بەهۆی پەكەكە و توركیا زیاتر لە 200 گوندی دەڤەری سۆران چۆڵكراون

بەهۆی پەكەكە و توركیا زیاتر لە 200 گوندی دەڤەری سۆران چۆڵكراون

زاری كرمانجی–سیدەكان: تا دێت رەوشی سەربازی پەكەكە و سوپای توركیا لە ناوچە سنوورییەكانی باشووری كوردستان روو لە ئاڵۆز بوونە و لە نێوانشدا خەڵكی سڤیل باجەكەی دەدەن و دەبنە قوربانی .
بەپێی ئەو ئامارانەی لە قائیمقامەكانی هەر چوار قەزای دەڤەری سۆران دەست زاری كرمانجی كەوتوون، زیاتر لە 200 گوند بەهۆی هەبوونی پەكەكە و بۆردومان و تۆپبارانەكانی توركیا چۆڵكراون و دەیان گوندی دیكەش ئەگەری چۆڵ كردنییان هەیە، ئەمە لە كاتێكدایە، سەدان كەسی سڤیل بەهۆی شەڕ و پێكدادانی هەردوولا بووەنەتە قوربانی و زیانی زۆری ماددی بەر خەلكی دەڤەرەكە كەوتووە.
پارتی كرێكارانی كوردستان (پەكەكە) حزبێكی كوردی چەپە و بە هرزی ماركسی و لینینییەوە لە ساڵی 1978 لە باكوری كوردستان دامەزراوە و دواتر لە چیای قەندیل نیشتەجێ بوون، ئێستەش ژمارەیەكی زۆری گوندەكانی هەر چوار قەزای (سۆران، چۆمان، مێرگەسۆر، رواندز)داگیر كردوە و خەڵكێكی زۆر بە هۆی پەكەكەوە بوونەتە قوربانی، شایەنی باسە، پەكەكە زیاتر لە 30 ساڵە لەگەڵ توركیا شەڕ و ناكۆكییان هەیە .
ماوەی دووساڵیشە توركیا، هێزێكی پیادەی بە چەكی قورس و سووكەوە، بە مەودای زیاتر لە 50 كیلۆمەتر داخلی سنووری باشووری كوردستان كردوە لە ناوچەی كانیەڕەش و چیای كتكین و چیای دێل لە سنووری كارگێڕی ناحیەی سیدەكان سەر بەقەزای سۆران نیشتەجێ بوونە و شەڕ و ناكۆكی لە نێوان هەردوولا روودەدات و بەردەوامیش بە هیلیكۆپتەر و فڕۆكەی جەنكی بنكە و بارەگاكانی پەكەكە بۆردومان دەكات، ئەمەش ژیان و گوزەرانی هاووڵاتییانی ناوچەكەی تێكداوە و لە ماوەی چەند رۆژی رابردوو ژمارەیەك هاووڵاتی بوونەتە قوربانی .
لە لای خۆیەوە، ئیحسان چەلەبی بەڕێوەبەری ناحیەی سیدەكان بە زاری كرمانجی راگەیاند" بە شێوەیەكی گشتی دۆخی سیدەكان بەتایبەتی ناوچە سنوورییەكانی ئارام نییە، ئەو گوندانەی هێزی توركیا لێ جێگربووە هەمیشە مەترسی زەرەر و زیان هەیە بەهۆی شەڕ و پێكدادانی پەكەكە و هێزەكەی توركیا".
بەگووتەی بەڕێوەبەری ناحیەی سیدەكان" لە مانگی چواری ساڵی 2018 هێزەكەی توركیا دووای هاتنیان بۆ نێو خاكی كوردستان و سنووری كارگێڕیمان دەستیان بە درووست كردنی خاڵی سەربازی و قەرەقۆڵ لە ناوچەكانی بەرمیزە، چیای دێل، كتكین، دۆڵی شێخ كردووە و تا ئێستا زیاتر لە 10 قەرەقۆلیان دروست كردووە و 52 كیلۆمەتریش داخلی سنوورەكەمان بوونە و چەكی گەورە و بچووكییان پێیە".
ئاشكراشی كرد" لە ئێستادا 20 گوند لە بەرمیزە و كانیەڕەش، سیران و خەلیفان لە ژێر هەڕەشی تۆپ و بۆردومانی توركیادان و بەردەوام ئەگەری پێكدادان لە نێوان هێزەكەی توركیا و چەكدارانی پەكەكە لە ئارادایە و ئەگەری چۆڵ بوونییان هەیە".
چەلەبی، دەشڵێت " لە ساڵی 2017 تا ئێستا ، هەزار و 357دۆنم لە رەز و باغ و پووش و پاوانی هاووڵاتییانی دەڤەرەكەمان سووتاوە، زەرەر و زیانێكی زۆر بەر هاووڵاتییان و سەدان كاسبكاران گەیشتووە كە بەپێی خەملاندنی ئێمە نزیكەی 400 ملیۆن دینار زیانیان پێگەیشتووە، لە سووتانی رەز و باغ و لە ناوچوونی ئاژەڵ و مەڕ و ماڵات و ئۆتۆمبێل، هاووڵاتییانی دەڤەرەكەمان زیاتر لە 300 ملیۆن دینار زیانیان پێگەیشتووە، واتە بەشێوەیەكی گشتی زەرە و زیانەكانی تۆپباران و بۆردومانەكانی دووساڵ سەرووی 700 ملیۆن دینار بووە".

 

زۆرترین بینراو