ئاو‌ات حوسامەدین : دوای ساڵی 2015 زەردەشتییەكان توانیان خۆیان ئاشكرا بكەن

ئاو‌ات حوسامەدین : دوای ساڵی 2015 زەردەشتییەكان توانیان خۆیان ئاشكرا بكەن

رەمەزان هەرنی - سلێمانی: ئاوات حوسامەدین، نوێنەری ئایینی زەردەشتیان لە وەزارەتی ئەوقاف و كاروباری ئایینی لەچاوپێكەتنێكدا لەگەڵ زاری كرمانجی، باس لە ئایینی زەردەشتی دەكات و تیشك دەخاتە سەر زۆربەی خاڵە شارەواو نەزانراوەكانی.
* پیر لەئاینی زەردەشتیدا چی دەگەیەنێت؟
- پیر لە ئاینی زەردەشتیدا نییە بە سرووشتی كەسێكە كە بەتەمەن بووبێت و تەمەنێكی كردبێت و لەزۆر شتدا قسەی بڕوات و بتوانێت قسەی باش بكات و قسەی بڕوات و گوێی لێبگیرێت، بەڵام هیچ پلەیەك نییە لە زەردەشتیدا بە ناوی پیر، ئەوانەی ئێستا خۆیان كردووە بە پیر زەردەشتی نین و دورن لە پەیڕەوانی دینی زەردەشتی وەك لوقمان یا هەر كەسێكی تر كە خۆیان ناو ناوە پیر خەڵكی دڵنیا دەكەمەوە هیچ كەسێك نییە لەدینی زەردەشتی بەناوی پیر و ئەوانە تەنیا بۆ بەرژەوە‌ندی خۆیان ئەو كارە دەكەن.
* ئەوان بە فەرمی ئەو كارە دەكەن و بەم ناوە ناسراون؟
- ئەوە هیچ یەك ناگرێتەوە لەگەڵ دینی زەردەشتی، چونكە كردار و گوفتاری چاك بنەمای ئێمەیە، ئەوەش قبوڵ ناكەین، چونكە رێگە نادەین كەس دینەكە لەكەدار بكات .
* ئاینی زەردەشتی لەهەرێمی كوردستان كەی سەری هەڵداوە؟
- ئاینی زەردەشتی لەپێش زایینەوە هەبووە و زەردەشت پەیامبەری كوردە، راستە لەورمێ لەدایكبووە، بەڵام پەیامەكەی بۆ هەموو مرۆڤایەتییەو لەگەڵ ئەوساو ئێستاش دەگونجێت، پەیامەكەی بەندە لەسەر زانست (بیری چاك، گوتەی چاك، كرداری چاك) ئاینەكە هەر هەبووە لەناو كورد، بەڵام ڕژێمە دیكاتۆرییە یەك لە دواییەكەكان لایان پەسەند نەبووە بۆیە بەئاشكرا بوونی نەبووە، تا لەساڵی 1991 دەتواندرا تۆزێك بە ئازادی بووترایە من زەردەشتیم، لە 2015 بە ئازادی تواندرا زەردەشتییەكانیش ئاینی خۆیان بناسێنن، دوای ئەوەی بە یاسای ژمارە 5ی ساڵی 2015 هەر سێ‌ سەرۆكایەتی هەرێم و حكوومەت و پەرلەمان پەسەندیان كرد كە ئەم یاسایە تایبەت بوو بە ئازادی ئایینەكان لە كوردستان, ئێستا هەشت ئاینی جیاواز لە كوردستان بۆنیان هەیە، پێویستە هەموو ئایینێك نوێنەری خۆیان هەبێت لە وەزارەتی ئەوقاف و كاروباری ئاینی، بەڵام هەموو ئاینێك نوێنەریان نییە تەنیا مۆسلمان و مەسیحی و ئێزدی بەڕێوەبەری گشتی یان هەیە, بەڵام پێنچ ئایینەكەی تر وەك (زەردەشتی, كاكەیی یارسانی, جۆەكان، بەهایی و سابیئییەكان) نوێنەریان هەیە لە كوردستان و وەزارەتی ئەوقاف.
* چیت كرد بۆ نزیكبوونەوە لە زەردەشتییەكان و كۆكردنەوەی زەردەشتیانی كوردستان؟
- زەردەشتییەكان لە دوای ساڵی ‌2015 ەوە زۆر كەس دەهاتن و پەیوەندییان پێوە دەكردم، وردە وردە بەو هۆیەوە كۆبووینەوە، بیرمان لەوە كردەوە رێكخراوێك پێكبهێنین و یەكەم نەورۆزمان لەساڵی 2015دا بەئاشكرا كردەوە. لوقمان لەگەڵ كەسێك بەناوی نەژاد لە پشتەوە لێیان دام و رێكخراوەكەی بەناوی خۆی و نەژادەوە تۆمار كردو ناوی منیان دەركرد، بەهۆی ئەوەی زەردەشتی مەزهەب نییە و یەك بیرورایە ئەوەش ئەوەیە ( بیری چاك , گوتەی چاك , كرداری چاك )ە هەموومان پێكەوە كار دەكەین.
* چەند رێكخراوی تایبەت بە ئاینی زەردەشتی هەیە؟
- زۆر ڕێكخراو هەیە، بەڵام یەكەم كەس بووم بە هاوكاری ئەنداز حەوێزی نوێنەری گشتی زەردەشتیان لەسوید بڕیارمدا رێكخراوێك بكەمەوەو لەماڵەكەی خۆمدا لەگەڵ كۆمەڵێك هاوڕێ كۆبووینەوەو پەیڕەو و پڕۆگرامی خۆمان دەنووسییەوەو بەرنامەمان دادەنا تا چۆن رێكخراوەكە بكەینەوە و تەنیا ناو تۆماركردنی مابوو، لوقمان لەگەڵ كەسێك بەناوی نەژاد لەپشتەوە لێیان دام و رێكخراوەكەی بەناوی خۆی و نەژادەوە تۆماركردو ناوی منیان دەركرد، بەناوی فەرهەنگ و فەلسەفەی زەردەشتی، منیش زۆر بێتاقەت بووم و دوایی ئەوەندە بە دڵپاكی بیرم دەكردەوە، وتم قەینا لێیان گەڕێ و رێكخراوێكی ترم دانا و لەگەڵ دوو سێ كەس كە لەگەڵم مانەوە و تا ئێستاش بەردەوامین بەناوی رێكخراوی یەسنا.
* پشتێن بەستن چییە لە دینی زەردەشتی؟
- پشتێن بەستن واتە پشت بەخۆبەستن، واتە متمانە بوون، ئەو سێ گرێیەی لە پشتێنەكە دەدرێت، واتە كاری چاك، بیری چاك و گوفتاری چاك، مەرج نییە هەموو زەردەشتییەك پشتێن ببەستێت، بەڵام زۆر كەسیش هەیە دەڵێت حەز دەكەم بیبەستم مەراسیمی بۆ ساز دەكەین و پشتێنی بۆ دەبەستین و پەیمان دەدەین بە ئاهورا مەزدا كە دەبیتە خاوەنی قسەی خۆت.
* چۆن بوویتە نوێنەری زەردەشتیان؟
- لە دوای تۆمار كردنی رێكخراوەكە، پێشتریش سەردانی ئەوقافمان كردبوو، كە ئێمە دەمانەوێت دینەكەمان لە ئەوقاف تۆمار بكرێت و لەوێوە هەرسێ سەرۆكایەتییەكە پشگیریان كردین و پەیڕەوكردنی دینە جیاوازەكان قبوڵ كرا، دواتر داوای نوێنەرایەتیان لێكردین و لەوێوە ناوی زۆر كەسمان نارد بۆ ئەوقاف، بەڵام كەسیان نەیانوێرا بیكەن، چونكە لەو سەردەمەدا زۆر قورس بوو، بۆیە لەكۆتاییدا مەریوان نەقشبەندی پێشنیاری كرد خۆم بیكەم و ئەنداز حەوێزیش قبوڵی كردو زۆر پێی باش بوو، بۆیە من ئەو نوێنەرایەتییەم وەرگرت.
* ئایا لەلایەن كەسەوە دژایەتی نەكرایت كە ئەو نوێنەرایەتییەت وەرگرت؟
- من هەر پێشتر لەلایەن لوقمان و ئەو رێكخراوەوە دژایەتی دەكرام و زۆر تۆمەتی تایبەتیم بۆ دروستدەكرا، هەر جارەی كەسێكیان بۆ ئەو نوێنەرایەتییە دادەنا و دوای پەشیمان دەبوونەوە واتە خۆشیان لەناو خۆیاندا یەك نەبوون، بۆیە زۆر رێگریان بۆ دروست دەكردم و تۆمەت و نامەی زۆر تایبەتیان بۆ دروست دەكردم كە بە دوایدا دەچووم بە بەڵگەوە، ئەو كۆمەڵە بوون كە رێكخراوەكەیان لێدزیم.
* لەدوای نوێنەرایەتیتان لە ئەوقاف توانیت چی بكەیت بۆ زەردەشتییەكان؟
- توانیم زەردەشتیان وەك دینەكانی تر ناویان هەبێت و ئازاد بن، ئێمە سەر بە هۆبەی زەردەشتیانی كوردستانین لە سوید، ئەنداز حەوێزی مۆبێدە، بۆیە مەریوان نەقشبەندی و كۆمەڵێكی تر چوون بۆ ئەوەی ئاگاداری ئەوە بن زەردەشتی بوونی هەیە بتوانن هاوكارمان بن، سەردانی زۆر وڵاتانی جیهانیم كردووە بۆ بەرەوپێشبردنی، هەوڵمدا كە زەردەشتیانی جیهان هەمووی یەكبگرن و بەهەوڵەكانم زۆر وەڤدم نارد بۆ وڵاتە جیاوازەكان بۆ بەرەوپێشبردنی دینەكە وەك كالیفۆرنیا و سوێد و هندستان و ئوستورالیا، ئەنجوومەنم دروست كرد".

زۆرترین بینراو