بەهۆی بێ بازاڕی بەرهەمە ناوخۆییەكان كەمتر گرنگییان پێدەدرێ

بەهۆی بێ بازاڕی بەرهەمە ناوخۆییەكان كەمتر گرنگییان پێدەدرێ

رەمەزان هەرنی – بلێ : لە سنووری هۆبەی كشتوكاڵی بلێ لە سنووری قەزای مێرگەسۆر 66 خانووی پلاستیكی و 79 كێڵگەی بەخێوكردنی مریشك هەن. دەشڵێ، بەهۆی بێ بازاڕی بەرهەمە ناوخۆییەكان كەمتر گرنگی بە بەرهەمە كشتوكاڵییەكان دەدرێت.
ئەمیر مستەفا، بەڕێوەبەری هۆبەی كشتوكاڵی بلێ بە زاری كرمانجی گووت:" لە سنووری هۆبەی كشتوكاڵی بلێ ژمارەیەك زەوی و دەشتایی كشتوكاڵی بوونیان هەیە، بەڵام كەم بەكاردێنن بۆ كاری كشتوكاڵ و ئاودێری، بەهۆی ئەوەی ئەو بەرهەمانەی دێنە بازاڕ زۆر گرانتر لەسەر جووتیاران دەوەستن، بۆیە جووتیاری خۆمان زۆر گرنگی بە كەرتی كشتوكاڵی نادەن، ئەگەر گرنگی بە بەرهەمی خۆماڵی بدرێت و یارمەتی جووتیارانیش بدرێت ئەوە بەرهەمی خۆماڵی زیاتر گەشە دەكات و لە جیاتی زیان گەیشتن بە جووتیاران سوود دەكەن، بەڵام بەو پێیەی تا ئێستا سوودیان نەكردووە لە كەرتی كشتوكاڵی دووركەوتوونەتەوە".
ئەمیر ئەوەشی گووت" لە سنووری هۆبەكەمان 66 خانووی پلاستیكی هەن كە جووتیاران وەرزانە و ساڵانە بەرهەمەكانی خۆیان لەناودا دەچێنن و بەرهەمەكەشیان باشە، بەڵام بۆ فرۆشتن نییە، تەنها پێداویستیسەكانی رۆژانەی خۆیان پڕدەكەنەوە، وەكو خەیار، لۆبیە، سەوزە، بەقل، لەگەڵ چەند بەرووبوومێكی دیكە، بەڵام بە زۆری خەیار دەچێنن، لبەر ئەوەی ئاسانترە بەرهەمەكەشی دیارە، بۆیە زیاتر جووتیاران لەناو خانووە پلاستییكەكاندا گرنگی بە بەرهەمی خەیار دەدەن".
بەڕێوەبەری هۆبەی كشتوكاڵی بلێ ئاماژەی بەوەشكرد" بەدەر لە خانووی پلاستیكی لە سنووری هۆبەكەمان 79 كێڵگەی بەخێوكردنی مریشك هەن، كە 16 كێڵگە تا ئێستا بێ مۆڵەتن، ئەو كێڵگانەی كە بێ موڵەتن 84 هەزارو 300 جووجەلە بەرهەمیانە، لە بەرامبەردا 66 كێڵگە مۆڵەتیان هەیە، 448 هەزار و 250 جووجەلە بەرهەمی ئەو كێڵگانەیە".
ئەمیر، جەخی لەوەشكردەوە" پێشتر بەرێگای رێكخراوی فاوی نێودەوڵەتی یارمەتی لەسەر خاوەن خانووە پلاستیكەكان دابەشدەكران، ئاوی زۆرمان هەیە پێویستە حكوومەت كار ئاسانیان بۆ بكات، لە دەشتەكانی بلێ و شرێ و باڵندا حكوومەت بەنداوی خۆل و كەناڵی ئاوی دروست بكات، بۆ ئەوەی ئاو بەسەر زەوییە كشتوكاڵییەكان دابەش بكرێت، بێ ئەوەی جووتیار خەرجی لە راكێشانی ئاو بكات زەویەكەی ئاودێر بكات، خەرجییەكانی كشتوكاڵ زیاترە لە سوودەكانی بۆیە جووتیار كەمتر گرنگی پێ دەدات".
ئەمیر، زیاتر گووتی " لە سنوورەكەمان چوار پڕۆژەی بەخێو كردنی ماسی هەن، تەنها یەك پڕۆژە موڵەتی هەیە و سێ پڕۆژەی تر بێ موڵەتن و ئەمساڵ پەنجە ماسیمان بەسەر خاوەن پرۆژەكان دابەشكردووە، بۆ ئەوەی گرنگی بە بەرهەمی ماسی بدرێت لە دەڤەركە، بەڵام پێویستە ئەو مەرجانەی لە دەشتی هەولێر جێبەجێ دەكرێن لە ناوچەكەمان گۆڕانكاری تێدا بكرێت، بۆیە هەموو پرۆژەكان ناتوانن موڵەت وەربگرن".

زۆرترین بینراو