"لە شەش مانگدا خاوەنكارەكان بە 20 ملیۆن دینار سزا دراون"

"لە شەش مانگدا خاوەنكارەكان بە 20 ملیۆن دینار سزا دراون"

"هەشت تۆن ماددەی خۆراكی دەستی بەسەردا گیراوە"

پشتیوان كەریم - سۆران:
سانیع ستار، سەرۆكی لیژنەی ئابووری لە لیژنە هاوبەشەكانی قایمقامیەتی قەزای سۆران، لە دیدارێكی زاری كرمانجی دا، باس لە كاركردنی لیژنەكانی ئابووری و كۆی گەڕان و پشكینەكان و شێوازی بەسەركردنەوەی پیشەوەران دەكات، هەروەها ئاماری شەش مانگی كاروچالاكییەكانی لە سنووری قایمقامییەتی قەزای سۆران دەخاتەڕوو. 
لە دەستپێكی قسەكانیدا، بەرپرسی لیژنەی ئابووری دەڵێت:" ئێمە وەك لیژنەی ئابووری سۆران هەفتانە سەرجەم شوێنی پیشەوەران بەسەر دەكەینەوە، لە هەفتەیەكدا زیاتر لە چوار رۆژ كاری بەسەركردنەوە ئەنجام دەدەین سەرجەم شوێنەكان دیاری دەكەین كە كەوتوونەتە سنووری قایمقامیەتی قەزای سۆران، لیژنە هاوبەشەكانی قایمقامیەتیش چەند بەشێك لە خۆدەگرن وەك لیژنەكانی (ئابووری، سووتەمەنی،  تەندروستی) بەڵام ئێمە وەك لیژنەی ئابووری و سەرجەم لیژنەكانی دیكە بە جیا دەردەچین هەر لیژنەیەكیش چەند ئەندامێك لەخۆ دەگرێت، وەك ئەندامانی (تەندروستی، ڤێتێرنەری، پۆلیسی شارەوانی، چاودێری خۆراك، بەرگری شارستانی) لەخۆ دەگرن هەریەكەیان لە شوێنەكان كاری خۆیان ئەنجام دەدەن".
لەبارەی پێبژاردن و داخستنی شوێنەكان ئەو بەرپرسەی لیژنەی ئابووری ئاشكرای دەكات:" سەبارەت بە پێبژاردن و داخستنی شوێنەكان ئێمە وەك لیژنەی ئابووری دەستهەڵاتمان هەیە لەیەك هەزار دینار تا پێنج ملیۆن دینار پێبژاردن بكەین، هەرەها سەبارەت بەداخستن زۆرترین شوێن بەداخستن بدەین، بۆ یەك هەفتە پێبژاردنی بۆ ناكەین، بەڵام لە هەندێك شوێن دوای داخستنی یەك دوو رۆژ پێبژاردنیشی بۆ دەكەین بەگوێرەی جۆری پابەند نەبوون پێبژاردنیان بۆ ئەنجام دەدەین".
سەبارەت بە بڵاونەكردنەوەی ناوی شوێنەكان لەكاتی داخستنی سەرۆكی لیژنەی ئابووری قایمقامیەتی قەزای سۆران، روونیكردەوە:" بڵاو نەكردنەوەی ناوی ئەو شوێنانەی كە لەلایەن لیژنەكانمان دادەخرێن ئێمە كە شوێنێكمان داخست بۆ جاری یەكەم كە ناومان هێنا بۆ رای گشتی بڵاو ناكەینەوە، چونكە دەبێتە هۆی رووخانی نازناوی شوێنەكە، بەڵام خاوەنی شوێنەكە دەتوانێت خۆی چاك بكات، بۆیە یەكەم جار ناویان ناهێنین، بەڵام بە دووبارە كردنەوەی كارەكە بەدڵنییاییەوە ناوی شوێنەكە رادەگەێنین هەروەها دەستهەڵاتی ئەوەشمان هەیە و دەتوانین بیدەن بە دادگا".
لە دواین قسەكانیدا، سانیع ستار، سەرۆكی لیژنی ئابووری قایمقامیەتی قەزای سۆران، گووتی:" لەشەش مانگی رابردوو یەك كەیسی سەرپێچیمان داوەتە دادگا، هەروەها نزیكەی هەشت تۆن مەوادی ماوە بەسەرچوومان لەناوبردووە و زیاتر لە 1400 سەردان و پشكنینمان ئەنجام داوە و 720 شوێن و خاوەن كارەكانمان ئاگاداركردوونەتەوە كە سەردانی ئۆفیسی لیژنەی ئابووری بكەن پێبژاردنمان بۆ كردوون 29 شوێنمان داخستووە، هەوەها 120 بەڵنامەش وەرگیراون، هەروەها لە كاتی پڕكردنەوەی بەڵێنامەش دووبارە پابەند نەبێت پێبژاردنی بۆ دەكەین سزاكەش قورستر دەبێت، هەروەها جێگەی دەستخۆشییە كە بەشێك لە فرۆشگاكان خۆیان ئاگادارمان دەكەنەوە لە كاتی هەبوونی موادی ماوە بەسەر چوو بە مەبەستی بردن و لەناوبردنیان، هەفتانەش چوار رۆژ سەردانی شوێنەكان دەكەین زیاتر چاودێری ماددە خۆراكییەكانی بەیانیان دەكەین، لە رابردووش زۆرترین هێلكەی ماوەی بەسەرچووی توركیا دوای خستنە بازاڕ دەستیان بەسەر داگیراوە هاووڵاتییانیش زۆریان هاوكارن پەیوەندیمان پێوەدەكەن لەبارەی چێشتخانە و خواردنگەكان بەداخەوە لە ماوەی مانگی شەش زیاتر لە 15 شوێن داخراون زۆرترینیان خۆرادنگە بوونە، داخستنی ئەو شوێنانەش تەنها بەهۆی پیسی شوینەكە نەبووە، بەڵكو بەشێكیان چاودێریان دەكەین 95% دوای دووبارە سەردانەكەمان زۆر پابەند دەبن لەماوەی شەش مانگی ئەمساڵیش  17 ملیۆن و نیو پێبژاردنمان ئەنجام داوە، پارەكەش هەمووی دەچێتەوە خەزێنەی دارایی".