بەشێك لە دانیشتوانی باتاس، ئاوە ڕۆیەكان  پڕدەكەن لە زبڵ و پاشماوەكان

بەشێك لە دانیشتوانی باتاس، ئاوە ڕۆیەكان پڕدەكەن لە زبڵ و پاشماوەكان

راپۆرت محەمەد ئامۆكەیی- هەریر: یەكێك لەو گرفتانەی ئێستا رووبەڕوی باشوری كوردستان بۆتەوە پیسبونی ژینگەو فڕێدانی پاشماوەكانەیەتی لە لایەن خەڵكەوە، لە شارەدێی باتاس ئەو دیاردەیە بوونی هەیەو بەشێك لە هاووڵاتیان گلەی ئەوە دەكەن چەند ماڵێك پاشماوەكانیان فڕێ دەدەنە نێو جۆگەكانی ئاودێری كە لە دەشتی هەریر چەند بەروبومێكی كشتوكالی بەهۆی بوونی ئەو ئاوە دەچێرێت، زاری كرمانجی لەسەر ئەم دیاردەیە بۆچوونی هاونیشتیمانیان و لایەنی پەیوەندی داری وەرگرتوە.
مامۆستا موشیر دانیشتوی باتاسە دەڵێت" یەكێك لە دیاردە هەرە ناشرینەكان فڕێدان و پیسكردنی ژینگەیە بۆ ئەوەی خەڵكی زیاتر وشیار بێتەوە تەنها لە رێگەی مامۆستایانی ئاینی ئەو كارە دەكرێت، لای هەمومان ئاشكرایە مامۆستایانی ئایینی باتاسیش باسی هەموو شتێك دەكەن كە پەیوەندی ڕاستەوخۆی هەیە بەژیانی مرۆڤەوە، پێشنیاری من بۆ مامۆستاین ئەوەیە باس لەپاراستنی ژینگە بكەن، بەڵام نەك بەشێوە گشتیەكە بەڵكو باسی ژینگەو كوچەو كۆلانەكانی باتاس بكەن، كە خەریكە دیاردەیەكی زۆرناشارستانی دەبینرێ بەهۆی كەمتەرخەمی و ناڕۆشنبیری ئێمەوە، چونكە هیچ كۆمەڵگەیەكی ڕۆشنبیرو تێگەیشتوو بە شێوان و تێكچون و سەرهەلدانی دیاردەی نەخوازراو ناشیرن لە شارو شارۆچكەكەیان رازی نابن و كاردەكەن بۆ نەهێشتنی".
ئەو مامۆستیایە ئاماژەی بۆ ئەوەشكرد" رووی دەمم دەكەمە ئەو مامۆستا ئاینیانە بۆ وشیاری زیاتری خەڵك كار بكەن لەبەر ئەوەی لە كۆمەڵگەی ئێمەدا كەس بەقەد ماموستای ئایینی قسەی لێوەرناگیرێت، بەجۆرێك لەیەك كاتدا پیاو و ژن و گەنج و پیر هەموو گوێی لێدەبێ و كاتێك لەگەڵ دەقی ئاینی تێكەڵ دەكرێ زیاتر كاریگەر دەبێ، بەڵام كاتێك باسی ژینگە دەكرێت خەڵك بە دارستان و شوێنی گەشتیاری و پیسبونی ژینگە تێدەگات و لەبیری خۆی دەڵێ چەندینجار گوێمان لێبووە و تاقەتی گوێگرتنی نابێ".
موشیر زیاتر دەشڵێت" ئەوەی من دەمەوێ باسی لێوەبكەم و بڵێم ژینگەی ماڵ و گەڕەكەكانی باتاسە ئەویش فڕێدانی زبڵ و خاشاكی ماڵان و دوكانەكانە لەناو جوگە ئاوەكانی هەنارەو سۆرەدو باتاسی كۆن و جۆگەلەی پێش مزگەوتی بەهەشت، دیاردەیەكی زۆر ناشیرینە ماڵ و دوكانەكانە كاغەز و بەرگی چپس و بتڵی ئاو و بیپسی و پەڕی مریشك و ڕێخۆڵەی ئاژەڵ و تەنانەت ئاژەڵی مرداربوو دەخەنە ناو جۆگەلەكان بێ ئەوەی بیرلەوە بكەنەوە، ئەوشتانە چەند زیانی بۆ ژینگە هەیە دوو ئەوەندەش ناشیرینە، كە لە ژێر پردێك یان لە بۆڕیەك گیردەبێ هەمووی دێتە سەرشەقامەكان و بەردەركی ماڵان كە ئەمەش گوناح و ئازاردانی خەڵكە هەم لەڕووی دەرونی هەم لەڕوی جەستەوە و هەم بۆنی ناخۆشەو دیاردەیەكی قێزەون و ناشیرینە كەواتا مادام پاك ڕاگرتنی ژینگە ئەرك و ئەخلاقە و خێرە پیسكردن و ئازاردانی خەڵكیش گوناح و تاوانە، بۆیە داوا دەكەین لە ووتاری هەینی باس لەو دیاردەیە بكەن، با ماڵ و دوكانەكان چیتر زبڵ و پاشماوەكانیان فڕێنەدەنە ناو جۆگەكان بابیخەنە حاویەی زبڵ ئەگەر حاویەش نەبێ ئەوا عەلاگە زۆرە و دەبێتە ئاسانكاریش بۆ پیاوانی ژینگە پارێزو پاكەوانەكانیش هیندە ماندوو نابن و باڕێز لەماندوو بونیان بگرین، چونكە فڕێدانی هەرشتێك لەماڵەوە بێت یان لە دەرەوە دەبێ كەسێك پشتی بچەمێنێتەوە تا هەڵی دەگرێتەوە جا ئەوكەسە لەوانەیە دایكمان بێ یان باوك یان كەسێكی پیرو بەساڵاچوو .
لای خۆشیەوە زاهیر بناوی سەرۆكی شارەوانی باسرمە، بە زاری كرمانحی راگەیاند" جێگای نیگەرانیە هاووڵاتیان وەك پێویست گرنگی بە ژینگە پارێزی نادەن، ئەگەر چی هەموو رۆژێكیش كارمەندانی شارەوانی سەردانی گەڕەكەكان دەكەن بەمەبەستی كۆكردنەوەی پاشماوەكان، ئەوەی لە باتاسیش بەدی دەكرێت بەداخەوە هەندێ لە ماڵەكان پاشماوەكان دەخزێنە نێو جۆگەكانی ئاودێری، ئێمە ناتوانین سزای ئەو كەسانە بدەین بەڵكو لە رێگەی مامۆستایانی ئاینی و موختارەكان خەڵكی ئاگادار بكرێتەوە كە واز لەو دیاردە ناشرینە بێنن."
سەرۆكی شارەوانی هەریر، ئاماژەی بەوەشدا" خەڵكی گلەی لەوەدەكەن كە ئۆتۆمبێلەكانی شارەوانی وەك پێویست نین من لەوان دەپرسم كام رۆژ هەیە ئۆتۆمبێلی شارەوانی نە چبێتە گەڕەكەكان، هەر كاتێكیش كەمتەرخەمی هەبوبێت ئێمە سزای كۆمپانیان داوە.

زۆرترین بینراو