ئەمساڵ لە سنوورەكەمان بەسەدان دۆنم زەووی پوش و پاوان و دارستان سووتاوە

ئەمساڵ لە سنوورەكەمان بەسەدان دۆنم زەووی پوش و پاوان و دارستان سووتاوە

دیدار-محەمەد هەسنانی
ئەمساڵ بەهۆی ئاگركەتنەوە لە دەڤەری سۆران، سەدان دۆنم زەووی پوش و پاوان و دارستان و رەز و باغی هاووڵاتییان سووتاوە، لەگەڵ چەندین ئۆتۆمبێلی هاووڵاتیان و چەند رووداوێكی خنكان، گوتەبێژی بەڕێوەبەرایەتی بەرگری شارستانیی سۆرانیش زانیار زیاتر دەخاتەروو.
موقەدەم بەیار باڵەكی، گوتەبێژی بەڕێوەبەرایەتی بەرگری شارستانی سۆران بە زاری كرمانجی راگەیاند " ئەمساڵ لە سنووری بەڕێوەبەرایەتییەكەمان كە هەر چوار قەزاكانی (سۆران، مێرگەسۆر، چۆمان، رواندز) لە خۆدەگرێت، بەداخەوە ئەمساڵ بەهۆی بێباكی هاووڵاتییان، هەروەها بۆردومان و تۆپبارانەكانی ناوچە سنووریەكان، چەندین ئاگر لەو ناوچانە كەوتونەتەوەو كە بەهۆیەوە (653) دۆنم زەووی پوش و پاوان و دارستان سووتاوە، لەگەڵ سووتانی دەیان رەزو باخی هاووڵاتییان، ئەمەش زیانی زۆری ماددی بە هاووڵاتییان و ژینگەی دەڤەرەكە گەیاندووە".
گوتەبێژی بەڕێوەبەرایەتی بەرگری شارستانی سۆران، ئەوەشی ئاشكرا كرد " كە تەنها لە رۆژانی پشووی جەژنی قورباندا چەندین رووداوی ئاگر كەوتنەوەی جۆراو جۆر تۆمار كراون، بەم هۆیەشەوە زیاتر 185 دۆنم زەووی پووش و پاوان و دارستان و 45 رەز و باغی هاووڵاتییان سووتاون".
گووتیشی " ئەو ئاگر كەوتنەوانە جگەلە لە زیان گەیاندن بە ژینگەو رەزو باخی هاووڵاتییان لە هەمانكاتیشدا، ئەركی كارمەندانمان زیاتر دەكەن، بەتایبەتیش بەهۆی ئەوەی ناوچەكە سەخت و شاخاوییە ئەركی كۆنتڕۆلكردنیان ئاستەم تر دەبێت، داواكاریشە لە هاووڵاتییان و گەشتیاران جوتیاران لەكاتی چوونیان بۆ گەشت و سەیران و ناو رەزو باخەكانیان لەدوای خۆیان ئاگرەكانیان كۆنتڕۆلبكەن، ئەگەرنا دەبێتە هۆی دروستبوونی كارەساتی گەورەو كەتنەوەی ئاگر لەو ناوچانە".
موقەدەم بەیار باڵەكی، گوتەبێژی بەڕێوەبەرایەتی بەرگری شارستانی سۆران ئەوەشی ئاشكرا كرد " ئەمساڵ لە سنوورەكەمان بەگشتی تائێستا پێنج رووداوی خنكان تۆمار كراون، كە هەندێكیان دوای چەندین رۆژ گەڕانی تیمەكانمان توانراوە تەرمەكانیان بدۆزرێتەوەو لە روبار دەریان بهێنن، دواین رووداویش لە سێیەم رۆژی جەژنی قوربان، خنكانی گەشتیارێكی شاری كەركوك بوو بەناوی (محەمەد نوردین ئەحمەد) تەمەن 26 ساڵ لەكاتی مەلەكردن لە روباری حافیز لە سنووری قەزای رواندز، دوای دەرهێنانی تەرمەكەی رەوانەی پزیشكی دادی سۆران كرا".
ئەوەشی خستەروو " بەهۆی هەڵكەوتەی ناوچەكەو بوونی شوێنی شاخاوی، پێویستە هاووڵاتییان بۆ مەلەكردن خۆیان لە رووبارەكانی دەڤەری سۆران بە دووربگرن، بەتایبەتیش ئەو گەشتیار و كەسانەی كە ناشارەزان و لەوانەیە دووچاری روودا ببنەوە، وەك دیاریشە لەم وەرزەی ئێستادا بەهۆی بەرزبوونەوەی پلەی گەرما خەڵكێكی زۆر بەتایبەت گەنجان بۆ مەلەكردن روو لە رووبارەكانی ناوچەكە دەكەن، بۆیە پێویستە هۆشیاربن و خۆیان لەم شوێنانە بە دووربخەن كە جێگەی مەترسین، كە بەردەوام لەم رووەوە رێنمایمان بڵاوكردۆتەوە، هەروەها لە زۆربەی شوێنەكان تابلۆی هۆشیار كردنەوەمان هەڵواسیووە لەپێناو پاراستنی گیانی هاووڵاتییان و گەشتیاران".
گوتەبێژی بەڕێوەبەرایەتی بەرگری شارستانی سۆران، ئاماژەشی بەوەدا " تەنها لەمساڵدا واتە لەماوەی حەوت مانگی رابردوو تا ئێستا لە سنووری بەڕێوەبەرایەتییەكەمان (19) ئۆتۆمبێل سووتاون، هۆكاری زۆری ئەم جۆرە ڕووداوانە دەگەڕێتەوە بۆ خراپی جۆری بەنزین و خراپی كەرستە و پێداویستییەكانی ئۆتۆمبێل لە ڕووی كوالیتی، هەروەها پلەی گەرماش هۆكارێكە بۆ خێرایی گڕگرتن و شیبوونەوەی خێراتری ماددە پێكهاتەكانی ناو ئۆتۆمبێلەكە، هەروەها زۆربەشیان ئەم ئۆتۆمبێلانە بوونە كە مۆدیلایان كۆنە، هەندێك جارێش پێشێلكردنی ڕێنمایەكانی هاتوچۆ و خێرایی لێخورێن و وەرگەڕان گڕگرتنی لێدەكەوێتەوە".

زۆرترین بینراو