ئەوگەنجەی بە دەفەكەی گەنجان دڵخۆش دەكات

ئەوگەنجەی بە دەفەكەی گەنجان دڵخۆش دەكات

"دەف سازێكی پیرۆزە زۆربەی ژەنیارانی كورد بەبێ دەست نوێژ نایژەنن"


محەمەد ئامۆكەیی= هەولێر: سەعدوڵا خالید بێراوەیی، تەمەنی 22 ساڵە و لەدایكبووی شاری هەولێرە, قوتابیە لە پەیمانگای گەشە بەشی نەوت، لە تەمەنێكی بچووك هۆگری ژەنینی دەف دەبێت و دواتر لەگەڵ گەورەبوونی تەمەنی سەعدوڵا زیاتر خۆی هۆگری ژەنینی دەف دەبێت و لەزۆربەی بۆنەكان بەخۆی و دەفەكەی گەنجان دڵخۆش دەكات، لە چاوپێكەوتنێكی زاری كرمانجی سەعدوڵا بێراوەیی، باس لەمێژوی دەف دەكات, پێشی وایە دەف شادی هێنەرە و گووتی" دەف لە مۆسیقای كوردی و ئێرانی هەروەك سازەكانی تر بوونی هەبووە بەجۆرێك بووە بەشێك لە خانەقا و زكر و سەمای دەروێشانی كوردستان زكر و سەمای دەروێشانی تەریقەتی قادری و كەسنەزانی، لە كوردستان بە ئامێری دەف دەكرێ و هەر بەم بۆنەیەوە ٧ بۆ ١٠ مەقامیان بۆ داناوە كە لە باری مۆسیقاییەوە هەركامیان لەسەر ریتمێكن، دەف لە كوردستان ئێستاش سازێكی پیرۆزە بەجۆرێك كە زۆربەی ژەنیارانی كورد بەبێ دەستنوێژ نایژەنن، بەوتەی بیژەن كامكار ئەم گۆشەنشێنیەی دەف لە خانەقاكان هەتا ساڵی ١٣٥٣ی هەتاوی بەردەوام بووە هەتا بە پێشنیاری م. محەمەد حەمەد ڕەزا، لوتفی و زەحمەتەكانی مامۆستا بیژەن كامكارەوە دیسان دێتەوە ناو مۆسیقای ئێرانی و كوردی و دەبێتەوە بەشێكی دانەبڕ لەم جۆرە مۆسیقانە، تەنانەت جێگری دەف لە مۆسیقادا لەوەش تێدەپەڕێ، بەشێوەیەك كە ئەمڕۆ لە زۆربەی جۆرەكانی مۆسیقاییدا ئەم سازە بەكار دێنن، دەف ئێستا خۆشەویسترین ساز لە ئێران دایە و ساڵانە سەدان كەس فێری دەبن و شارەزای دەبن، جگە لە كوردستان و ئێران لە وڵاتانی عەرەبی و ئاسیای ناوەڕاست و ڕۆژهەڵاتی ناوین و قەفقازیە و زۆربەی وڵاتانی بیانی بگرە لە ئەوروپاشدا فێر دەكرێ و جەماوەری هەیە و لە مۆسیقاكانی ئەم وڵاتەنەدا جێگر بووە، شاری سنە و كوردستان وەكوو پێتەختی دەف دەناسرێت."
ئەو گەنجە گووتیشی" سەرسامم بە دوو ژەنیاری كورد هەمیشە ئاواتم بووە رۆژێك وەك ئەوان دەف بژەنم ئەوانیش بێژەن كامكار و حسێن زەهاوی، ژەنینی ئەوان زۆر جیاوازە و جۆش و خرۆشێكی تایبەتی هەیە، دەف تەبای و پێكەوە ژیان و ئاشتەوای رێگا خۆشكەرە بۆ ئاشتی چونكە لە سەردەمی كۆندا هەر كێشەیەك چارەسەر كرابا كۆتایەكەی بەدەف ئاهەنگیان دەگێرا، دەف لای من رۆح, ژیان, بوون و خۆشبەختی دەگەیێنێت لەو كاتەی كە «پێغەمبەری خودا» (سەلامی خودای ) لەسەر بێت كۆچیكرد لە مەككە بۆ مەدینە خەڵكی مەدینە بە دەف پێشوازیان لێكرد چونكە دەیانزانی خۆش بەخت هێنەرە".
ئەوەشی گووت" هەمووكەسێك حەزو خولیای هەیە منیش وەك لاوێك خولیا و خەون و ئاواتم هەیە لە ژیان دەتوانم بڵێم بەشێك لە خەونی من ببم بە مامۆستای دەف و هیواخوازم لە ژیان بەربەستەكان بشكێنم بڵێم منیش هەم پێمدەكرێت و دەتوانم هەوڵم داوە."

زۆرترین بینراو