بینای پزیشكی زبڵدان

بینای پزیشكی زبڵدان

ئا/ رۆژان قیاس خەلیل.


ئەوەی دەبینن شوێنی فرێ دانی پاشماوەی زبل و خاشاكی قەزای سۆران نییە، كە رۆژانە زبڵی گەڕەكەكان لێی كۆ بكرێتەوە، ئێرە بەردەم هیچ ماركێتێك و دوكانێكی ناو بازاڕ نییە، چونكە ئەگەر بەردەم دوكانی كاسبكارێكی بێ دەسەڵات بایە، لە مێژ بوو شارەوانییەكەمان فەرمانەكانی خۆی سەپاندبوو، و لە كەناڵەكاندا بڵاویان دەكردەوە ( لە هەڵمەتێكی ژینگە پارێزیدا چەند دوكانێك داخران).
ئەوەی دەبینن تەنیشت بینایەكی پزیشكی شەقامی گشتی قەزاكەمانە، لەنێو ئەم بینایە نزیكەی (15) نۆرینگەی پزیشكی پسپۆڕ و تاقیگە و دەرمانخانە هەیە، رۆژانە چەندین نەخۆش و ئافرەتی دوو گیان و منداڵ سەردانی ئەم پزیشكانە دەكەن، رەنگە داهاتی رۆژانەی پزیشكانی ئەم بینایە زیاتر بێت لە مووچەی چەند خێزانێكی ئەم دەڤەرەی خۆمان، بەڵام تا ئێستا تەنەكەی زبڵیان نییە، كە نرخی دوو بلیتی نۆرینگەكەیانە، بۆ ئەوەی ئەو خەرجییەیان لەسەر نەكەوێ، خانویەكی وێڕانی تەنیشتە خۆیان كردۆتە شوێنی فرێ دانی پاشماوەكانیان، گومان لەوەدا نییە هەریەك لەم پزیشكانە زۆر باش زانیاریان هەیە لەبارەی زیانەكانی ژینگەی پیس، بۆ مرۆڤ و منداڵ و بە تایبەت ئافرەتی دوگیان كە رۆژانە زیاتر لە (50) ئافرەتی دوو گیان سەردانیان دەكەن، ئەگەر هەست نەكردن بە بەرپرسیارییەت لە ئاست نەخۆشەكان بابەتێكی هەستیاربێتن كە ئەو پزیشكانە رەچاوی ناكەن، بەڵام بێ دەنگی لایەنە پەیوەندیدارەكان بە تایبەتی شارەوانی جێگەی تێرامان و پرسیارە.
رەنگە هۆكاری ئەمەش بگەڕێتەوە بۆ ئەوەی لەم وڵاتە تەنها هەژارەكان دەبێ پابەندی هەموو یاسا و رێنماییەكان بن.

 

 

 

 

 

زۆرترین بینراو