ئەكتەرێكی دیاری هیندی لە رێگەی زاری كرمانجییەوە داوای لێبوردن لە كورد دەكات

ئەكتەرێكی دیاری هیندی لە رێگەی زاری كرمانجییەوە داوای لێبوردن لە كورد دەكات

دیمانە/ شەهلا رەشید
درامای ( گرێ كوێرە) یەكێكە لەو درامایانەی لە كوردستان بینەرێكی زۆری هەیە، دراماكە باس لە چیڕۆكی نێوان دوو هاوڕێی كچ دەكات، كە یەكێكیان كچی خزمەتكاری كۆشكەكەیە، لەگەڵ گەورە بوونی ئەم دوو كچە كێشەكانیش بەرە بەرە قووڵتر دەبنەوە.
رووهیت خوورانا، یەكێكە لە ئەكتەرانی ئەم درامایە و بە ناوی (ڤانش) رۆڵی كەسێكی ئاڵوودەبوو بە ماددەی هوشبەر دەگێڕێت، رووهیت لە دیمانەیەكی تایبەتدا بۆ زاری كرمانجی دوا و باسی لە ژیان و كارە هونەرییەكانی دەكات.
رووهیت، قۆناغەكانی خوێندنی لە دێلهی تەواو كردووە، رۆژانە تەنها بە كارێكەوە خۆی خەریك ناكات، سەرقاڵی چەندین كارە بەیەكەوە، ئەو لە بارەی چوونە نێو جیهانی ئەكتەرییەوە دەڵێت" هەر لە منداڵییەوە ئەكتەری هیوا و خەونێكی گەورەم بوو، لە خیزانەكەمدا تەنها من كاری ئەكتەری دەكەم، خوشكێكی لەخۆم بچووكترم هەیە ئەویش كاری مەیكئەپ دەكات و كەسێكی دیارە".
رووهیت دەڵێت" جگە لە خێزانەكەم هیچ كەس و لایەنێك پاڵپشتییان نەكردووم، بەڵام هەرگیز كۆڵم نەداوە و ئێستا جگە لەكاری هونەری سەرقاڵی چەندین كاری ترم، هەمیشە دەمەوێت كارێك ئەنجام بدەم كە حەزم لێیەتی، هەمیشە حەزم لە گەشت كردنە و دەمەوێت لە گەشتەكانمدا باشترین و گەورەترین هوتێلەكان دیاری بكەم بۆ كات بەسەر بردن، من كۆرێكم حەزم لە سەركێشی و ئاشنابوونە بە كولتوورە جیاوازەكان".
روهیت، ستایشی خەڵكی كوردستان دەكات و رێز و خۆشەویستییان بۆ دەردەبرێت كە بینەری درامایەكن كە خۆی رۆڵی تێدا دەگێرێت و سەبارەت بەمە گووتی" هەرچەندە زۆر ئاشناییم لەگەڵ كولتووری كورد و كوردستان نییە، بەڵام زۆر حەز دەكەم شارەزای كوولتووریان ببم، هەوڵیش دەدەم شارەزای ببم، ئەوەی من لەسەر كورد دەزانم چوار پارچەیە، داوای لێبوردن دەكەم كە شارەزاییەكی زۆرم نییە بۆ ئەو وڵاتەی منیان خۆشدەوێت و بینەری كارە هونەرییەكانی منن، بە دڵنیاییەوە حەز دەكەم زیاتر ئاشنایان بم".
گووتیشی" بیرۆكەی ئەوەم هەیە لە ناو خانوویەكی وەك بەهەشت لە نێوجەرگەی هیند دەست بكەم بەو پرۆژانەی لە خەیاڵم دان و پلانم بۆیان داناوە، گرنگ نییە لە چ قۆناغێكدای، بەڵكۆ پێویستە لە نێو سینەما بجەنگی و نابێت خاڵە لاوازەكانی خۆت پشتگوێ بخەیت، گرنگ نییە كە سەركەوتوو دەبیت یا نا، پێویستە گەر بۆ یەك جاریش بێت رێگەكان تاقی بكەیتەوە".
رووهیت، خێزاندارە و سەبارەت بە چۆنییەتی ناسین و چوونە نێو ژیانی هاوسەرگیرییەوە گووتی" ئەو ئافرەتەی ئێستا هاوسەری منە لە خوێندنی سەرەتایی پێكەوە بووین و لەو كاتەوە من عاشقی بووم، ئێستاش خاوەنی دوو منداڵین كچێك و كۆڕێك".

زۆرترین بینراو