ئێران دەیان مانگای هاووڵاتییانی سیدەكانی دزیووە

ئێران دەیان مانگای هاووڵاتییانی سیدەكانی دزیووە

زاری كرمانجی – سیدەكان: ماوەی چەند رۆژێكە، سوپای پاسدارانی كۆماری ئیسلامی ئێران دەیان سەر مانگای هاووڵاتییانی دەڤەری برادۆست لە سنووری كارگێڕی ناحیەی سیدەكان ئاودیوی سنوورەكەیان دەكەن و بەهیچ مەرجێك بۆیان ناگەڕێننەوە .
جاری یەكەم نییە وڵاتی ئێران، مەڕ و ماڵات و مانگای هاووڵاتییانی دەڤەری برادۆست ئاو دیو دەكەن و زیان بە هاووڵاتییان دەگەینێت، ساڵی رابردووش جیا لە بردنی 43 سەر مانگا، هاوكات دوو گەنجی گوندی لێلكانی سەر بە ناحیەی سیدەكانیشیان كە بۆ گژ و گیای بەهاری روویان لە گەلی خواكورك كردبوو، بە بیانووی نزیك كەوتنەوە لە پایگای پاسداران سەرسنووری باشوور و رۆژهەڵاتی كوردستان دەستگیر كران كە بۆ ماوەی چەندین رۆژ كەس هەواڵی مان و نەمانی ئەو دوو گەنجەیان نەدەزانی دواتر بە هەوڵ و هاوكاری حكومەتی هەرێمی كوردستان ئازاد كران.
فەیسەل ئەحمەد دانیشتووی گوندی ژیلیای سەر بە ناحیەی سیدەكان بە زاری كرمانجی گووت" نزیكەی یەك مانگە سوپای پاسدارانی ئێران 26 سەر مانگای مامێكم و دوو لە دانیشتووانانی گوندەكەمانی ئاو دیوو كردووە، لە كوێستانی بەری بەرد و دۆڵ و مەیدان، بەیانووی بەزاندنی سنوور بەڵام مانگایەكان زیاتر لە یەك كیلۆمەتر هێشتا لە نێو خاكی كوردستاندا بوونە و لە رێگەی مەفرەزی خۆیان بردوویانە بۆ ئێران، لە كاتێكدا ئەم مانگایانە تاكە سەرچاوەی داهات و بژێوی رۆژانەیان بووە و باری ئابوورییان زۆر خراپە .
زیاتر گووتی" وڵاتی ئێران، جیا لەوەی گوند و ئاوایەكانمان بە بیانووی جیا جیا تۆپباران دەكات، بەڵام دێت و بەبیانووی بەزاندنی سنوور چێل و مانگاكانی هاووڵاتییان دەدزێت و زەرەری زۆری ماددیان لێ دەدات، تەواوی لایەنە پەیوەندی دارەكانیشمان لەو بابەتە ئاگادار كردۆتەوە و داوا لە حكومەتی هەرێم دەكەین هەوڵی رژد بدات بۆ گەڕاندنەوەی ئەو مانگایانە.
شایەنی باسە، ساڵی رابردووش، هەر لەلایەن سوپای پاسدارانی ئێران " 43 " سەر مانگا و ئاژەڵی یەكێك لە هاووڵاتییانی تری دەڤەری برادۆستی بردووە و تا ئێستە بۆی نەگڕێندراوەتەوە . عەبدولجەبار عومەر خاوەن مانگایەكان، بە زاری كرمانجی گووت" ساڵانە لە وەرزی بەهار بەمەبەستی لەوەڕاندنی مانگا و بزن و مەڕ و ماڵاتمان روو لە كوێستانەكانی سیاكیۆ و مێرگەدوكان دەكەین و تا پایزێكی درەنگ ناگەڕێینەوە گوند، زیاتر لە مانگێكە پاسدارانی ئێران 43 سەر چێڵ و مانگایان لێ دزیوین و بەچ مەرجێك بۆمان ناگەڕێننەوە .
ئەو خاوەن مانگایە دەگەڕێتەوە و دەڵێت" لە ساڵی رابردوو لە لایەن سوپای پاسدارانی پایگای سیاكۆی " گەروەماڵ " دۆڵەمەیدان سنووری كێلەشینی هاووسنووری پیرانشاری رۆژهەڵاتی كوردستان چێڵ و مانگاكانیان لێ بردووین كە بۆ لەوڕاندن چووبوونە نزیك پایگای پاسداران لە سیاكۆ.
ئەو هاووڵاتییە زیاتر دەڵێ" هەر هەمان رۆژ بۆ هینانەوەی مانگاكانمان سەردانی پایگامان كرد و بەیانووی بەزاندنی خاكی ئێران، داوایان كرد لەلایەن دەسەڵاتدارانی ئێرانەوە لە سنووری حاجی "عومران" ئاژەڵەكانتان بە هاوكاری دەسەڵاتدارانی هەرێمێ كوردستان وەربگرنەوە، بەڵام تا ئێستە هەر چاوەرێی هێنانەوەی ئاژەڵاكانمان دەكەین و هەندێك لە گوێلكەكانی ئەو چێلانەش بێ شیر ماون و بە دەست شیریان پێ دەدەین. فەرماندەی پاسدارانی ئێران بەو هاووڵاتییەی راگەیاندوە مانگا و چێڵەكان بە نایاسایی هاتوونەتە نێو خاكی ئێران بۆیە رای گەیاندوە كە پێییان نادرێنەوە، جەبار عومەر خاوەنی ئاژەڵەكان رەتی دەكاتەوە مانگاكانی خاكی ئێرانیان بەزاندبێت و دەڵێت " تەنها بۆ لەوەڕ و خواردنی گژ و گیا چووبوونە نزیك پایگا .
لەلای خۆشیەوە ئیسحان چەلەبی بەڕێوەبەری شارەدێی سیدەكان بە زاری كرمانجی راگەیاند" لەسەرتای ئەم مانگە لە لایەن گوندنشینانی ژیلیا ئاگادار كراینەوە كە سوپای پاسداران 26 سەر چێل و مانگای ئەوانی بە بیانووی بەزاندنی سنوور بردووە و ئاودیووی وڵاتەكەیان كردووە، بۆیە سەرووی خۆمان لەو بابەتە ئاگادار كردەوە و لەرێگەی بەشی یاسایی لە پارێزگای هەولێر بەفەرمی لەسەر ئەم بابەتە قسە لەگەڵ كونسوڵخانەی ئێران و هەروەها لە رێگەی پاسەوانی سنووری عێراق بە فەرمی قسە لەگەڵ پاسەوانی سنووری ئێران كراوە، بە شێوەی فەرمی و بە نوسراو لە رێگەی " عیلاقات " داوامان كردووە مانگاكانی ئەو هاووڵاتییانە بۆ بگەڕێننەو یا قەرەبۆی بكەنەوە .
بەڕێوەبەری شارەدێی سیدەكان دەڵێت" ئەوكات بەڵێننیاندا 10ی مانگ ئاژەڵدارەكان دەتوانن ئاژەڵەكانیان وەربگرنەوە، دواتر گوتیان دراوەتە دادگا و پێویستە پارێزەرێك بۆ وەرگرتنەوەی لە دادگاكانی شنۆی رۆژهەڵات بگرن بەڵام لە بەدوواداچوونی زیاتر بۆمان دەركەوت كە ئێران تەنها بیانوو دەگرێت و مەبەستی دانەوەی چێڵ و مانگاكانی هاووڵاتییانی نییە . گووتیشی" هەوڵەكانمان بەردەوامن بۆ هێنانەوەی ئاژەڵەكان چونكە زیانێكی زۆر بەر هاووڵاتییانی سنوورەكەمان دەكەوێت و بژێوی ژیانیشییان لەسەر ئەم مانگایانە بووە.
سیدەكان لە رووی كارگێریەوە سەر بە پارێزگەی هەولێرە و بە دووری 144 كم لە باكووری رۆژهەڵاتی شاری هەولێر هەڵكەوتووە و هاوسنوورە لەگەڵ وڵاتی ئێران، خاوەن رێژەیەكی زۆری كوێستان و لەوەرگای باشە و خەلك بە مەبەستی كاری ئاژەڵداری و رەوەند و كۆچەری روو لە كوێستانەكان دەكات، بەڵام ساڵانە لە لایەن كۆماری ئیسلامی ئێرانەوە مەڕ و ماڵات و مانگاكانیان دەدزرێت و ئاو دیووی وڵاتەكەی دەكەن .

زۆرترین بینراو