بێدار لەزگین: كار بۆ گەڕاندنەوەی یانەی وەرزشی دینارتە دەكەین

بێدار لەزگین: كار بۆ گەڕاندنەوەی یانەی وەرزشی دینارتە دەكەین

رەمەزان هەڕنی– دینارتە: یانەی وەرزشی دینارتە ساڵی 1996 دامەزرابوو لەو ماوەیە لە چەندین یاری جۆراو جۆر بەشداری خولەكانی كوردستان دەكرد, توانیبووی چەندین قۆناغ ببرێت و لەم دوایەشدا دینارتە ژمارەی پێوایەنی تۆماركرد كە ژمارەی هاندەرانی لە یاری بالە نزیك بوو لە 7 هەزار هاندەر ئەمەش یەكەمجارە لەسەر ئاستی كوردستان, لە ئێستادا كار بۆ گەڕاندنەوەی تاكە یانەی وەرزشی دینارتە دەكرێت لەلایەن وەرزشوان و خەڵكی ناوچەكەو دەست بە نۆژەنكردنەوەی یاریگەی خۆی كردووە.
بێدار لەزگین، سەرپەرشتی دۆسیەی گەڕانەوەی یانەی وەرزشی دینارتە بە زاری كرمانجی راگەیاند" یانەی وەرزشی دینارتە بە شێوەیەكی فەرمی ساڵی 1996 دامەزرا, لەو ماوەیەی كە یانەی دینارتە كارابوو بەشداری چەندین خولی كردووەو لە زۆربەی یارییەكان چالاكی هەبوو, بەڵام بە بڕیارێك ساڵی 2008 راگیرا بە بیانووی ئەوەی نابێت ناحیە یانەی هەبێت, ئەوەبوو لە لیژنەی باڵای وەرزشی دهۆك و وەزارەتی رۆشنبیری و لاوان ئەو كات بڕیاری راگرتنی یانەی دینارتە دەركرا, گوایە یاریگەی نیەو بارەگای یانەشی نیە، بەڵام بەپێی بەدواداچوونمان تا ئێستا ناوی یانەی دینارتە لە وەزارەت بە تۆماركراوی ماوە, ئەو كاتەی یانەی دینارتە راگیرا یانەی كاروان لە سەنتەری دهۆك راگیرا".
گووتیشی" یانەی دینارتە لە ماوەی دامەزراندنی خۆی تا ساڵی راگیرانی زۆر لە یاریزانەكانمان لە یاری تێنس لە خولی نایابی كوردستان یارییان دەكرد, لە تۆپی پێ‌ پلە یەكی كوردستان بووین, بەهەمان شێوە تۆپی بالە پلە یەك بووین, لە تۆپی دەست گەیشتە پلە یەك بەڵام هیچ پاڵپشتیەكی دارایی نەبوو لە خولەكە كشایەوە, لە یاری بلیارد بەشداری خولی نایابی كوردستانی كرد و سێ‌ یاریزانمان لە خولی نایابی عیراق بەشداربوون، كاتێك هەڵسەنگاندن كرا لەسەر ئاستی دهۆك یانەیەك بچێتە خولی پلە یەك ئەوە ئێمە بووین".
ئاماژەی بەوەشكرد" 3 جار سەردانی وەزارەتی رۆشنبیری و لاوانم كردووە بۆ بابەتی گەڕانەوەی یانەی وەرزشی دینارتە, بەڵام هەوڵەكانمان بێ‌ سوود بوون و وەك ئاگاداریشین سەرەرای ئەمە لەم ماوەیە وەزارەتی رۆشنبیری مۆڵەتی دامەزراندنی بە یانەك داوە كە ناحیە نیەو گەرەكێكە لە دهۆك، یانەی دینارتەش بەبیانووی ئەوەی ناحیەیە نابێ یانەی هەبێت و ماوەی راگیراوە چەندین ساڵە.
ئەوەشی خستەڕوو" بە هەوڵ و كۆشش و یارمەتی كەسانی خێرخواز دەستمان بە نوژەنكردنەوەی یاریگەی وەرزشی یانەی دینارتە كردووەو قوناغی باشمان بڕیوە, یاریگەكە بە شێوەیەكی ستانداردو ئەندازەیی بەپێی رێنمایەكانی حكومەت چیمەنی دەستكردی بۆ دەكرێ بڕی 15 ملیۆن دیناری بۆ تەرخانكراوە لەگەڵ سیستەمی ئاوی ناو یاریگە".
روونیكردەوە" وەك خۆبەخشێك بەردەوام دەبم بۆ گەڕاندنەوەی یانەی وەرزشی دینارتە بەهۆی ئەوەی پێویستیەكی سەرەكی گەنجان و وەرزشوانانی ناوچەكەیە كە 86 گوندو ئاوەدانی بەسەرەوەیە, بەهۆی نەمانی یانەكە زۆربەی یاریزانەكانمان روویان كردە یانەكانی هەڵۆ, ئاكرێ و بەردەڕەش و یانەكانی دیكەی كوردستان, ئەوەی دەیكەم خزمەتێكە بە دەڤەری دینارتەو هیچ تموحێكم ببم بەسەرۆكی یانە, بەڵكو بۆ خزمەتكردنی گەنجانی شارەكەو وەرزشە, جێی داخە كۆمەڵە گەنجێكی بەهرەمەندو بەتوانا لە ناوچەیەكی بەرفراوان خاوەنی یانەیەكی وەرزشی نەبن و لە ئەنجامی بێ شوێنی كارو چالاكییەكانیان پێ بەڕێوەنەچێ".
لە كۆتایی گووتی" كۆڵ نادەین و لە دەرگەی هەموو بەرپرسێك دەدەین بۆ گەڕانەوەی یانەی وەرزشی دینارتە, ماوەی چەند ساڵێكە بەردەوام لە دینارتە خولێكی بالە بۆ تیپە بەشداربووەكانی ناوچەكە دەكرێتەوەو جەماوەرێكی یەكجار زۆر ئامادەی یارییەكان دەبن, ئەمە خۆی لە خۆیدا خۆشەویستیە بۆ وەرزش بە گشتی و تۆپی بالە بە تایبەتی, ئەگینا بەراورد بە شارەكانی دیكەی كوردستان 7 هەزار بینەر لە بینینی یاریێكی تۆپی بالە جێی خۆشحاڵیەو دەریدەخات كە ناحیەی دینارتەو دەوروبەری شایانی گەڕاندنەوەی یانەكەیانن, سوپاس و دەستخۆشیمان بۆ هەموو ئەوانەی یارمەتیان داوین لە نۆژەنكردنەوەو هەوڵەكانی گەڕاندنەوەی یانەی وەرزشی دینارتە".

بابەتى پەیوەندیدار وەرزشى

زۆرترین بینراو