بیرەوەرییەكانی شەهیدی زیندوو (شەمسەدین حسێن سپینداری)

بیرەوەرییەكانی شەهیدی زیندوو (شەمسەدین حسێن سپینداری)

بەرەڤان شاكر سلێمان لاچ- سۆران: شەمسەدین حسێن عومەر، لە ساڵی 1945 لە گوندی سپیندارێ لەدایك بووە، ئەگەرچی ئەو لاوێكی خوێنگەرم بووە، بەڵام دوای دەستپێكردنی شۆرەشی ئەیلوول ئەو دەبێتە پێشمەرگە، ئەو 51 ساڵ پێشمەرگەبووە و پێنج جار برینداربووە، ئەمە جگەلەوەی ماوەیەكی زۆر زیندانی كراوە و كچێكی ئەو شەهیدبووە.
سەبارەت بە شۆرەشی ئەیلوول مام شەمسەدین گووتی: دوای ئەوەی بارزانی نەمر لە سۆڤیەت گەرٍِایەوە، بارودۆخی ئێمە زۆر خۆشتر بوو، حكومەت هەوڵیدا ئاوەدانكردنەوە و قوتابخانە بێنێتە ئەو ناوچە و گوندانەی كەوا خەڵك تێیدا دەژیان، بەڵام كاتێك حكومەت بەڵێنەكانی خۆی شكاند و داواكاریەكانی گەلی كوردستانی جێبەجێَنەكر، بارزانی نەمر گەڕایەوە بۆ كوردستان و هاتە خزمەت شێخ ئەحمەد بارزانی، شێخ ئەحمەد فەرمانی بە بارزانی نەمردا خۆی و پێشمەرگەكانی بچنە دەرەوەی گوندەكان، بۆ ئەوەی حكومەتی عێراق گرفت بۆ خەڵكی گوندەكان دروست نەكات.
ئەو كات ئامرازەكانی گەیاندن وا پێشكەوتوو نەبوون، بەڵام لە هەر ناوچەیەك چەند كەسێك هاتن و خەڵكی گوندەكانی ئاگاداردەكردەوە لەوەی بارزانی نەمر بڕیاری داوە شۆرەش دەستپێدەكاتەوە.
ئەو كات چەك زۆر كەم بوون، بەڵام بەر لە دەستپێكردنی شۆرەش، عەبدولكەریم قاسم نزیكەی پێنج سەد بڕنۆی ئینگلیزی بۆ شێخ ئەحمەد ناردن، ئەمەش بۆ ئەوەی پارێزاگاری لە خۆیان بكەن.
سەرەتا شۆرەش ئەو چەكەی بەسەر ئەو كەسانەدا دابەشكرد كە چووبوونە سۆڤیەت، یا ئەوانەی پێشتر پێشمەرگەبوون، ئەو كات بیرم دێت بارزانی نەمر چەكێكی چیكی كڕی و دایە شەهید( سلێمان لاچ), هەڵبەت ئەمەش لە هەمبەر ئازایەتی ئەو.
دواتر بارزانی نەمر هەندێك چەكی كڕی، داواشی لە خەڵكی كوردستان كرد ئەوانەی لە توانایاندایە چەك بكڕن و بیدەن بە پێشمەرگە، بیرم دێت باوكم حەوت بڕنۆی كڕین و پێشكەشی شۆڕەشی كردن.
سەبارەت بەوەی چۆن پێشمەرگەكان دابەشكران و بەسەر چەند ناوچەدا دابەشكران، مام شەمسەدین گووتی: من لای عەلی خەلیل بوومە پێشمەرگە، دواتر لەگەڵ بارزان نەمر چووینە دەڤەری بادینان و لەوێ جێگیر كراین، ئەو كات حسۆ میرخان كرایە فەرماندەی ناوچەی شێخان، عەبدولرەحیم جەسیم كرایە فەرماندەی ناوچەی سوورچیایەتی بادینان، ئەسعەد خۆشەڤی كرایە فەرماندەی دەڤەری بادینان و عەلی خەلیل كرایە فەرماندەی دەڤەری بەرواریان و عیسێ سوار كرایە فەرماندەی دەڤەری زاخۆ.
بارزانی خۆی، سەردانی هەموو دەڤەرەكانی دەكرد، ئەو كات شۆرەش لەرووی ئابووریەوە زۆر لاوازبوو، بەڵام تا دەهات خەڵكی ناوچە و دەڤەرەكان پەیوەندی بە شۆرەشەوە دەكرد، خەڵك تێكرا هاوكاری ماددی شۆرەشیان دەكرد، ئەمەش وایكرد بارودۆخی شۆرەش باشتربێت.
مام شەمسەدین بەردەوام بوو و گووتی: ئێمە ماوەی زۆر لە ماڵەوە دووردەكەوتینەوە، بەڵام دڵمان زۆر بە شۆرەش خۆشبوو، كاتێك بارزانی نەمر ناوچەی بادینانی رێكخست، خۆی سەردانی دەڤەری رانیەو پێنجوین و سلێمانی كرد، ئەو كات من لەگەڵ 16 پێشمەرگە لەگەڵ عیسێ سوار بووین، لەگەڵ بارزانی نەمر چووین بۆ دەڤەری پشتدەر، لە سرێشمێوە خۆمان گەیاندە دۆڵی ئاڵانێ، لەوێ بەرێكەوتین بۆ دەڤەری پشتدەر، نزیكەی 7 شەو و رۆش بە رێگاوەبووین، بارزانی خۆی یاوەرمان بوو. دەڤەری پشتدەر دەشتێكی فراوان بوو، خەڵكی دەڤەرەكە هاتنە خزمەت بارزانی نەمر و داوایانكرد بارزانی نەمر رەزامەندی بفەرمووت بۆ ئەوەی خەڵكی ئەو دەڤەرە هاوكاری ماددی شۆرەش بكەن، نزیكەی حەوت مانگ لە پشتدەر ماینەوە.
دواتر بەرێكەوتین بۆ رانیە، ئەو كات بارزانی نەمر بارەگای مەكتەب سیاسی لە رانیە دامەزراند، ماوەیەكی زۆر لەوێ ماینەوە، دواتر لەگەڵ عیسێ سوار گەڕاینەوە بۆ دەڤەری بادینان.
سەبارەت دەستگیركردنی ، شەمسەدین گووتی: جارێك نامەیەك لە ئەسعەد خۆشەڤییەوە پێم گەیشت، كەوا ئاماژەی بەوە كردبوو، كەوا رێكسختنی نەهێنی لە گوندەكان دروست بكەین، من كرام بە بەرپرسی شانە و نامە و راسپاردەكانم بەجێدەگەیاند، جارێكیان بەیانی لە خەو هەستام بینیم حكومەت دەوری ماڵی ئێمەی داوە و هەموو هاوڕیەكانی منیان گرتوون، بینیم ژمارەیەكی زۆری سەرباز لەناو گوند بڵاوەیان پێكراوە، دۆشكەیەكیان لە بەردەم ماڵی ئێمەیان دانابوو، ئەگەرچی دەرفەتی هەڵاتنم تا رادەیەك هەبوو، بەڵام كە بینیم هاورێیەكانم دەستگیركراون، منیش خۆم رادەستكرد و ئێمەیان گواستەوە بۆ مێرگەسۆر، ئەو كات زۆر ئەشكەنجەدرام و ماوەیەكی زۆر زیندانی كرام، بەڵام نە من نە هاورێیەكانم هیچ شتێكمان باس نەكرد. ئەو كات ئەگەرچی حەسەن جانگیر پەیوەندی بەهێزی لەگەڵ حكومەت هەبوو، بەڵام بەردەوام هاوكاری پێشمەرگەی دەدا، كاتێك من دەستگیركرام لەگەڵ كۆمەڵێك ریش سپی هات، داوایان لە فەرماندەی فەیلەق كرد تا ئازادبكرێین، دواتر باش بوو لەو ئازار و ئەشكەنجە رزگاركراین و گەڕاینەوە.
مام شەمسەدین بەردەوام بوو و گووتی: لە لای میحوەری عەلیێ خەلیل، حكومەت هاتە پێش، مەحمود ئاغای چەمانكی داوای لە عەلی خەلیل كرد بۆ ئەوەی هێزێكی بۆ بنێرێت، ئێمە بەرێكەوتین بۆ لایان، تا گەیشتینە لایان ژمارەمان بۆە نزیكەی 60 بۆ 70 پێشمەرگەیەك، لەوێ شەڕ دەستپێكرد، حكومەت بە تۆپ و چەكی قۆرس هێرشی هێنا سەر ئێمە، بەڵام توانیمان بەرپەرچیان بدەینەوە، ئەو كات تۆپێك هات و كەوتە نزیك ئێمە، پێشمەرگەیەك شەهید بوو و منیش چەند ساچمەیەك بەر سینگم كەوت و گوێیەكانیشم تەقین، بەڵام لەو شەڕەدا زیانی زۆر بەر دوژمن كەوتن، ژمارەیەكی زۆری چەك و فیشەك كەوتنە دەست پێشمەرگە، من و بریندارەكان گوازراینەوە بۆ لای دكتۆری شۆرەش.
مام شەمسەدین گووتی: گێرانەوەی بیرەوەریەكانی شۆرەش وام لێدەكات بە هەمان توانا و هێزی جاران بەرگری لەو وڵاتە بكەم، ئەگەرچی شۆرەشەكەمان زۆر هەژاربوو، بەڵام دڵمان پێی خۆش بوو، كاتێكیش شۆرەش تۆشی نسكو هات، هەموومان تێكرا غەمگین بووین، نامەوێت بیرەوەریەكانی سەردەمی نسكو بینەو یاد، بەڵام تەنها دەڵێم رووی ئەوانە رەش بێت كەوا بۆنە هۆكاری نسكوی شۆرەشەكەمان.
سەبارەت بە ژیانی دوای سنكوی شۆرەش مام شەمسەدین گووتی: ئێمە بەنەچاری خۆمان گەیاندە رۆژهەڵاتی كوردستان و لە ئۆردوگای زێوە نیشتەجێ بووین، بەڵام حكومەتی عێراق لەوێش بەدوامانەوە بوو، تا كار گەیشتە ئەوەی بۆردومانی ئوردۆگای كرد و بە سەدان منداڵ و بیر و گەنجی كورد بوونە قوربانی، ئەو كات كچێكی من شەهیدبوو، بەڵام خۆم سەڵامەت دەرچووم.
شایەنی ئاماژەپێدانە شەمسەدین حسێن، یەك لەو پێشمەرگانەبوویە كەوا لە شۆرەشی ئەیلوول چەكی هەڵگرتووە، بە هەمان هێزی شۆرەشی ئەیلوول لە شۆرەشی گوڵاندا بەشداربووە، لە رۆژەڵات بۆبێت یا لە باشوور هیچ كات سڵی لە خزمەتكردن نەكردووە، كاتێكیش بڕیاردەدەرێت بۆ دەستپێكردنی راپەڕین، شەمسەدین حسێن لەگەڵ سەرۆك بارزانی دەگەرێتەوە بۆ باشووری كوردستان.
شەمسەدین حسێن، پێنج جار برینداربووە، ئەمە جگە لەوەی كچێكی ئەو شەهیدبووە و بە دەیان جار ماڵ وێران بووە، لە هەمبەر ئەو خەبات و ماندووبوونەی ئەو، لە ساڵی 2005 بە فەرمانی سەرۆك بارزانی دەكرێتە شەهیدی زیندوو.
لە كۆتایدا گووتی: زۆر دڵ خۆش و سەربەرزم كەوا توانیومە خزمەت بە گەل و نیشتیمانی خۆم بكەم، هیوام وایە رێز لە خەبات و ماندووبوونی ئەوانە بگیرێت كەوا ماندووبوونە و قوربانییان لە پێناو ئەم گەلە داوە، وا بەرەو ساڵیادی ریفراندۆم دەچین و زۆر دڵ خۆشبووم كەوا یەكێًك بووم لەو ملیون كوردانەی دەنگم بە سەربەخۆی كوردستان دا، هیوام وایە لەو تەمەنی ماومە بتوانم دەوڵەتی سەربەخۆی كوردستان ببینم و موژدەی سەربەخۆی كوردستان بگەینمە شەهیدانی رێگای رزگاری كوردستان.

 

زۆرترین بینراو