بۆچوونی چین و توێژەكان لە ساڵیادی زاری كرمانجی دا

بۆچوونی چین و توێژەكان لە ساڵیادی زاری كرمانجی دا

راپۆرت محەمەد ئامۆكەیی- سۆران: چواردە ساڵ بەر لە ئەمڕۆ بەهەوڵی ژمارەیەك رۆژنامەوان و رۆشنبیری سۆران و دەوروبەری و بەپالپشتی راستەوخۆی ماددی و مەعنەوی نێچیرڤان بارزانی، ئەو دەزگایە وەك دیاریێك پێشكەش بە سنووری سۆران كرا، سەرەتای دامەزراندنی دەزگا بەشەكانی رادیۆ و هەفتەنامەو كۆوار و ماڵپەڕ، كتێبخانە، تیپی مۆسیقاو، بەشی كۆر ِو سمیناری لە خۆ گرتبوو، زاری كرمانجی هەمیشە لە دیدی خەڵكی ناوچەكەو شوێنەكانی تر بە قوتابخانە سەیركراوە بۆ پێگەیاندنی كادیری راگەیاندن، 14 ساڵی تەمەنی ئەو دەزگایەش پڕبووە لە شانازی و سەروەری، بە دەیان كادیری راگەیاندنی پێگەیاندوە و ئێستا لە كەناڵە هەرە بەناو بانگەكانی كوردستان كاردەكەن، لە سەروو بەندی دروستبوونی قەیرانی دارایی زاری كرمانجی هاوشێوەی هەموو دەزگاو فەرمانگەكانی حكومەت بێ بەش نەبوو لەم قەیرانە، سەرە رای قەیرانی دارایی كارمەندانی نەیان هێشت ئەو دەزگایە بكەوێت و خۆبەخشانە كاریان دەكرد، زاری كرمانجی ئێستاش ئەستێرەیەكی گەشی نێو میدیای كوردییەو بۆتە سەرچاوە بۆ چەندین كەناڵ و سایت، لە بارەی یادی دامەزراندنیدا چین و توێژەكانی دەڤەری سۆران وێڕای پەیامی پیرۆزبای باس لە رۆِل و گرنگی زاری كرمانجیش دەكەن كە لە چواردە ساڵی رابردوو توانیویەتی ببێتە پردی نێوان خەڵك و دەستەڵات.
بیشار رەسول بەرپرسی سەنتەری رۆشنبیری خەلیفان دەڵێت"سەرەتایی دروستبوونی ئەم دەزگایە لە ئان و ساتێكی زۆر پێویست بوو لە دەڤەرەكەمان لەم كاتە هەست بە بوونی بۆشاییەكی رۆشنبیری و هوشیاری زۆر گەورە دەكرا، بۆیە ئەم دەزگایە لەسەر دەستی چەند كەسانێكی رۆژنامەنوس و شاعیر و بەهرەمەند و كەسانی ئەكادیمی دامەزرا"دامەزراندنی ئەم دەزگایە بە هەنگاوێكی ئەرێنی و بە وەرچەرانێكی رۆشنبیری دادەنرێت، چونكە پێكهاتەی ئەم دەزگایە كە لە رادیۆ و رۆژنامەو گۆڤار و هەفتەنامەو كتێبخانەو بوونی سیمینارو كۆڕو پانێل كاریگەری راستەوخۆی هەبوو لەسەر پێشڤەچونی بزاڤی رۆشنبیری و پێگەیاندنی كەسانی ئەكادیمی و هەر لە ڕێگای رادێو و چاپەمەنیەكانی توانیویەتی كێشەو گرفتی هاووڵاتیان بگەینێتە شوێنی مەبەست و چارەسەركردنی كێشەكان"
بیشار ئەوەشی گووت" زاری كرمانجی توانیویەتی پەنچە بخاتە سەر كەم و كوڕییەكان لە هەموو سێكتەرەكانی ناو كۆمەڵگاوە كاركردنیان لەسەر پێگەیاندن یاخود ڕۆلی ئافرەت و كرانەوەی كۆمەڵگا و تێكەل بوون بە جیهانی پێشكەوتوو و شكاندنی تەوقی پیاو سالاری"
بەرپرسی سەنتەری رۆشنبیری خەلیفان ئاماژە بەوەش دەدات"وەك بیسەرو خوێنەر لەم دەزگایە كارەكانیان بەرز رادەگرم سەرەڕای بوونی ئەو قەیرانە داراییەكارمەندە ماندوونەناس و خۆبەخشەكان لە ئەركەكانیان سلیان نەكردوو نەیانهێشت زاری كرمانجی بكەوێت، لەبەر دلسۆزییان بۆ كاری خۆیان و بێبەشنەكردنی چین و توێژەكانی سنووری هەر چوار قەزاكانی سنووری سۆران، بۆیە مانەوە و گرنگی ئەو دەزگایە زۆر پێویستەو دەخوازین گرنگی زیاتری پێ بدرێت.
هەژار عەلی یەكێك لە دەستەی دامەزرێنەری دەزگای زاری كرمانجی و بەرپرسی نوسینگەی كوردستان تیڤی گووتی" وەك بەرێوەبەری پێشوی رادیۆی زاری كرمانجی لە ساڵانی 2005 تاكو 2012 بەپێویستی دەزانم پیرۆزبایی گەرم لە تەواوی ستافی دەزگا بە گشت بەشەكانیەوە بكەم، دەستی ماندووبوونی تێكڕای كارمەندان دەگوشم، ئەوان بە هەموو تاڵی و سوێرییەكان، بەهەموو ئەو قەیرانانەی رووبەروویان بۆتەوە، كۆڵیان نەداو بەردەوام بوون، سڵاو و رێز بۆ كارمەندان و هاوڕێیانی رادیۆ بۆ نووسەران و تێكڕای رۆژنامەنووسانی زاری كرمانجی"
هەژار عەلی لە بارەی گرنگی زاری كرمانجی رای دەگێنێت" دەزگای زاری كرمانجی بۆ ناوچەیەكی وەك دەڤەری سۆران كە هەرچوار قەزای سۆران، چۆمان، رواندزو مێرگەسۆر دەگرێتەوە.زەروورەتێكی گرینگی دەڤەرەكەیە، بەڵام، وەك ئێستا نا! بەڵكو بە شێوازو میكانزمی كاركردنی تر بەتێڕوانینی خۆم شێوازو ئامانج و هەبوونی هۆی تری راگەیاندن لە نێو ئەو دەزگایە بەگرینگ دەزانم لەوانەش كردنەوەی تەلەفزیۆنێكی لۆكاڵی، بەشی هونەرو موزیك، ماڵپەرێكی بەهێز، لەپاڵ هەفتەنامەو رادیۆدا كار بكەن"
ئەو میدیا كارە ئەوەشی خستەڕوو" بۆ سەرخستنی بەشی هەفتەنامە، بەپێویستی دەزانم دەستەی پسپۆری ئەكادیمی و زانستی لە بواری زمانەوانی بۆ (هەڵەچنی و رەوانبێژی) بۆ ئەوەی گرفت لە بواری زمانەوانی نەمێنێت، دابینكردنی تیمی راوێژكاری یاسایی بۆ دەزگاكە، دەستەیەكی كارا لە دەستەی نووسەران پێك بێت و لە لایەنی سەرنووسەرو بەرێوەبەری گشتی دەزگا هەماهەنگی باشیان لەگەڵ ئەو دەستەیە هەبێت، گرینگی بە رادیۆ بدرێت و بەرنامەكانی دەوڵەمەند بكرێن و وەك جاران بیسەر رادیۆ لەباوەش بگرێت، بەشی تەكنیك لە دەزگا زیاد بكرێت و سوود بە هەموو بەشەكان بگەیەنێت.
ئیسماعیل گوندە ژۆری بۆ زاری كرمانجی گووتی"پێگەو كاری دەزگای زاری كرمانجی رۆلێكی گرنگی هەبوو بۆ گەیاندنی ئێش و ئازاری خەڵك بە گوێچكەی لایەنە پەیوەندارەكان، هەمیشە سەكۆیەك بووە بۆ خستنەروو پێشنیار بۆ بەرەوپێشچوونی ناوچەكە لە هەموو رووەكانی خزمەتگوزاری و پەیامی رۆشنبیری و هونەری و كلتورە كۆمەڵایەتییەكان، لەهەمووی گرنگتر دەزگای زاری كرمانجی فێرگەیەك بووە بۆ بەهێزكردن و پێگەیاندنی رۆژنامەنووسان لە دەڤەرەكەو بە رۆشنبیركردن و گەیاندنی فەرهەنگی بەكارهێنەرەكانی تۆڕە كۆمەڵایەتییەكان، هەر بۆیە لە یادی ساڵ ڕۆژی دامەزراندنی ئەو دەزگایە پیرۆزبایی گەرم ئاراستەی بەرپرس و كارمەندانی ئەو دەزگایە دەكەم، هیوادارم لە ئەركە پیرۆزەكانتاندا كۆڵ نەدەن و بەردەوام بن، چونكە ئەو دەزگایە تاكە ئومێدی دەڤەری سۆرانە كە هەموو چینێكی كۆمەڵگا خۆی لێ ببینێتەوە.
چالاكوان و ژینگە پارێز هەژار ئێدلبی گووتی" لە یادی 14ساڵەی دامەزراندنی دەزگای دایك پێویستە زاری كرمانجی لەم چوارچێوەیەی لەسەری دامەزراوە، تەكانێك بدات و خۆی لە قەرەی شتی تر بدات ئەویش كردنەوەی كەناڵێكی تەلەفزیۆنییە، ئینجا ئەگەر ئاسمانی نەبێت، با كەناڵێكی لۆكاڵی گرنگ بێت، كەناڵی ناوەخۆیی هەیە ستۆدیۆكەی لەسەربان و لە ژوورێكی سێ بە چوار بەڕێوەدەبردرێت، چما كارمەندانی ئەم دەزگایە ناتوانن وەك ئەوان بكەن، بۆچی لایەنی پەیوەندیدار بوددجەی تایبەت بۆ ناوچەیەكی دیاریكراو تەرخان بكات بۆ كردنەوەی كەناڵێكی ئاسمانی، سۆران و دەزگای زاری كرمانجی بە شایستە نەزانێت ئەم كارە ئەنجام بدات، لەكاتێكدا تاكە كەناڵ لەم سنوورە نییە خزمەت بە چاند و هونەر و فەرهەنگی ئەم ناوچە فراوانە بكات، لەكاتێكدا زۆربەی ئەو كەسانەی لەم دەزگایە كاریان كردووە ئێستا جێ پەنجەیان دیارە لە كەناڵە بەناوبانگە كوردییەكان و راگەیاندنی كوردیان پێشخستووە"
ئەو ژینگە پارێزە ئەوەشی گووت" زاری كرمانجی هەمەیشە دەرگای بۆ رێكخراوەكانی كۆمەڵگەی مەدەنی والا كردوە هەمووانی كۆ دەكردەوە، تاكە دەزگا بووە كە موڵكی تایبەتی دەڤەرەكە بێت، بەداخەوە ماوەی چەند سالێكە بە هۆی قەیرانی دارایی لە قەیران دایە, بەڵام لە سایەی بەرێوەبەر و كارمەندە ماندونەناسەكانی پێشمەرگە ئاسا نەوەستان و خۆبەخشانە ملیان دایە بەر ئەركەكان بە هەر جۆرێك بێت نەیان هێشت ئەم ماڵە گەوەرەیە لە كاركردن بوەستێت.
جابر برادۆستی مامۆستاو چالاكوان بۆ زاری كرمانجی دەڵێت" لە ساڵیادی دەزگای زاری كرمانجیدا چەپكە گوڵێكی ڕازاوە ئاوێتە لەگەڵ پیرۆزبایەكی گەرم ئاراستەی بەڕێوەبەرو ستافی دەزگای زاری كرمانجی دەكەم، پێم وایە بونی دەزگایەكی وا لە دەڤەری سۆران وەك هەر فەرمانگەیەكی ترە یەكێكە لە پێداویستیە گرنگەكانی سنوورەكە" زاری كرمانجی هەمیشە سەكۆیەك بووە بۆ دەربڕینی دەنگی زوڵم لێكراوان هەمیشە پەنجەی خستۆتە سەر ناعەدالەتی و نادادپەروەریەكانی لەم شارە دەكرێت، بەدەیان نوسەر و ڕوناكبیرو قەڵەم لەدەستی لەخۆ گرتوون و دەستی گرتوون"
ئەو مامۆستایە ئەمەش دەخاتە روو" پێش هەموو شتێك ئەم دەزگایە مەڵبەندێك بووە بۆ پێگەیاندنی دەیان رۆژنامەنوسی ئازاو بوێرو چالاكوانی بەتوانا، ساڵانە چەندین خولی رۆژنامەوانی دەكاتەوە بەخۆڕایی بۆ هاووڵاتیان ئەمە نموونەی دڵسۆزی و خەمخۆری بەڕێوەبەر و ستافەكەیەتی دەیەوێت زۆر ترین كاراكتەری ئازا پێ بگەیەنێت، خۆم یەكێكم لەو كەسانەی سوودمەندبوومە لە خولی ڕۆژنامەوانی، ئێستا من لە ماڵپەڕ و سۆشیال میدیا سەرقاڵی كاری ڕاگەیاندم"
لە بەردەوامی قسەكانی دا جابر داوا دەكات" ئەم دەزگایە زیاتر گرنگی بە ناوچە دوورە دەستەكان بدات شوێنێكی وەك دەڤەری برادۆست و سەنتەری ناحیەی سیدەكان تائێستا بێ بەشن لە پەخشی ڕادیۆ، كە پێشتر پەخشی دەگەیشتە زۆرێك لە شوێنەكان، لە دوای قەیرانەوە تا ئێستا هەفتەنامەی زاری كرمانجیم لە نێو شارۆچكەی سیدەكان نەبینیوە پێویستە كۆنتاك لەگەڵ پەڕاوگەكانی سیدەكانیش هەبێت و لەكاتی داواكردنی لەلایەن خەڵكەوە بڵاو كراوەكەیان دەست بكەوێت.

زۆرترین بینراو