بەرگری شارستانی هۆشداری دەداتە هاووڵاتییان

بەرگری شارستانی هۆشداری دەداتە هاووڵاتییان

زاری كرمانجی-سۆران: بەڕێوەبەری بەرگری شارستانی سۆران، رێنمایی دەداتە هاووڵاتییان، تا لە وەرزی زستاندا هۆشیار بن لەكاتی بەكارهێنانی ئامێرەكانی گەرم كەرەوەو لەكاتی دەرچوونیان لە ماڵ سۆپا و گەرم كەرەوەكانیان بكوژێنەوە.
عەمید عیماد كەنعان، بە زاری كرمانجی راگەیاند " بەشێك لە هاووڵاتییانی دەڤەرەكە كەمتەرخەمن لە نەكووژاندنەوەی ئامێرە كارەباییەكانی ماڵەكانیان، بەمەش تەنها لەماوەی رابردوو بەهۆی بەریەك كەوتنی هێلەكانی كارەباوە ئاگر لە چەند ماڵێك كەوتۆتەوەو زیانی ماددیان بەركەوتووە، بەتایبەتیش ساڵانە لەگەڵ هاتنی وەرزی سەرما هەندێك لە هاووڵاتییان سۆپاو ئامێری گەرم كەرەوەی كارەبایی بەكار دەهێنن، زۆرجار بەهۆی بێباكی دەبێتە هۆی ئاگر كەوتنەوە، پێویستە هاووڵاتییان ئەم بابەتە بە هەند وەربگرن و دڵنیا بن لەوەی ئەو سۆپایەی بەكاری دەهێنن خاوەن مەرجەكانی تایبەتمەند بێت تا نەبێتە هۆی ئاگر كەوتنەوە، هەروەها پێویستە هاووڵاتییان لەكاتی چوونە دەرەوەیان لە ماڵەكانیان، ئامێرە كارەباییەكانی ماڵەكەیان بكوژێننەوە لە پێناو سەلامەتی و پاراستنی ماڵەكانیان و دەورووبەریان".
بەڕێوەبەری بەرگری شارستانی سۆران، گووتیشی" پێویستە لە هەموو ماڵ و شوێنێك ئامێری كوژاندنەوەی ئاگر هەبێت، زۆرجار لەكاتی هەڵگیرسانی ئاگرێكی بچووك تا تیمەكانی بەرگری شارستانی بە شوێنەكە دەگەن، ئاگرەكە گەورە دەبێت و زیانی زۆر بەدوای خۆیەوە دەهێنێت، لەكاتی هەڵگیرسانی ئاگرەكە ئەگەر ئامێرێكی بچوكی ئاگر كوژێنەوە لەماڵەكە هەبێت، یا سیستەمێكی كۆنتڕۆڵكردنی ئاگر هەبێت، رەنگە خاوەنەكەی بتوانێت بە زووترین كات كۆنتڕۆڵی بكات، بەڵام بەداخەوە زۆر كەس بێباكە لەم رووەوە نەك تەنها ماڵ و باڵەخانەكان، بەڵكو زۆر جار ئاگر لە ئۆتۆمبێلێك یا ئامێرێك كەوتۆتەوە خاوەنەكەی ئامێری ئاگر كوژێنەوەی پێ نەبووە، دواجار خۆی باجی قوورسی داوە".

 

زۆرترین بینراو