ئایا ئەزانن ئەمڕۆ رۆژی جیهانی منداڵانە

رۆژان قیاس

ئەحمەد، منداڵێكی تەمەن 12 ساڵانە و رۆژانە لە یەكێك لە ترافیك لایتەكانی شارۆچكەی سۆران كلینكس دەفرۆشێت، رۆژانە 2 تا 5 هەزار بە قسەی خۆی كاسبی دەكات، دایك و بابی ئەحمەد ئاگاداری ئەوەن كە منداڵەكەیان لەوێ كار دەكات، و رۆژانە بەرپرسەكانی حكومەتەكەمان، ئەندامانی رێكخراوە زەبەلاحەكانمان، و كامێراكانی راگەیاندنەكانمان، رێكخراوەكانی مافی مرۆڤەكان، لەو ترافیك لایتەدا تێپەڕ دەبن، ئەحمەد هەموویان دەبینێت كاتێك بە سەیارە گران بەها و جام رەشەكانیان بەلایدا تێدەپەڕن و دەرۆن بۆ ئەوەی لەسەر شاشەكانی میدیا بەهێز و پیشەییانەی كوردی، خۆیان بنوێنن و بە قسە باق و برسكەدارەكانیان، كورسیەك داگیر بكەن، خوا هەڵناگرێ باسی نەكەم، جار جار كلینكسێك لە ئەحمەد دەكڕن، بۆ ئەوەی پێش بچنە پێش كامێراكان پێڵاوەكانیان بەو كلینكسە خاوێن بكەنەوە، ئەحمەدیش ئەم ئێوارەیە كاتێك دەگەڕێتەوە ماڵەوە و سەیری تلڤزیۆن دەكات لە یەكێك لە كەناڵە بیانییەكان كۆنفراسێكی نێودەوڵەتی ساز كراوە بە بۆنەی رۆژی جیهانی منداڵان، گەورە بەرپرسەكانی ئەو وڵاتە لەوێ ئامادەن و كۆنفڕانسەكەش لە ژێر ناونیشانی (بەرەو ژینگەیەكی گونجاوتر بۆ منداڵاكانمان)، هەروەها بەشداربوەكانیش بە سەدان و هەزاران منداڵن، ئەحمەد بانگی دایكی دەكات دەڵێ، دایە دایە ئەزانی ئەمڕۆ رۆژی جیهانی منداڵانە، لەو لایەوە باوكی ئەحمەد بە توڕەییەوە كۆنتڕۆلی تلڤزیۆنەكە لە دەستی دەردێنێت و پاڵێك بە ئەحمەد دەنێت، و پێی دەڵێت دەبڕۆ هەواڵەكانی كاتژمێر 8 دەستیان پێكردووە، پێم نەوتبووی كاتێك من لێرەم كۆنتڕۆڵەكە بەدەستەوە نەگریت، تلڤزیۆنەكە دەچێتە سەر كەناڵە كوردیەكان و كاتی هەواڵەكانە، یەكێك لە بەرپرسەكانی ئەم حكومەتەی خۆمان بە قاتو ریباتێك و پێڵاوێكی بریقەدار، باسی دابینكردنی موچەی مانگی 1ی ئەم ساڵ بۆ رێكخراوەكانی مافی مرۆڤ دەكات، ئەحمەد زۆر دڵی خۆش دەبێت و دەڵێت دایە ئەو پیاوە ئەمرۆ كلنكسی لێكڕیم.
ئەمە چیڕۆكی نموونەیەكە لە سەدان و هەزاران منداڵانی ئەم كۆمەڵگەیە، بارودۆخی ئەحمەد لە زۆرینەیان باشترە، چونكە هێشتا ئەحمەد كاری بلۆك كێشانەوە و كاری قورستری نەكردووە، و هێشتا رووبەڕووی دەست درێژی و سوكایەتی پێكردن نەبۆتەوە، و هێشتا نازانێت خەم خواردن چییە، بۆیە دەستی نەداوەتە جگەرە كێشان، نموونەی زۆر خرابترمان هەیە لە ئەحمەد، دە ئیتر واز لە پێڵاو خاوێن كردنەوەتان بێنن، تێبگەن هیچ هیچ هیچتان نەكردووە بۆ منداڵەكانمان.

بابەتى پەیوەندیدار بیروڕا

بیروڕا

زۆرترین بینراو