ئازار و مەینەتی جوتیارانمان

ن/ فەخرەدین سرێشمەیی

زۆربەمان ئەگەر جوتیاریش نەبین، بەڵام دۆست و ئاشنامان هەن لەو بوارە كار دەكەن و ماندوو دەبن، بە درێژایی چەند وەرزی ساڵ شەڕ لەگەڵ زەوی دەكەن بۆ بەرهەم هێنانی خواردن، ئابووری هەموو وڵاتانیش بە رێژەیەكی زۆر پشت بە كشت و كاڵ دەبەستێت، بە رەچاو كردنی ئەوەی لە وڵاتانی ئامێری پێشكەوتوو بۆ گەشەی زیاتری بەرهەم دابینكراوە، لە پاڵ ئەمەش حكومەتەكان بە گشتی رەچاوی بەهێزتر كردن بەهەمەكان و بەرز كردنەوەی جۆر و كواڵێتی بەرهەمەكان دەكەن و لە بەرامبەریشدا پلانی هەمەچەشنەیان لە بواری كشت و كال هەیە و رێگەش نادەم جوتیارەكانیان زیانمەند بن و رەنج بەخەسار بن، لەبەر ئەوەی حكومەتەكان خۆیان بە خاوەنداری راستەقینەی كەرتی كشت و كاڵ دەزانن و لە گرنگی ئەم بوارە تێدەگەن، لای خۆشمان بەجۆرێك بەروبوومەكەیان ڕەزیل بووە هەر شایەنی باسكردن نییە، ڕۆژانە هەمووان دەبینین، كە كاكی جوتیار بەخۆی یا لەرێی بەقاڵەكان بەناو كوچەو كۆڵانەكان دەسووڕێنەوە، هەریەكە و بەروبوومێك دەفرۆشن، بەڵام چ فرۆشتنێك بە سەد حال تا بەرهەمەكەیان بە نرخێكی زۆر كم ساغ دەكەنەوە.
بەرهەمی ولاتانی دراوسێ بە پێی وەرزكان لە نێو دوكانەكان بە جوانی دانراون و چەند بازرگانێك سوودی لێ دەبینن، بەبێ ئەوەی رەچاوی كواڵیتی ئەم بەرهەمە بكەن، بیرمان نەچێت ساڵی رابردوو شوتی ئێرانی دەرمانی لێ دەدرا تا سوور و شیرین بێت، بەڵام سەرچاوەیەكی مەترسیدار بوو سەرهەڵدانی شێرپەنجەی گەدە و قۆلۆن، تا حكومەتی خۆمان بەم مەترسییەی زانی هەزار تەن شوتی ئێرانی مەترسیدار دەرخواردی هاووڵاتییان درا، بۆیە پێویستە تا بەرهەمی ناوخۆیی ساغ دەكرێتەوە سنوورەكان لە بەردەم هاوردەكردنی بەرهەمی بێگانە دابخرێن. سەرپێچیكاریش، چ هاوردەكار بێت یا ئەوەی لە سنوورەكان چاوپۆشی لەو كارە دەكات سزا بدرێت.
بەڕاستی بێ مانایە یەك سندووق تەماتەی خۆماڵی بە سێ هەزار دینار بێت، تەماتەی ئێرانی و توركیش كیلۆی بە هەزار یا زیاتر بێت.
ئەگەر سەیری جوتیارەكانی هەموو ناوچەكانی كوردستان بكەین ئەوانەن لەچینی هەژارن و بەڕەنج و شانی خۆیان دەیانەوێت پارویەك نانی حەلاڵ دەرخواردی منداڵەكانیان بدەن.
سەرباری بوونی ڤایرۆسی كۆڕۆنا كە تەنگی پێ هەڵچنیون نەبوونی بازاڕێك بۆ ساغ كردنەوەی بەرهەمەكانیان هێندەی تر نائومێدی كردون، ئەگەر وابڕوات لەجیاتی ئەوەی بەرهەمی خۆمالی جێگای هی بێگانە بگرێتەوە و ببێتە جێگرەوەی نەوت، نەك هەر جێگرەوە نابێت، بەڵكو ئەو ئاو و خاكە بەپیتە دەبێتە قوربانی بەرهەمی بێگانەو هەندێك كەسی قورغكار كە دەیانەوێت بۆ دەست كەوتنی هەندێ پارە جوتیاری كورد رەنج بەخەسار بكەن، چۆن بەعس ڕاوی دەنان و ئاو و خاكی لێ داگیر دەكردن ئەوانیش بەهەمان عەقلییەت كار دەكەن.
بۆیە یەكێك لە بڕگەكانی چاكسازی ئەو كابینەیە و كاك مەسروور حەقە لەو سێكتەرە بێت بۆ ئەوەی هەر كەسە و بە بەشی خۆی دڵخۆش بكات و مافی جوتیاریش بگەڕینێتەوە.
بۆیە بێبەهاكردنی بەرهەمە خۆماڵییەكان، بەر لەوەی ڕەنج بەخەساركردنی جووتیارەكانمان و ساركردنەوەیان بێت لە بەرهەم هێنان، دووبارە گریانی بەشێكی تری هاونیشتمانییانە ئەمجارە بۆ فرۆشتنی خاك نییە بەڵكو بۆ بەرهەمی خۆماڵی و ڕەنج و شانی ساڵێكی جوتیارانی كوردە.

زۆرترین بینراو