ئاژەڵ و باڵندەكان سنووری 6 وڵات دەبڕن تا دەگەنە سۆران

ئاژەڵ و باڵندەكان سنووری 6 وڵات دەبڕن تا دەگەنە سۆران

مەهدی محەممەد – سۆران : لەئێستادا بەشێكی زۆر لە گەنجان روویان لە بەخێوكردنی باڵندە و ئاژەڵ كردووە، بەشێكیان بەهۆی بێ كاری و نەبوونی هیچ سەرچاوەیەكی ماددی، پەنایان بۆ ئەو كارە بردووە تاكو لەو رێگەیەوە داهاتێك بۆ خۆیان دەستەبەر بكەن و بەشێكی تریشیان حەز و خولیا و خۆشەویستی زۆریان هەیە بۆ بەخێوكردنی باڵندە و ئاژەڵەكان.
هەژار مولوود وسوو 12 ساڵە كاری فرۆشتن و كڕینی باڵندە و ئاژەڵە كیوییەكان دەكات و خاوەنی دوكانی جیهانی باڵندە یە لە سۆران، لە دیمانەیەكی زاری كرمانجی باس لەوە دەكات كە حەز و تامەزرۆی گەنجان بۆ بەخێوكردنی ئاژەڵ و باڵندەكان رۆژ بە رۆژ زیاتر دەبێ،
بەهۆی نەبوونی باخچەیەكی تایبەت بە ئاژەڵان لە دەڤەری سۆران، بەشی زۆری گەنجان تەنها بۆ دیداری ئاژەڵ و باڵندەكان و وێنەگرتن لەگەڵیان، سەردانی دوكانەكەی دەكەن، هەژار بە پێكەنینەوە دەڵێ‌"دوكانەكەی من قەرەبوونی نەبوونی باخچەی ئاژەڵانی لە سۆران كردۆتەوە بۆ گەنجان" ئەوەش دەڵێ‌"لەبەر ئەوەی سۆران هیچ باخچەیەكی تایبەت بە ئاژەڵانی لێ نییە، بۆیە بەشێكی زۆر لە گەنجان تەنها بۆ دیداری باڵندە و ئاژەڵە كیوییەكان و وێنەگرتن لەگەڵیان سەردانی ئێرە دەكەن، واتا لە پاڵ كاری بازرگانی خۆمان، هەوڵمانداوە بە شێوەیەك لە شێوەكانیش خزمەت بە گەنجانی ناوچەكەش بكەین و قەرەبووی نەبوونی ئەو باخچەیە بۆ گەنجان پڕ بكەینەوە"،
هەروەكو هەژار هێمای بۆ دەكات بەشی زۆری ئەو باڵندە و ئاژەڵە كیوییانەی دەهێندرێنە هەرێمی كوردستان، سنووری 6 دەوڵەت دەبڕن و دەڵێ‌"سەرچاوەی هەرە بەهێزی هاتنی باڵندەكان وڵاتی جۆرجیا یە، لەوێ‌ بە فرۆكە و كەشتی دەهیندرێن و، جاری واش راستەوخۆ لە جۆرجیاوە بۆ هەوڵیر، هەندێ جاریش لە جۆرجیا وە بۆ ئێران و لەوێشەوە بۆ سلێمانی و حاجی ئۆمەران، بەشی زۆری ئاژەڵەكانیش لە ئەفریقاو رووسیا و پاكستانەوە دەهێندرێن"، هەژار باس لەوەش دەكات كە تەواوی باڵندە و ئاژەڵە كیوییەكان بە شێوەیەكی یاسایی دەهێندرێن و هیچ كێشەیەكی یاسایی نییە،
هەژار لەسەر ئەو باڵندە و ئاژەڵە كیویانەی كە خواستی زۆرییان لەسەرەو گەنجان حەزی پێ دەكەن، دەڵێ‌"باڵندەی خۆشەویستی و كەناری و تووتی و كوكتێل زۆر خۆشەویستن لای گەنجان و خواستی زۆریان لەسەرە، لە ئاژەڵەكانیش گورگ خواستی زۆری لەسەرە لەگەڵ مەیموون"،
بەشی هەرە زۆری گەنجان عاشقی باڵندەن، بەتایبەتیش باڵندەی خۆشەویستی (گیر حب) هەژار لە بارەی باڵندەی خۆشەویستی یەوە دەڵێ‌"بۆ ئەو گەنجانەی كە تووشی نەخۆشی دەروونی و وەیان نا ئارامی و گۆشەگیری هاوتوون، پزیشك پێان دەڵێ‌ بڕۆن گیر حب بەخێو بكەن، چونكە باڵندەیەكە ئارامكەرەوەی دڵ و دەروونە، بۆیە ئێستا زۆرترین خواستی لەسەرە لەلایەن گەنجانەوە"،
جگە لەگەنجان، بەرپرس و كوڕەكانیان و كەسانی دەستڕویشتوو و باڵادەست، بەشی شێریان بەركەوتووە و لە كڕیارە هەر چەورەكانی باڵندە و ئاژەڵە گرانبەهاكانن، هەر وەكو هەژار ئاماژەی بۆ دەكات.
ئەگەرچی راوكردن لە ناوچە شاخاوییەكانی كوردستان رێگە پێدراو نییە، بەڵام بەشێك لە حیوانی كیوی و گورگ و ورچ و سموورە و سیخوڕی شاخەكانی كوردستان بازرگانیان پێوە دەكرێ، بۆ ئەم مەبەستەش هەژار دەڵێ‌"ئەو ئاژەڵانە لە ناوچەكانی برادۆست و بارزان دەهیندرێن و كڕین و فرۆشتنیان پێوە دەكرێ لە بازار"، ئەوەش دەڵێ‌"باڵادەستەكان هەر خۆیان كڕیار و هەر خۆشیان فڕۆشیارن".
لەبارەی نرخی ئاژەڵ و باڵندەكانیشەوە هەژار بۆ زاری كرمانجی دەڵێ‌"نرخی باڵندەكان لە 2 دۆلارەوە دەست پێ دەكات تاكو 50 دۆلار، ئاژەڵەكانیش لە 500 دۆلارەوە تاكو 50 هەزار دۆلار كڕین و فڕۆشتنیان پێوە دەكرێت"،
لەسەر چاودێری كردن و رەچاوكردنی پاك و خاوێنی ئاژەڵ و باڵندەكانیش، هەژار وتی"باوەڕ ناكەم هیچ باڵندە و ئاژەڵێكی كیوی هەبێ حەز بە ژیانی نێو قەفەس بكات و دوور بێ لە نیشتمانی رەسەنی خۆی، بەڵام ئیدی ئەوە كاری ئێمەیە، لەپاڵ ئەوەشە هەمیشە هەوڵمانداوە باشترین خزمەتیان بكەین تا ئەو كاتەی لای ئێمەن".

نرخی پڵنگ 50 هەزار دۆلارە
مەیموون لە 300 دۆلار تاكو 5 هەزار دۆلار
ورچی خۆماڵی نرخەكەی 1000 تاكو 20000 هەزار دۆلارە،
گورگ 150 تاكو 1000 دۆلارە

 

 

 

 

 

زۆرترین بینراو