بەهۆی بێ نازیەوە پاركی بولبول دەدرێتە كەرتی تایبەت

بەهۆی بێ نازیەوە پاركی بولبول دەدرێتە كەرتی تایبەت

محەمەد ئامۆكەیی- سۆران: پاركی بولبول لەنێو سەنتەری شاری سۆران دیمەنێكی ناوازەی هەیەو ئەوەی تێبینی دەكرێت سەردانی كەری كەمە، ئەگەرچی بۆكات بەسەربردن پشودان دروستكراوە تا خەڵكی كاتی بەتاڵی خۆیان تی بەرنەسەر، بەڵام بەدەگمەن هاووڵاتی روی تێدەكات، بۆ ئەوەی زیاتر پاركی بولبول ئاوادەنی پێوەدیار بێت گەنجان داوادەكەن لایەنی پەیوەندی دار پاركەكە بكات بە شوێنی نمایشكردنی فیلمی سینەمایی و سازدانی كۆڕی شیعری، زاری كرمانجی راپۆرتێكی مەیدانی لەسەر بێ نازی پاركی بولبول ئەنجامداوە و تێیدا گەنج و كەسی بەتەمەن لایەنی پەیوەندی دار قسەیان كردوە.
بەیانیان بەر لە دەركەوتنی تیشكی رۆژ لەگەڵ دراوسێەكەم دێینە ئەو پاركە لێرە بە قسەو بەسەر هات تا نیوەڕۆ دەمێنینەوە و دواتر بەرەو ماڵ دەگەڕێینەوە، ئەمە قسەی ئەنوەر سالحی تەمەن 60 ساڵانە، دەڵێت" ئەوەی دەبینرێت من و چەند كەسێكین دێینە ئێرە پاركەكە بێ نازە هیچ خزمەتگوزاریەكی وای لێنیە تەنیا دار و درەخت هەن، بۆیە پێشنیاردەكەم بۆ ئێمەی بەتەمەن هەفتانە رۆژێك دیاری بكرێت بۆ یارییە فۆلكلۆریەكان، ئەوەش وادەكات كلتووری باب و باپیران زیندوو بكەینەوەو نیشانی نەوەی داهاتوو بدەین.
سەهەند سیروان، گەنجێكی تربوو بە رۆخی پاركی بولبول بەرەو نێو بازاڕ دەچوو گووتی" لەو سۆرانە ئێمەی گەنج فەرامۆشكراوین و هیچ حسابێكمان بۆ ناكرێت، لە بارەی چۆلی پارك باسی لەوەكرد" دەبوا بەرپرسان بیریان لەوەكربایەوە ئەو پاركەیان بكربا بە شوێنی نمایشی فیلمی سینەمایی و سازادانی سەرجەم ئەو كۆڕو سمینارانەی پەیوەندیان هەیە بە ئەدەب."
ئەو گەنجە گووتیشی" دەكرێت ئەو پاركە بدرێتە كەرتی تایبەت هەر كەسێك روی تێبكات شەوانە بەشدار بێت و لەو نمایشانەی لەوێ دەكرێن بڕی 500 دیناریان لێوەر بگیرێت، من دڵنیام ئەگەر هاتوو وابكرێت ئەو گەنجانەی روو لە كافتریاكان دەكەن بەرەو پارك دێن.
كاوە نەجیم، سەرۆكی شارەوانی سۆران، بۆ زاری كرمانجی دەڵێت" دەمێكە قسەمان لەسەر ئەو پاركانەی لە سۆران هەن كردووە لەگەڵ ئەندامانی ئەنجومەن، بۆ ئەوەی بدرێن بەكەرتی تایبەت، هەركەسێك سەردانی كرد بڕێك پارەی كەمی لێوەر بگیرێت ئەگەر هاتوو ئەو بڕیارە جێبەجێكرا سودی ماددی دەبێت بۆ شارەوانی سودی دووەمیش بۆ ئەو كەسەی كە سەرپەرشتی دەكات، منیش لەگەڵ ئەوە دام ئەو پاركە بكرێت بە شوێنی نمایشی فیلم و چالاكییە جۆر بەجۆرەكان، بۆیە بانگێشتی ئەو كەسانە دەكەین ئەگەر بیانەوێت ئەو پاركانە لە رێگەی زیاد كردنی ئاشكرا (موزایەدە) دەتوانن سەردانمان بكەن و هاوكارو پاڵپشتیان دەبین بەمەرجێك نێرگلەوە ئەو ماددانەی زیان بەخشن لەوێ نەفرۆشرێن.

زۆرترین بینراو