ئاوا ڕێز لە یاریزان دەگرن ؟

كمال یوسف

 

تا ژیان بەردەوام بێ مرۆڤەكان شتی سەیرو ناوازە دەبینن، هەتا وەرزش كردن و یاری كردن بەردەوام هەواڵی سەرنج ڕاكێشتر دەبینین، هەتا بەندایەتی بەردەوام بێ بۆندی خەیالی و گواستنەوەی گەورە واژوو دەكرێت، هەتا پارە سەنگی مەحەك بێ هەڵوێستی دوور لە وەرزش دەبینین، هەتا بازرگانان ڕۆڵ و پۆستی وەرزش وەربگرن ، مافیای تازەو نوێ سەرهەڵدەدەن ، لەو ڕۆژانە گوێبیستی ئەوە بووم كابتن و گۆڵپارێزی یانەی هەولێر (سەرهەنگ موحسین ) وازهێنانی خۆی لەیاری كردن لە ڕیزی یانەی هەولێر ڕاگەیاند، گوایە لەلایەن دەستەی كارگێڕی یانە ئیهانە كراوەو قسەی نەشیاوی پێ گوتراوە، ئەو قسانە تا چەند ڕاستن و هەڵبەستراو نیە من ئەوە بە دروستی نازانم، بەڵام ئەوەی جێی داخە دەبێ هەر تاكێكی كوردو ئەهلی وەرزش و یاری تۆپی پێ ، دڵگران ببێ بەم بڕیارە، ئاخر سەرهەنگ ناوێكی دیارە لە شاری هەولێرو تەنانەت لە عێراق و ئاسیاش، ئاخر سەرهەنگ هەموو تەمەنی لە یاری تۆپی پێ سەرف كرد، چونكە لە قوتابخانە دەستی پێ كردو دوایێ هەنگاو بە هەنگاو بەرەو پێشەوە ڕۆیی،تا گەیشتە ئاستی یانەو هەڵبژاردە، ئاخر سەرهەنگ چی بۆ هەولێر نەكردوە، ئاخر سەرهەنگ لە كاتە پێویستەكان و بێ بەرامبەر پارێزگاری لەتۆڕی یانەی هەولێر كرد، ئاخر سەرهەنگ و دەیانی تی وەكو سەرهەنگ و بگرە لەویش باشتر ساڵانێك خزمەتی وەرزش و یاری تۆپی پێی ئەو یانەو ئەو شارەیان كرد، ئەوان بەسەرماو ەرما لەسەر ئەركی گیرفانی خۆیان و لە خۆشەویستیان بۆ یانەی دایك هەرچی لە توانایان داهەبوو كردیان، كەچی كاتێك تەمەنیان گەورە دەبێ یاخود یانەكە ئیشی پێیان نامینێ تەماشا دەكەین بە ناشیرترین شێوە مامەڵەیان لەكەڵ دەكرێ و لە یانە دەردەكرێن، ئاخر كەی ڕەوای حەقە ئەو هەموو یاریزانە و دوای ئەو هەموو ساڵە خزمەتە ئاوا بەڕێ بكرێ، داخەكەم بە پێچەوانەی زۆربەی زۆری وڵاتانین چونكە ئەوان نەك هەر مەڕاسیمی تایبەتی بۆ ڕێك دەخەنو هاندەران و ەستەی كارگێڕی و یاریزانان بە فرمێسك و گریانە ماڵئاوایی لێ دەكەن تەنانەت پۆستێكی كارگێڕی لەیانە پێدەبەخشن. لەگەڵ ڕێزم بۆ هەندێك یاریزان كە بە هۆی ناكۆكی و ئاژاوە دەڕۆن هیچ كەس ئامادە نیە، بەڕێی بكات. هیوادارم ڕێز لە ماندوو بوون و هەڵوێستی یاریزانەكانمان بگرین و بتوانین بەجوانترین شێوە ڕێزیان لێ بگرین.

 

زۆرترین بینراو