ئەم هەفتەیە ئەنجامی پزیشكی داد لەسەر دۆسیەی سومەییە ئاشكرا دەكرێت

ئەم هەفتەیە ئەنجامی پزیشكی داد لەسەر دۆسیەی سومەییە ئاشكرا دەكرێت

موڕشید برادۆستی - سیدەكان: هەفتەی رابردوو، كچێكی 15 ساڵانی دانیشتووی گوندێكی شارەدێی سیدەكان، بە مەبەستی چارەسەری پزیشكی سەردانی نەخۆشخانە دەكات و دوای دەرهێنانی ددانی راستەوخۆ، باری تەندرووستی ناجێگر دەبێت و گیان لە دەست دەدات“.
گیان لە دەستدانی كچە تەمەن 15 ساڵانییەكەی سیدەكان، دەنگدانەوەی زۆری بەدوای خۆیدا هێناوە و قسە و باسی زۆری لەسەر كراوە، زاری كرمانجی لە راپۆرتێكیدا بۆچوونی كەس و كاری كچەكە و لایەنە پەیوەندی دارەكان دەخاتەڕوو و بە دواداچوون بۆ دۆسیەكە دەكات .
سومەییە عەبدولڵا حەمید، كچە پێشمەرگەیەكی دانیشتووی گوندی هەتكای سەر بە ناحیەی سیدەكان بوو، تا قۆناغی سەرەتایی خوێندووە و كچەی ماڵەوە بووە و هەفتەی رابردوو گیانی لە دەستدا.
عەبدولڵا حەمید، باوكی كچەكە بە زاری كرمانجی گووت " چەند رۆژێك بوو سومەییەی كچم بەردەوام ئازای ددانی هەبوو، بۆیە رۆژی چوارشەممە 11 - 12 - 2019 بۆ چارەسەری پزیشكی سەردانی بەشی ددانمان كرد لە بنكەی تەندرووستی سیدەكان، دووای ئەوە پزیشك كچەكەمی بینی و بەنجی لێدا بۆ دەرهێنانی ددانی، راستەوخۆ كچەكەم بە هۆی دابەزینی فشاری خوێنی لەهۆش خۆی چوو و ئاوی مەغەزییان بۆ دانا و دووای یەك كاتژمێر بەخۆ هاتەوە.
بە گووتەی باوكی سومەییە، پزیشك دووای هوشیار بوونەوەی كچەكەی هەوڵیدا ددانی بۆ دەربێنێت، هەرچەندە پێمان ووت“ ئەگەر مەترسی هەبێت دەری نەهێنێت و رۆژێكی تر دێیینەوە، بەڵام پزیشك رەتی كردۆتەوە كە هیچ مەترسیەكی هەبێت و ددانەكەی بۆ دەرهێنا .
هەرچەندە لە دوای دەرهێنانی ددانی، باری تەندرووستی سومەییە حەمید، تا رادەیەك جێگیر بووە و بۆ نیوەڕۆ دەگەڕێتەوە ماڵەوەی، بە قسەی باوكی، كەمێك خواردن دەخوات، دواتر راستەوخۆ جەستەی دەلەزرێت و دەمی خوار دەبێت و بەپەلە ویستویانە بیگەیننە نەخۆشخانە لە رێگا گیانی سپارد .
عەبدولڵا حەمید گووتیشی " مردنی كچەكەم لاروون نییە، بۆیە سكاڵای یاساییمان لەسەر ئەو پزیشكە تۆمار كردووە كە ددانی بۆ كچەكەم دەرهێناوە و چاوەڕوانی ئەنجامی پزیشكی دادی دەكەین".
" كەس و كاری ئەوە پشت راست دەكەنەوە كە سومەییە عەبدولڵا پێشتر هیچ نەخۆشییەكی نەبووە و تەندرووست بووە تەنها بۆ ددان سەردانی نەخۆشخانەی كردووە ".
لای خۆشیەوە، د . مەقسوود ئیسماعیل بەڕێوەبەری تەندرووستی سۆران بە زاری كرمانجی راگەیاند " لە نزیكەوە بە دوواداچوون بۆ دۆسیەی سومەییە عەبدولڵا دەكەین و وەزارەتی تەندرووستیش لیژنەیەكی هاوبەشی پێكهێناوە و كەسانی یاسایی و پزیشكی پسپۆڕی ددان و سەندیكای ددان و هەروەها پزیشكی پسپۆڕی سڕكردن ئەندامن لە لیژنەكە و بە دوواداچوون بۆ دۆسیەكە دەكەن" .
زیاتر گووتی" پێویستە چاوەڕوانی ئەنجامی پزیشكی دادی یكەین كە چەند رۆژێكی تر دەردەچێت، تا هۆكار و چۆنیەتی گیان لە دەست دانی ئەو كچە بۆ هەموو لایەك بە فەرمی بخاتەڕوو" .
بەڕێوەبەری تەندرووستی سۆران، گووتیشی " لە سنووری بەڕێوەبەرایەتییمان نزیكەی 20 پزیشكی ددان هەیە، رۆژانەش هەموو یان كاری ددانكێشان و نەشتەرگەری ددان و دەماربڕین ئەنجام دەدەن، تا ئێستا هیچ كەس گلەیی لە پزیشكەكان نەبووە، نەك رووداوی گیان لە دەستدان تۆمار بكرێت، هەر كمترخەمییەك لە پزیشكی ددان هەبێت، بێگومان بە پێی یاسا مامەڵەی لەگەڵ دەكەین".
مقەدەم شەماڵ دێواری، گووتەبێژی بەڕێوەبەرایەتی پۆلیسی سۆران بە زاری كرمانجی راگەیاند" كاتژمێر 3:30 خوولەكی دووا نیوەڕۆی رۆژی چوارشەممە، ئاگادار كراینەوە لە بنكەی تەندرووستی سیدەكان كە كچێك بەناوی ( س . ع . ح ) دووای ئەوەی بەمەبەستی ددان كێشان رووی لە نەخۆشخانە كردووە و ددانی دەرهێناوە، دووای گەڕاوەنەوە بۆ ماڵەوە راستەوخۆ باری تەندروستی تێك دەچێت و هێناویانەتەوە بۆ نەخۆشخانە لەرێگا گیانی لەدەست داوە".
گووتەبێژی بەڕێوەبەرایەتی پۆلیسی سۆران، ئاماژەشی بەوەدا " كچەكە خەلكی ناحیەی سیدەكانە و لەدایك بووی ساڵی 2004، لەسەر فەرمانی دادوەر تەرمەكەی رەوانەی پزیشكی دادی سۆران و هەولێر كراوە، لێكۆڵینەوە دەستی پێ كردووە .
سەرچاوەیەك لە پزیشكی دادی هەولێر بە زاری كرمانجی راگەیاند " لەم هەفتەیە ئەنجامی دۆسیەی (سومییە عەبدوڵا حەمید) تەمەن 15 ساڵان دەردەچێت بۆ هەموو لایەك دەخەینەڕوو .

 

زۆرترین بینراو