دێـرینەكانی رواندز و گـەشتێك بـۆ قـەڵادزێ و دوكـان

       دێـرینەكانی رواندز و گـەشتێك بـۆ قـەڵادزێ و دوكـان

زاری كرمانجی-رواندز: تیپی تۆپی پێی یاریزانە دێرینەكانی رواندز یەكێكە لە كۆنترین ئەو تیپە تایبەتانەی یاریزانە دێرینەكانی كوردستان, ئەم تیپە لە سەرەتای نەوەدەكان دامەزراوەو تا ئێستاش بەردەوامن لە یاری كردن و گەشتكردن بۆ زۆربەی شارەكانی كوردستان و دەرەوە.
مامۆستا فارس عەوڵا راهێنەری تیپی دێرینەكانی رواندز لە لێدوانێكدا بۆ زاری كرمانجی گووتی" دوای راپەڕینی 1991 كۆمەڵێك یاریزانی دێرینی شارەكەمان هەستان بە دامەزراندنی ئەم تیپەكەو تەواوی یاریزانە كۆنەكانی لەم تیپەدا كۆكردەوەو هەندێكیان بەهۆی چوونە ناو تەمەنەوە هەر زوو لە تیپەكە كشانەوە, دواتر یاریزانی ترمان هێنایە ریزەكانمان و مەرجی سەرەكی ئەوەبوو كە نابێ یاریزانی دێرین تەمەنی لە 40 ساڵ كەمتربێ, ئێستاش چەند یاریزانمان هەین تەمەنیان گەیشتوتە سەرووی 65 ساڵ و لە یاریكردن بەردەوامن, ساڵانی رابردوو بە بوونی چەند تیپێك لە دەڤەری سۆران توانیمان بەشداری دوو خول بكەین بەڵام ووردەووردە تیپەكانی دەوروبەرمان پووكانەوەو هەڵوشانەوە, ئێستا لە رواندز تیپێكی دیكەی دێرینمان هەیە بەڵام تەمەنیان لە خوار 40 ساڵەو تیپی دێرینەكانی كاولۆكانیش یەكێكی ترە لە تیپە چالاكەكانی دیكەی دێرین".
دلشاد محەمەد سەرپەرشتیاری ئەم تیپەش زانیاری زیاتری ئاشكراكردو گووتی" ئێمە كۆمەڵێك لەو یاریزانە دێرینانەین كە توانای یاری كردنمان نەماوەو وەك دەستەی كاریگیڕی و ئیدارە لەگەڵ تیپەكە داین و ئەم تیپە هەفتانە دوو یاری ئەنجام دەدات و میوانداری تیپەكانیی دیكەی دێرین دەكات, لەهەر وەرزێك گەشتێك بۆ یەكێك لە شارەكانی كوردستات دەكەین و دوو ساڵ جارێك گەشتێك بۆ روژهەڵاتی كوردستان و شارەكانی ئێران دەكەین بۆ ئەنجامدانی چەند یارییەك, هەماهەنگیمان لەگەڵ تێكڕای وەرزشوانەكان هەیەو پشتگیری و هاوكاری یانەی وەرزشی رواندز دەكەین".
سەبارەت بە دوا گەشتی تیپەكەش گووتی" پێشتر گەشت و سەردانمان بۆ زۆربەی شارەكانی كوردستان كردووە هەر لە زاخۆ هەتا پێنجوێن و كەركووك و میوانداری چەندین تیپمان كردووە لە موسڵ و شارەكانی عێراقیش, لە وەرزی هاوینی رابردوو میوانداری تیپەكانی هەریر و رانیە و هەولێر و كەسنەزان و چەند تیپێكی دیكە كرد, هەروەها لەلایەن تیپی دێرینەكانی پێنجوێن داوەتكراین و دوای 20 رۆژ ئیمەش میوانداری ئەوانمان كردو دواتر تیپی دێرینەكانی دوكان هاتە رواندز, ئەوەبوو هەفتەی رابردوو لە شاری قەڵادزی َ داوەتنامەیەكمان پێ گەیشت و ئێمەش بە خۆشحاڵییەوە قبووڵمان كردو كردمان بە دوو گەشت بۆ قەڵادزێ و وەڵامدانەوەی برایانمان لە شاری دوكان, پێنجشەممەی رابردوو بە شاندێكی 28 كەسی گەیشتینە قەڵادزێ و دوای ئەنجامدانی یاریێكی خۆش و ئاستێكی بەرز توانیمان بە ئەنجامی 4-2 سەركەوتن بەدەست بێنین, بەڵێنمان بە خۆشەویستانی دوكان دابوو كە شەو میوانی ئەوان بین, ئەوانیش وەك پیشەی هەمیشەییان هەڵسان بە خزمەتكردنمان و دابینكردنی شوێنی حەوانەوە, هەرچەندە بەهۆی هیلاكی و ماندووبوونی یاریزانەكانمان لە ناو پاس و یاری قەڵادزێ پاشانیش پێكانی دوو یاریزانی سەرەكیمان ئێوارەی رۆژی هەینی دووەم یاریمان لەگەڵ دێرینەكانی دوكان ئەنجامدا, لەو یارییەشدا توانیمان بە ئەنجامی 2-2 لە یاریگە بێینە دەرێ, ئەم دوو ئەنجامە لە دوو یاری لەسەریەك هێزو توانای زۆری پێویستە بۆ یاریزانی دێرین و تیپەكەمان بوێرانە توانی لەم تاقیكردنەوەیە سەركەوتوو بێت".

زۆرترین بینراو