان بۆ دروست نابێت، چونكە ساڵی جارێك پێویستیان بە ڕێگەی هەژارەكانە ئەویش بۆ رۆژی ڕیكلامەكانی دەنگدان"
ئەم بەرپرسانە سود لە زیندوكردنەوەی عەشیرەت وەردەگرن چونكە سەرۆك عەشیرەتەكان ئیمتیاز وەردەگرن و كۆمەڵێك گەنجی ڕەش و ڕووتی ناو عەشرەتیش ئەخرێنە خزمەتی حزبەوە، لەژێر ناوی كلتوری ڕەسەن و پیرۆز راگرتندا، دووبارە كەڵەگاو كۆیلە بەرهەم دەهێنرێت، وە ژن و گەنجی بنەماڵە قوربانی یەكەمن، چونكە عەشیرەت یاسای دواكەوتوانەی خۆی هەیەو پابەندبوونی ئەو یاسایانەش لەسەر ژن و گەنجەكانی بارێكی هەڵەو قورسەو دەبنە قوربانی.
رەسول قادیانی چالاكوانی مەدەنی گووتی" وەك تاكێكی ئەم كۆمەڵگایە، لەگەڵ ئەنجام دانی فیستیڤاڵی هۆز و خێلەكاندانیم، لەبەر ئەوەی ئەم جۆرە فیستیڤاڵ و كۆبوونەوانە هیچ خزمەتێك بە پێشكەوتن و مەدەنیەت ناكەن، جگە لە زیندوكردنەوەی روحیەتێك كە تاك ناچار دەكات پابەندبێت بە كلتورێك لەسەر بنیادنراوی كۆمەلێك داب ونەریت، كە خزمەت بە مرۆڤایەتی ناكات"
ئەو چالاكوانەی ئاماژە بەوەش دەكات" بوونی فیستیڤاڵی بەنێو عەشیرەت ئاماژەیەكی مەترسی دارە بۆ گەڕانەوەی مرۆڤ بۆ سەردەمی پێش نەتەوە و حكومەت و شارستانیەت" بەداخەوە حیزب و دەستەلاتیش لە پێناو بەرژەوەندی خۆیان پالپشتی لەم جۆرە فیستیڤاڵانە دەكەن، بە بێ بیركردنەوە لە وەی كە گەڕانەوەی مرۆڤ بۆ باوەشی خێل و هۆزدا كۆمەڵگە بەرەو دواكەوتوویەكی مەترسیدار دەبردرێت و لەداهاتوو هەست بە و مەترسیە دەكرێت"
رەسوڵ قادیانی داوا لە گەنجانی رۆشنبیری باشوور دەكات و دەڵێت" ئەركی ئێوەی رۆشنبیرە خۆتان لە فیستیڤاڵی هۆزەكان بپارێزن و هەرگیز نەكەونە ژێر هەژموونی كەسانێك كە خەڵكانێك بە پیرۆزی سەیریان دەكەن، دەبێت كار لەسەر بەرزكردنەوەی هەستی نیشتیمانی و ئاستنی زانستی و پێكەوە ژیان یەكترقبوڵكردن بكەین نەك ئەو جۆرە فیستیڤاڵانە، كە پێم وایە جگە لە زیان هیچ سودێكی بۆ تاك نییە.
شێروان خورشید پیشەی خوێندكارە و دەڵێت" سازدانی فیستیڤاڵ شتێكی نۆڕماڵەو وا لە ئێمەی گەنج دەكات كلتوری باو باپیرانمان زیندوو بكەینەوە، جگە لەمەش ساڵێنك خزم و كەسی نزیكمان نەدیووە ئەو رۆژە دەبێتە دەرفەتێك بۆ دووبارە بەستنەوەی پەیمان خۆشەوەیستی و بەسەربردنی كاتێكی خۆش.

زۆرترین بینراو