ئاوی خواردنەوەی چۆمان لەنێوان چاككردن و گلەیی هاووڵاتییاندا

ئاوی خواردنەوەی چۆمان لەنێوان چاككردن و گلەیی هاووڵاتییاندا

 

چواردەوری قەزای چۆمان ئاوی سازگارە و سەرچاوەی ئاوی پاكی زۆری هەیە، گەشتیاری هەموو شارەكان بەهۆی زۆری ئاو و تاڤگەی بەرز و ئاوی بەفراو ساڵانە گەشتی باڵەكایەتی دەكەن، كەچی دانیشتووانی ناوچەكە گرفتی ئاوی خواردنەوەیان هەیە، لە هەفتەی رابردوو لێژنەیەك لە ئەنجوومەنی وەزیرانەوە سەردانی ناوچەكەی كرد و دەستكراوە بە كاركردن بۆ نۆژەنكردنەوەی پڕۆژەكە.

هاوكات چەند ساڵێكە دانیشتووانی قەزای چۆمان بەدەست گرفتی ئاوی خواردنەوە دەناڵێنن و داوای چاككردنی پڕۆژەكەیان دەكەن، چونكە بە گووتەی ئەوان "ئاوەكە لێڵە و زۆرجار بە كەڵكی خواردنەوە نەهاتووە و رەنگەكەی دەگۆڕێت، ئەمەش مەترسی لەسەر تەندروستیمان هەیە".

مەجید رەسول، هاووڵاتییەكی ئەو شارەیە و ئەزموونی چاكی لەگەڵ بواری ئاو لە ناوچەكەدا هەیە، چونكە بە گووتەی خۆی پێشتر بەرپرسی فەرمانگەی ئاوی چۆمان بووە.

ئەو هاووڵاتییە دەڵێت: كێشەی ئاوی خواردنەوەی چۆمان لە سەرچاوەكەیەوە دەستپێدەكات، هەر لەسەرەتاوە دروستكردنی ئەو پڕۆژەیە كێشەی هەبوو، ئیدی بێبەرنامەیی بە ئەنجامدانی پڕۆژەكەوە دیار بوو، بۆیە ئێستا مادام بودجەیەكی باشی بۆ تەرخانكراوە، پێویستە بەشێوەیەكی بنەڕەتی پڕۆژەكە چاك بكرێت و سەرچاوەی ئاوەكە بگۆڕدرێت، بۆ ئەوەی ساڵانە تووشی گرفتی ئاو و كەمی ئاو نەبینەوە.

گووتیشی: زۆرجاریش بەدیلی ئەم پڕۆژەیەم بە لایەنی پەیوەندیدار داوە، بۆ ئەوەی ساڵانە خەڵكی چۆمان تووشی كەمئاوی و كێشەی ئاوی خواردنەوە نەبن.

عەلی ئەحمەد، هاووڵاتییەكی دیكەیە، ئەو پێی وایە ئاو سەرچاوەی ژیانە، كە ئاویش نەبێت ئیدی ژیان ئەستەم دەبێت، گوتیشی" چۆمان بە ئاوی سازگار بەناوبانگە، ئێمە لەناو جەرگەی سەرچاوەی ئاوداین، كەچی ئاوی خواردنەوەمان گرفتی هەیە، بڕوا بكەن هەندێكجار كە بۆڕییەكانی ئاوی خواردنەوەی چۆمان دەشكێت، هەفتەیەك ئاوم كڕیوە، واتا ناكرێت تۆ لەسەر خاكێك بیت چواردەورت هەموو ئاوی سازگار بێت، كەچی كێشەی ئاوی خواردنەوەت هەبێت".

ئەو هاووڵاتییە داواكاربوو ئەمساڵ كارێكی وا بكەن لە وەرزی زستان و بەهار تووشی هەمان كێشەی كەمی ئاو و شكانی بۆریەكان نەبنەوە.

مەجید رەسول، باس لەوە دەكات "پێویستە فەرمانگەی ئاوی چۆمان لەكاتی نۆژەنكردنەوەی پڕۆژەكە، یاخود لەكاتی گواستنەوەی سەرچاوەی ئاوەكە، پێویستە پرس و را بە ئەندازیاری شارەزا و كەسانی بە ئەزموون بكەن، بۆ ئەوەی بگەنە چارەسەرێكی وا دووبارە تووشی كێشە و گرفت نەبنەوە، چونكە ناكرێت هەمووجار بەشێوەیەكی هەڕەمەكی پڕۆژەكان جێبەجێ بكرێت و دوایش كە تووشی تێكچوون هات، بڵێن بەهۆی بەفرەوە بووە، كاتێك ئەندازیارێك دێت شارەزاییی نییە لە كەشوهەوای ئەو ناوچەیە، بێئاگایە لە رنی و بەفری سەرچاوەی پڕۆژە، ناكرێت تاكلایەنە ئەو پڕۆژەیە كاری تێدا بكرێت، بۆیە بەپێویستی دەزانم پرس بە كەسانی شارەزا بكەن بۆ ئەوەی ساڵانە تووشی ئەم گرفتە نەبنەوە".

لە كابینەی هەشتەمی حكوومەتی هەرێم، بە بڕیارێكی ئەنجوومەنی وەزیرانی هەرێمی كوردستان كە واژۆی نێچیرڤان بارزانی سەرۆكی ئەنجوومەنی وەزیرانی بەسەرەوەیە، بڕی یەك ملیارد و هەشتسەد و حەفتاو هەشت ملیۆن دینار بۆ چارەسەركردنی كێشەو گرفتەكانی تۆڕی ئاوی خواردنەوەی قەزای چۆمان تەرخانكراوە، هاووڵاتیانی ناوچەكە وێڕای دەستخۆشی لە بڕیارەكە، هاوكات داوادەكەن بەزووترین كات دەست بە نۆژەنكردنەوەی پڕۆژەكە بكرێت، چونكە ماوەی كاركردن لە ناوچەكە بەراورد بە ناوچەكانی دیكەی هەرێمی كوردستان كەمترە.

ئەحمەد قادر، قائیمقامی چۆمان، بە زاری كرمانجی راگەیاند: دوای گازاندەی هاووڵاتییان لەسەر گرفتی ئاوی خواردنەوەی شارەكە، داواكاری ئەو خەڵكەمان بەرزكردەوە ، خۆشبەختانە لە كابینەی هەشتەم بڕیار لەسەر چارەسەری ئەو گرفتەمان درا، بودجەی تەرخانكراو بۆ نۆژەنكردنەوەی تۆڕی ئاوی خواردنەوەی چۆمان پێكهاتووە لە یەك ملیارد و 878 ملیۆن دینار، ئەم بودجەیە بۆ نۆژەنكردنەوەی سەرچاوەی ئاوی خواردنەوە لە پڕژە، وە تۆڕی ناوخۆ و كێشە و گرفتەكانی سیستمی فلتەركردنی ئاوەكە و دروستكردنی حەوز بۆ گلدانەوەی ئاوی خواردنەوەی قەزای چۆمانە، ئێستا بودجەكەی بۆ تەرخانكراوە، بەڵام هەنگاوەكانی خرانە تەندەر و گرتنەوەی پڕۆژەكە لەلایەن بەڵێندەر ماوەیەكی دیاریكراوی پێویستە، ئەمەش لە هەموو پڕۆژەكاندا هەیە.

قائیمقامی چۆمان، گووتیشی: لەبڕی ئەو بودجەیە، ئێستا بەرنامەی نۆژەنكردنەوەی كێشەكانی تۆڕی ئاوی خواردنەوەی چۆمانمان هەیە، ئەمەش دوای هاتنی لێژنەیەك لە ئەنجوومەنی وەزیرانەوە دێت، كە بەدواداچوونیان بۆ كۆمەڵێك كێشەی ئەم سنوورە كرد و بەدەنگ پەیامەكەی سەرۆك بارزانییەوە هاتن بۆ ئەوەی خزمەتی ئەم سنوورە بكرێت، بۆیە دەتوانم بڵێم بەرنامەی ئێستا پێكهاتووە لە چاكردن و گواستنەوەی سەرچاوەی ئاو، دروستكردنی حەوزی ئاو لە سەرچاوەكە، لەگەڵ گواستنەوەی ئەو بۆڕیانەی كە پارساڵ كێشەی بۆ دروستكردین و زەویەكە رۆچوو، هەڵدەستین بە گواستنەوەی رێڕەوی بۆریەكان لەو ناوچانەی كێشەی رۆچوونیان هەیە، لە هەفتەی رابردوو لێژنەیەك لە ئەنجوومەنی وەزیرانەوە هاتوون و كۆمەڵێك ئەندازیاریان لەگەڵدایە و دەستكراوە بۆ كاركردن لەم پڕۆژەیە، بۆ ئەوەی لە ماوەیەكی زووتر بتوانین كێشەكانی ئاوی خواردنەوە چارەسەر بكەین".

 سەبارەت بەوەی بۆچی حكوومەت لەكاتی هاتنی وەرزی سەرما و لە وەرزی پاییز، پڕۆژەكان دەستپێدەكات، بۆچی پێشتر ئەو كێشانە چارەسەر ناكات؟ قائیمقامی چۆمان گووتی: ماوەی كاركردن لەو ناوچانە كەمترە، پێویستە لایەنە پەیوەندیدارەكانیش رەچاوی ئەو خاڵە بكەن، ئەو پڕۆژانەی لە ناوچە دوورە دەستەكانی وەك باڵەكایەتی دەخرێنە بواری جێبەجێكردن، زووتر دەست بە كارەكانیان بكرێت، تاكو وەرزی سەرمایان بەسەردا نەیەت".

پڕۆژەی ئاوی خواردنەوەی چۆمان بە دووری 18 كیلۆمەتر لە سەرچاوەی پڕژە هەڵدەقوڵێت، ساڵانە بەهۆی بەفر و باران گرفتی تێدەكەوێت، نۆژەنكردنەوەی پرۆژەكە، چارەسەری تەواوی ئەو كێشانە دەكات كە پڕۆژەكە هەیەتی و دوای گرتنەبەری رێكارە یاساییەكانیش پڕۆژەكە دەدرێتە لایەنی جێبەجێكار و كاری تێدا دەكرێت، بۆ ئەوەی بەشێوەیەكی بنەڕەتی كێشەی ئاوی خواردنەوە لەم قەزایە بنبڕ بكرێت.

زۆرترین بینراو