ئیسلام و مەسیحی بە درێژایی مێژوو پێكەوە دەژین و كەمترین كێشە و گرفتیان هەبووە

ئیسلام و مەسیحی بە درێژایی مێژوو پێكەوە دەژین و كەمترین كێشە و گرفتیان هەبووە

ماوەی چەند مانگێكە دەستكراوە بە نۆژەنكردن و دروست كردنەوەی كڵێسای گەورەی مەسیحییەكانی دیانا كە دەكەوێتە(115 كم)ی باكووری رۆژهەڵاتی شاری هەولێر .
كڵێسای مارگۆرگیسی دیانا لە ساڵی 1980 لە سەنتەری شارەدێی دیانا لە لایەن حكومەتی ئەوكاتی عێراق بە هاوكاری كەسیاسیەتی ئاینی مەسیحییەكان دروست كرابوو، بەڵام بەهۆی كۆنی بینا و بچووكی شوێنەكە خراپ كرا و دووبارە دروست دەكرێتەوە .
یەتڕوون یۆنان داوود قەشەی مەسیحیەكانی دیانا و دەڤەری سۆران بە زاری كرمانجی گووت " بەهۆی بچووكی كڵێسایی ماركۆرگیس لە دیانا كە سەر بە كڵێسای رۆژهەڵاتی ئاشووریە، شوێنی بەشدار بووانی مەڕاسیمە ئاینیەكانی بچووك بوو شوێنی خەلك نەدەبوو، بۆیە دووای هەوڵێكی زۆر حكومەتی هەنگاریا رەزامەندی دەربڕی لەسەر دابین كردنی 200 هەزار دۆلاری ئەمریكی بۆ دروست كردنەوەی كڵێسایەكی پێشكەوتوو .
بە گووتەی قەشەی دیانا " كڵێسایەكە هەر لە شوێنی خۆی بە شێوازێكی مۆدێرن دروست دەكرێتەوە و هۆڵێكی گەورەی هەیە كە جێی 400 كەسی تێدا دەبێتەوە و راچاوی هەموو چاڵاكی و رێوڕەسمێكی ئاینی كراوە و ناوەوەی كڵێسایەكە زۆر بە جوانی دروست كراوە و كەل و پەل و پێداویستیەكانی زۆر رێك و پێكن و هەموو مەڕاسیمە فەرمییەكان وەك نوێژ و جەژن و كۆڕ و كۆبوونەوە و ئاهەنگی بوك گواستنەوە لەمەودووا تێدا دەكرێت .
گووتیشی " زۆربەی كارەكانی پڕۆژەی درووست كردنەوەی كڵێسەی مارگۆرگیسی دیانا تەواوبووە و لە ماوەیەكی نزیكدا پڕۆژەكە كۆتای پێدێت و كڵێساكە بە رووی خەلكی خۆمان دەكەینەوە .
مەغدید عەریف ئەحمەد بەڕێوەبەری شارەدێی دیانا بۆ زاری كرمانجی روونی دەكاتەوە، دابین كردنی بوددجەی پێویست بۆ چاككردنی كڵێسایەكی گەورەی دیانا لەسەر ئەركی ئێمە نەبووە وەك حكومەتی هەرێم، لە رێگەی مەتڕان و كەسایەتی ئاینی مەسیحییەكانی كوردستان توانراوە حكومەتی هەنگاریا رازی بكەن بە دروستكردنەوەی كڵێسایەكە ئێستە لە قۆناغی تەواو كردندایە .
شایەنی باسە، هاتنی مەسیحییەكان بۆ دیانا بە چەند قۆناغێك بووە، بەپێی زانیاریەكان، مێژووی بوونی مەسیحی لە دیانا بۆ سەردەمی هاتنی حەزرەتی مەسیح لە سەدەی یەكەم و دووەم دەگەڕێتەوە، هەروەها بەشێكیان لە كۆتای جەنگی جیهانی یەكەم هاتوونە و هەروەها قۆناغێكی تری هاتنی مەسیحییەكان بۆ دینا دەگەڕێتەوە دووای ساڵی 1914 و ساڵی 1926 لە دیانا جێگیر كراون، جیا لە دیانا لە زۆربەی شار و شارۆكەكانی كوردستانیش بوونیان هەیە.
دەڤەری سۆران سەر بە پارێزگای هەولێرە و ئیسلام و مەسیحی بە درێژایی مێژوو پێكەوە دەژین و كەمترین كێشە و گرفتیان هەبووە ، لە سنووری دیانا و هاودیان و بێدیال لە مەسیحییەكان بوونیان هەیە، ژمارەیان بە 300 خێزان دادەنرێت كە نزیكەی هەزار كەس دەبن، پیشەی سەرەكیی مەسیحییەكان لەو دەڤەرەدا، فەرمانبەری دامودەزگەكانی حكوومەت و ژمارەیەكیشیان كاسبكارن.
لە ناحیەی دیانا و هەریەك لە گوندەكانی هاودیان و بێدیال لە سنووری مێرگەسۆر كڵێسای گەورەی مەسیحییەكان بوونی هەیە و رۆژانە چاڵاكی ئاینی و بەتایبەت رۆژانی یەكشەم مەڕاسیمە ئاینیەكانیان تێدا ئەنجام دەدەن، جیا لە كڵێساكانیش مەسیحییەكانی دەڤەری سۆران زیاتر لە 10 مەزار و شوێنی پیرۆزیان هەیە .

زۆرترین بینراو