بارزان محەمەد: چەند پرۆژەی گەشتیاری لە سنووری سۆران جێبەجێ دەكرێن

بارزان محەمەد: چەند پرۆژەی گەشتیاری لە سنووری سۆران جێبەجێ دەكرێن

دیدار- ڕائیب شێروانی: بارزان محەمەد، بەڕێوەبەری بەڕێوەبەرایەتی گەشتوگوزاری سۆران لە دیدارێكدا لەگەڵ هەفتەنامەی زاری كرمانجی گووتی:" هەموو ئامادەكارییەك بۆ جەژنی رەمەزان كراوە و پێشبینی دەكەین گەشتیارێكی زۆر روو لە هەرێمی كوردستان بە شێوەیەكی گشتی و سنووری سۆران بەتایبەتی بكەن، لەگەڵ ئەوەی بەم نزیكانە چەند پرۆژەیەكی دیكەی گەشتیاری لە سنووری سۆران جێبەجێ دەكرێن".
بارزان، دەڵێ:" بۆ باشتر خزمەتكردنی گەشتیاران و ئامادەكاری بۆ جەژنی رەمەزان دەستەی گەشتوگوزار لەگەڵ بەڕێوەبەرەكانی گەشتوگوزار لە شاروشارۆچكەكانی كوردستان كۆبووەوە، بۆ ئەوەی ئاسانكاری بۆ گەشتیاران بكرێت، بۆ ئەوەی زۆرترین گەشتیار سەردانی شوێنە گەشتیارییەكان بكەن، كە پێشبینی دەكەین گەشتیارێكی زۆر روو لە هەرێمی كوردستان بە شێوەیەكی گشتی و سنووری سۆران بەتایبەتی بكەن، لە رۆژانی داهاتووشدا ئامادەكاری باشتر دەكەین، هەم بۆ پاكوخاوێنی شوێنە گەشتیارییەكان، شوێنەكان باشتر هاندراون، كەپر و چێشتخانەی زۆر جوان لە گەلی عەلی بەگ و بێخال دروست كراون، لە جوندیان خەریكین، رێنمایی پێویست دراوە بە خاوەن كەپرەكان بۆ ئەوەی كەپری جوان دروست بكەن و بە جوانترین شێوە پێشوازی لە گەشتیاران بكەین.
بەڕێوەبەری بەڕێوەبەرایەتی گەشتوگوزاری سۆران گوتیشی:" بەهۆی باشبوونی پەیوەندییەكانی نێوان هەولێر و بەغدا پێشبینی دەكەین هەر لە جەژنی رەمەزان تا جەژنی قوربان رۆژانە گەشتیارێكی زۆر روو لە دەڤەری سۆران بكەن، بۆ ئەوەش هەموو ئامادەكارییەكمان كردووە.
بارزان، ئاماژەی بەوەشكرد:" لە سەنتەری شاری سۆران چوار ئۆتێل و لە رواندز دوو گوندی گەشتیاری، لەگەڵ چەند مۆتێلێك لە سۆران و دەوروبەری هەن، بە گشتی سۆران شەوانە لە توانای دا هەیە دوو هەزار و پێنج سەد گەشتیار لە خۆ بگرێت، بەردەوام لەگەڵ وەبەرهێنەران و شارەوانی لەسەر خەتین، بەم نزیكانە چەند پرۆژەیەكی دیكەی گەشتیاری دروست دەكرێن و دەكەونە كار لە رێگەی وەبەرهێنان و مساتحە، بەردەوام لە هەوڵداینە ژمارەی هۆتێل و چێشتخانە و كافتریا و شوێنە گەشتیارییەكان بۆ گەشتیاران زیاد بكەین.
بەڕێوەبەری بەڕێوەبەرایەتی گەشتوگوزاری سۆران روونیشكردەوە:" بەردەوام پەیوەندیمان لەگەڵ كۆمپانیا گەشتیارییەكان هەیە، چەندین جار سەردانی بەغدامان كردووە، ئەوان سەردانی ئێمەیان كردووە، پەیوەندییەكان بەردەوامن، ئەوەش بۆ ئەوەیە گرووپاتی گەشتیاری زیاتر بهێنن بۆ ناوچەكە.
بارزان محەمەد، بەڕێوەبەری بەڕێوەبەرایەتی گەشتوگوزاری سۆران زیاتر دەڵێ:" نەمانی رسوومات و پارەی ڤیزە لە نێوان ئێران و هەرێمی كوردستان رێژەی گەشتیاران 70% زیادی كردووە و رۆژ بۆ رۆژیش رێژەكە روو لە زیادبوونە".

زۆرترین بینراو