ئەڵمانیا و هۆڵەندا دەست بە مەشقپێکردنەوەی پێشمەرگە دەکەنەوە

ئەڵمانیا و هۆڵەندا دەست بە مەشقپێکردنەوەی پێشمەرگە دەکەنەوە

 

مەشق و راهێنانی راوێژکارانی وڵاتێکی دیکەی هاوپەیمانی نێودەوڵەتی بە سەرۆکایەتی ئەمریکا دەستپێدەکاتەوە، بە راگەیەندراوی فەرمی دەستپێکردنەوەی مەشقەکانی بە هێزەکانی پێشمەرگە راگەیاند.

وەزارەتی بەرگریی هۆڵەندا لە راگەیەندراوێکدا دەڵێت:" دەست دەکەینەوە بە راهێنانە سەربازییەکان بە هێزە عێراقییەکان، هەروەها هێزەکانی پێشمەرگە، وەکو بەشێک لە بڕیاری هاوپەیمانی نێودەولەتی بە سەرۆکایەتی ئەمریکا، ئەو بڕیارە لەلایەن هاوپەیمانانەوە دراوە و هۆڵەندا پێوەی پابەند دەبێت .
لە راگەیەندراوەکەدا هاتووە :" هەفتەی رابردوو بەهۆی بوونی هەڕەشە لەسەر هێزەکان، هاوپەیمانی نێودەوڵەتی مەشقەکانی راگرتبوون، ئێستا کە هەڕەشەکان نەماون، مەشقەکان دەستپێدەکەنەوە، بڕیارەکە لە کاتێکدایە، ئەڵمانیا و هۆڵەندا بۆ ماوەی چەند رۆژێک مەشقەکانیان لە عێراق راگرتبوو، لە ناویدا هێزەکانی پێشمەرگە لە هەرێمی کوردستان بەڵام ئێستا بە بڕیار دەست بە مەشقەکان دەکەنەوە .
هۆڵەندا لەکاتێکدا ئەو بڕیارەی داوە کە هێشتا دۆخی ناوچە کوردستانیەکانی دەرەوەی ئیدارەی هەرێمی کوردستان باش نییە، داعش ناوە ناوە لە کەرکووک جەلەولا و ناوچەکانی دیکە هێرش دەکاتە سەر هێزە عێراقیەکان،لەکاتێکدا هێشتا هیچ بڕیارێک بۆ گەڕانەوەی پێشمەرگە بۆ ئەو ناوچانە نییە .
هاوکات هەفتەی رابردوو نووسینگەی پەیوەندیەکانی دەرەوەی پارتی لە روون کردنەوەیەکدا داوای لە هەردوو وڵات کردبوو دەست بە مەشقەکان بە پێشمەرگە بکەنەوە، لە تویتەر نووسینگەکە رایگەیاندبوو، وەکو هەموو جار گوتومانە هەرێمی کوردستان ئارام و سەقامگیرە .
هەمان رۆژ یەنز فلۆس دۆرف، گوتەبێژی وەزارەتی بەرگری ئەڵمانیا رایگەیاندبوو؛' رەنگە لە چەند رۆژی داهاتوو مەشقەکان دەستپێبکەنەوە،چونکە هەست دەکرێت هیچ هەرەشەیەک نیە لەسەر سەربازانمان لە هەرێمی کوردستان.، ئێستاش دوای ئەڵمانیا،هۆڵەندا لە راگەیەندراوێکدا ئاماژەی بەوە کردووە لەژێر سەرپەرشتی هاوپەیمانان دەستمان بە مەشقەکان بە پێشمەرگە کردووەتەوە.
ئێستا هۆڵەندا راوێژکارئ سەربازی لە هەرێمی کوردستان هەیە و مەشق بە هێزەکانی پێشمەرگە دەکەن،لەسەر چەند تەکنیکێکی شەڕ و رووبەڕووبوونەوە مەشقیان پێ دەکرێت، هەروەها هەفتەی رابردوو هاوپەیمانی نێودەوڵەتی رایگەیاندبوو، مەشقەکانمان لە هەرێمی کوردستان و عێراق بە پێشمەرگە و هێزە عێراقیەکان بەردەوام دەبێت . ئەڵمانیا و هۆڵەندا لەو وڵاتانەن هاوکارییان بۆ هێزە پێشمەرگەی کوردستان ناردووە، هاوکارییەکانی ئەو وڵاتانە یارمەتیدەر بوون لە سەرکەوتن بەسەر داعش و دەرکردنی چەکداران لە سنوورەکانی کوردستان.
هەردوو وڵات چەندین ساڵە پەیوەندی سیاسی و سەربازییان لەگەڵ هەرێمی کوردستان هەیە و نوێنەرایەتیان لە هەرێمی کوردستان کردووەتەوە.

 

زۆرترین بینراو