ئاوەڕۆیەكانی باتاس پڕبوونە لە زبڵ و پاشماوەكان

ئاوەڕۆیەكانی باتاس پڕبوونە لە زبڵ و پاشماوەكان

راپۆرت ئیدریس عارف- هەریر: یەكێك لەو گرفتانەی ئێستا رووبەڕووی هەرێمی كوردستان بۆتەوە پیسبونی ژینگە و فڕێدانی پاشماوەكانە لە لایەن خەڵكەوە، لە گوندی باتاسی سەر بە ناحیەی هەریر ئەو دیاردەیە بوونی هەیە و بەشێك لە هاووڵاتیان گلەیی ئەوە دەكەن چەند ماڵێك پاشماوەكانیان فڕێ دەدەنە نێو جۆگەكانی ئاودێری كە لە دەشتی هەریر چەند بەروبوومێكی كشتوكاڵی بەهۆی بوونی ئەو ئاوە لێ دەچێنرێت، زاری كرمانجی لەسەر ئەم دیاردەیە بۆچوونی هاونیشتمانیان و ژینگە پارێز و لایەنی پەیوەندیداری وەرگرتوە.
موشیر خەلیفە، دانیشتوی باتاسە گووتی" یەكێك لە دیاردە هەرە ناشرینەكان فڕێدان و پیسكردنی ژینگەییە بۆ ئەوەی خەڵكی زیاتر هۆشیار بێتەوە تەنها لە رێگەی مامۆستایانی ئاینی ئەو كارە دەكرێت، لای هەمومان ئاشكرایە مامۆستایانی ئایینی باتاسیش باسی هەموو شتێك دەكەن كە پەیوەندی ڕاستەوخۆی هەیە بەژیانی مرۆڤەوە، پێشنیاری من بۆ مامۆستایان ئەوەیە باس لە پاراستنی ژینگە بكەن، بەڵام نەك بەشێوە گشتیەكە، بەڵكو باسی ژینگەو كوچەو كۆڵانەكانی باتاس بكەن، كە خەریكە دیاردەیەكی زۆر ناشارستانی دەبینرێ بەهۆی كەمتەرخەمی و نا ڕۆشنبیری هەندێ خەڵكەوە، چونكە هیچ كۆمەڵگەیەكی ڕۆشنبیر و تێگەیشتوو بە شێوان و تێكچوون و سەرهەڵدانی دیاردەی نەخوازرا و ناشرین لە شارو شارۆچكەكەیان رازی نابن و كاردەكەن بۆ نەهێشتنی".
سامان سمایل، ژینگە پارێزێكی ناوچەكەیە، لەسەر هەمان پرس دەڵێ" چەندین ساڵە وەك ژینگە پارێزان هەموو هەوڵێكمان داوە بۆ هۆشیاركردنەوەی دانیشتوانی سنوورەكەمان لە رێگەی سمینار و خولی ژینگە پارێزی، بەڵام بەداخەوە خەڵك ئەوەی بەلای گرنگ نەبێت ژینگەیە، لەسەر فڕێدانی پاشماوەكان لە سەر شەقام و شوێنە گشتیەكانیش قسەمان لەگەڵ شارەوانی كردووە كە هەوڵی جددی بدەن چیتر خەڵك بەم جۆرە پاشماوەكان فڕێ نەدەنە نێو جۆگەكانی ئاودێری و سەر شەقام.
لای خۆشیەوە زاهیر بناوی سەرۆكی شارەوانی هەریر، بە زاری كرمانحی راگەیاند" جێگەی نیگەرانیە هاووڵاتیان وەك پێویست گرنگی بەژینگە پارێزی نادەن، ئەگەر چی هەموو رۆژێكیش كارمەندانی شارەوانی سەردانی گەڕەكەكان دەكەن بەمەبەستی كۆكردنەوەی پاشماوەكان، ئەوەی لە باتاسیش بەدی دەكرێت بەداخەوە هەندێ لە ماڵەكان پاشماوەكان دەخەنە نێو جۆگەكانی ئاودێری، ئێمە ناتوانین سزای ئەو كەسانە بدەین بەڵكو لە رێگەی مامۆستایانی ئاینی و موختارەكان خەڵكی ئاگادار بكرێنەوە كە واز لەو دیاردە ناشرینە بێنن."
سەرۆكی شارەوانی هەریر، ئاماژەی بەوەشدا" خەڵك گلەی لەوە دەكەن كە ئۆتۆمبێلەكانی شارەوانی وەك پێویست نین من لەوان دەپرسم كام رۆژ هەیە ئۆتۆمبێلی شارەوانی نە چووبێتە گەڕەكەكان، هەر كاتێكیش كەمتەرخەمی هەبووبێت ئێمە سزای كۆمپانیامان داوە.
جێگای باسە باتاس بە گەڕەكێك لە هەریر هەژمار دەكرێت و ژمارەی دانیشتوانی بە 8 هەزار كەس دادەنرێت و كەش و هەوا و خاكێكی لەباری هەیە بۆ كشتوكاڵ زۆربەی دانیشتوانی سەرقالی كار جووتیارین.

زۆرترین بینراو