ئاڤان نادر" سیستەمی سەرمایەداری وایكردووە ژنان لەجەستەو روخساری خۆیان بێزاربن

ئاڤان نادر" سیستەمی سەرمایەداری وایكردووە ژنان لەجەستەو روخساری خۆیان بێزاربن

محەمەد ئامۆكەیی- زاری كرمانجی: 
ئەگەر چی ماوەیەكی كەمە هاتۆتە نێو بواری راگەیاندن بەڵام ئێستا بەهۆی دەركەوتنی لە شاشە بۆتە خاوەن بینەرێكی زۆر، میدیا كار ئاڤان نادر، ناوێكی ئاشناو كەسێكی دەم بەخەندە، لەدیدارێكی تایبەتی زاری كرمانجی باس لە ئەزمونی كارەكەی دەكات، دەڵێت" ماوەیەكی كەمە هاتومەتە ناو دونیای راگەیاندن ماوەی زیاتر لە ٣ ساڵ دەبێت، بەڵام هاتنە ناو دونیای راگەیاندن جگە لە حەزێكی منداڵیم هەلێك بوو بۆم ڕەخسا، چونكە من ئەكادیمی فێر نەبوم و سەرەتای كاركردنم لە (ڕادیۆ نەوا) وە دەستم پێكردو لەوێ بوم بە پێشكەشكار و دەرهێنەر بۆ ماوەی ساڵێك، دواتر دوو ساڵ زیاترە لە كەناڵێكی تەلەفزیۆنی (ستێرك) پێشكەشكار و ئامادەكاری بەرنامەیەكی كۆمەڵایەتی مەیدانی تایبەت بە ژنانم، هەوڵم داوە هەمیشە خزمەت بە ژن بكەم و دەنگ و ڕەنگ و هێز و كار و چالاكی و تواناكانی ژنان نیشانبدەم و بیگەیەنم." 
"لە كۆمەڵگەی ئێمەدا ژنان هەر كارێك بكەن رێگری دەكرێت لێیان"
ئەو میدیا كارە دەشڵێت" لە كۆمەڵگەی ئێمەدا ژنان هەر كارێك بكەن خێزان كۆمەڵگە داب و نەریت و كلتوور و دین ڕێگر دەبێت لەبەر دەمی، بەڵام هەر ئەوەندەی هەنگاوێك بنێی دواتر كارەكان ئاسانتر ئەبن و من وەك خۆم خێزانەكەم هەمووكات پشگیریان كردوم و لەگەڵم بون.
"پێم باش نییە خزمەت بە سیستمی سەرمایەداری بكرێت"
ئاڤان نادر، لە بارەی گرنگی روخسار بۆ شاشە گووتی" پارێزگاری كردن لە ڕوخسار بۆ هەردوو ڕەگەز زۆر گرنگە، بەڵام بە ڕادەیەك نا لە سروشتی خۆی دەربچێت پێویستە هەر مرۆڤێك سەرەتا كەسایەتی راسیەقینەی خۆی بدۆزێتەوە و گرنگی پێ بدات، بەڵام بەداخەوە لە ئێستادا سیستەمی سەرمایەداری دونیای داگیركردوە، وایكردووە تاكەكانی كۆمەڵگە بەتایبەت ژنان لەجەستەو روخساری خۆیان بێزاربن و پەنا بەرنە بەر جوانكاری و شێواندنی جەستەو روخساریان، وەك خۆم پێم باشنیە خزمەت بە سیستەمی سەرمایەداری بكرێت.
"نابێت كاری ڕاگەیاندن تەنها بۆ خۆدەرخستن بێت"
ئاماژەی بەوەشكرد" هەموو كار و پیشەیەك كە مرۆڤەكان كاری تێدا ئەكەن دەبێت بەئاگاوەبێت  بەتایبەت ڕاگەیاندن، چونكە كاریگەری خۆی بەسەر كۆمەڵگەوە بەجێ دەهێڵێت و كەم تا زۆر دەبێتە كەسێكی ناسرا لەناو كۆمەڵگە و دەبێتە نمونەو پێشەنگ، بۆیە دەبێت زیاترو زۆرتر بە هۆشیاربین و ئاگاداری دەرئەنجامی كارەكانمان بین، نابێت كاری ڕاگەیاندن تەنها بۆخۆدەرخستن و پیشاندانی جوانی و ناوبانگ پەیداكردنبێت بۆخۆكردن بەژمارەبێت لەناو كۆمەڵگەدا، بەڵكو پێویستە لە ڕێگەی ئەو ئەركەی لەسەر شانمانە خزمەتی تاك و كۆمەڵگە بكەین.
"هێشتا جیاوازیی ڕەگەزیی هەیە و مافیان پارێزراو نیە"
ئاڤان نادر، پێشی وایە ڕێژەی باشداریكردنی ژنان لەناو ڕاگەیاندنی باشوری كوردستاندا بە بەراورد بە ساڵانی ڕابردوو لە زیادبوندایەو زیاتر گووتی" بەڵام بەداخەوە هێشتا ئەم ڕێژەیە لە ئاست هێز و توانا و چالاكی و تموحی  ژناندا نیە، هەروەها زۆر بەكەمی ژن وەك بەڕێوبەر یان لە دەستەی بەڕێوبەریدا دەبیندرێت، لە دەزگاكانی ڕاگەیاندندا ڕێگا نادرێت ژن بچێتە پێشەوە و بگاتە سێكتەرە بەرزەكان هێشتا جیاوازیی ڕەگەزیی هەیە و ژنان مافیان پارێزراو نیە، سەرەڕای هەموو ئەمانە ئەوەی زیاتر جێگای نیگەرانیە كەمی ئامادەبوونی زهنیەتی ژن و قبوڵكردنی ژنە وەك سروشتی خۆی، لەڕاگەیاندنەكانی باشوری كوردستان-دا كەمترین بەرنامە و بەشی تایبەت بە ژنان هەیە، هەروەها لەجیاتی تیشك خستنە سەر گرفتەكانی ژن و لە هەمان كاتدا نیشاندانی توانا و سەركەوتنەكانیان، لە زۆربەی ڕاگەیاندنەكاندا دەبیندرێت كار لەسەر بچووكردنەوە و بە تاوانبار نیشاندانی ژن و دەرخستنی جەستەیان دەكرێت، ئەمەش بەڵگەیە بۆ ئەوەی ڕاگەیاندنكاری ژن بە زهنیەتی ژنانەوە قبوڵ ناكرێن، بەڵكو بە عەقڵیەتی پیاو سالارانە بڕیار دەدات و پابەند دەكرێت، بەڵام لەگەڵ هەموو ئەو ئاستەنگی و جیاوازی و بەربەستیانە ژنان توانیویانە خۆیان پێش بخەن و شوێن دەستی خۆیان دیاریی بكەن و ڕێچكە شكێن بن.

زۆرترین بینراو