بەڕێوەبەری ناحیەی خەلیفان: لیژنەیەكی تایبەتمەندمان پێكهێناوە بۆ نەهێشتنی زێدەڕۆییەكان

بەڕێوەبەری ناحیەی خەلیفان: لیژنەیەكی تایبەتمەندمان پێكهێناوە بۆ نەهێشتنی زێدەڕۆییەكان

دیدار-محەمەد هەسنانی
بەڕێوەبەری ناحیەی خەلیفان، لە دیدارێكی زاری كرمانجی تیشك دەخاتە سەر كارو پڕۆژە خزمەتگوزاریەكانیان و دەشڵێت: "بۆ نەهێشتنی زێدەڕۆییەكان بۆ سەر موڵك و ئاو كارەبا و رێگاو شەقامەكان لیژنەیەكی تایبەتمەندمان پێكهێناوە.
لەبەردەوامی قسەكانیدا مەغدید عەریف ئەحمەد، بەڕێوەبەری ناحیەی خەلیفان، بە زاری كرمانجی راگەیاند " هەڵكەوتەی ناحیەكەمان كەوتۆتە شوێنێكی ستراتیژی كە جگەلەوەی دەكەوێتە سەر رێگاو گشتی (سۆران-هەولێر) لەهەمان كاتیشدا رێگای ئیدارەی راپەڕین و سنووری قەزای مێرگەسۆری بەسەرەوەیە، بەمەش رۆژانە ژمارەیەكی زۆر خەڵكی بەناوچەكە هاتووچۆ دەكەن، بێگومان ئەوەش زیاتر پێویستی بە خزمەتگوزاری هەیە، بەتایبەت لە رووی چاككردنەوەی شەقام و رێگاكان، بۆ ئەم مەبەستە هەڵمەتەكانمان بەردەوامی هەیە و توانیوومانە بە هاوكاری كەرتی 2ی چاكردنەوەو پاراستنی رێگاو بانی هەولێر و پارێزگاو وەزارەتە پەیوەندیدارەكان بەپێی ئەو ئیمكانیاتەی هەمانە خزمەتگوزاری رێگاو بان ئەنجام بدەین".
لە بەشێكی دیكەی قسەكانیدا بەڕێوەبەری ناحیەی خەلیفان، ئاماژەی بەوەدا " بەمەبەستی چاكردنەوەو قیڕتاوكردنی رێگای كەمەربەندی سەنتەری ناحیەكەمان و چەند شوێنێك، دوای ئەوەی دواكاریمان ئاراستەی سەرووی خۆمان كرد، خۆشبەختانە لەلایەن پارێزگاری هەولێر، گوژمەیەكمان بەبری 25 ملیۆن بۆ تەرخانكراو بەهاوكاری كەرتی 2ی چاكردنەوەو پاراستنی رێگاو بانی هەولێر، دەستمان كرد بە چاكردنەوەو نوژەنكردنەوەی شەقامەكە".
گووتیشی " بە پێویستی دەزانین دەستخۆشی لە چەند كەسایەتێكی سنوورەكەمان بكەین، بەتایبەت (فەرحان قادر شكفتی، حاجی محەمەد واحید بناوی، فاخیر حەسەن كەریم، مەلا جەعفەر، عەلی سەلیم) كە (100) تۆن قیڕیان بۆ پڕۆژەكەمان دابین كرد، ئەوەش ئاسانكاریەكی باش بوو كە بتوانین خزمەتگوزاری شەقامەكە فرەوانتر بكەین لەكاتی ئەنجامدانی ئەم پڕۆژەیە".
مەغدید عەریف ئەحمەد، بەڕێوەبەری ناحیەی خەلیفان، ئەوەشی خستەروو: "دوای پشكنین و ئەنجامدانی دەرخستە بۆ چەند رێگایەكی سەرەكی سنوورەكەمان، كە چەند شوێنێكی رێگای سەرەكیی (خەلیفان- دۆڵی ئاڵانە) هەروەها رێگای (گەلی عەلی بەگ و خەلیفان-سپیلك) تووشی ڕووچوون ببوونەوە و چەندین تاسە و چاڵی تێدا بوو، ئەمەش گرفتی زۆری بۆ هاتوچۆی شۆفێران و هاووڵاتییان دروست كردبوو، بۆ چارەسەركردنی داواكاریمان ئاراستەی سەرووی خۆمان كردو دوای رەزامەندی بەهاوكاری كەرتی 2ی چاكردنەوەو پاراستنی رێگاو بانی هەولێر، كە زۆربەی سنوورەكەمان پەیوەستە بە ئەوانەوە، لەگەڵ ئەوەشدا لە هەندێك شوێن كەرتی 4ی چاكردنەوەو پاراستنی رێگاو بانی سۆران هاوكارمان بووە، بەمەش توانیوومانە زۆربەی قۆرت و چاڵەكانی ئەم رێگایانە پڕبكەینەوەو قێڕتاویان بكەین و ئاستەنگەكانی بەردەم هاتووچۆی شۆفێران كەمبكەینەوە".
بەڕێوەبەری ناحیەی خەلیفان گوتیشی: " هەوڵەكانمان بەردەوامی هەیە بۆ چارەسەركردنی گرفتی كەمی ئاوی خواردنەوەی هاووڵاتییانی سەنتەری ناحیەی خەلیفان و گوندەكانی دەوروبەری، هەروەها ئەو گەڕەك و شوێنان و ماڵانەی كە پێشتر لە رێگەی تانكەر ئاویان بۆ دابین دەكرا، كە لەم مەودوا پڕۆژەی ئاوی خواردنەوەیان بۆ ئەنجام بدرێت، هیوادارین بتوانین بە پێی ئەو ئیمكانیاتەی لەبەردەستماندایە ئەم كێشەو گرفتانەش چارەسەر بكەین و ئاوی پێویست بۆ هاووڵاتیان دابین بكرێت".
مەغدید عەریف ئەحمەد، روونیشی دەكاتەوە: "كە لیژنەیەكی تایبەتمەندیان پێكهێناوە بۆ نەهێشتنی زێدەڕۆیەكانی سەر موڵكی گشتیی و شەقام و رێگاكان و ئاو و كارەباو هتد.. كە چەند كەسێكیش لەسەر ئەم پرسە دەستگیركراون و رووبەڕوی یاسا كراونەتەوە، لەمەودواش لێكۆڵینەوەو بەدواداچوونی جددی تر دەكرێت و رێگە بەهیچ كەس نادرێت زێدەڕۆی بكەنە سەر موڵك و كەرتی گشتی".
بەڕێوەبەری ناحیەی خەلیفان، دەشڵێت: "سنووری ناحیەكەمان لە رووی گەشتوگوزارەوە تایبەتمەندی خۆی هەیەو ساڵانە گەشتیارێكی زۆر رووی تێدەكەن، بۆ ئەم مەبەستە هەوڵمانداوە بایەخی زیاتر بە كەرتی گەشتیاری بدەین و هانی كەرتی تایبەت بدەین بۆ ئەوەی پڕۆژەی وەبەرهێنان لە ناوچەكە ئەنجام بدەن، هەروەها بەرلەوەی من وەك بەڕێوەبەری ناحیەی خەلیفان دەست بەكاربم كار لەسەر پڕۆژەیەك كراوە، كە لە ئێستادا ا لە بناری چیایی كۆڕەك پانتایەكی بەرفراوان دیاریكراوە بڕیار وایە لە رێگەی وەبەرهێنان واتە كەرتی تایبەت پڕۆژەی گەشتیاری بۆ ئەنجام بدرێت، بەڵام دیارە تائێستا هەندێ‌ كێشە و گرفتی یاسایی زەویەكان ماوەو دوای تەواو كردنی رێكارەكان دەست دەكرێت بە ئەنجامدانی پڕۆژەكە، ئەوەش جگەلەوەی دەبێتە هۆكارێك بۆ زیاتر هاتنی گەشتیاران، لە هەمانكاتیشدا هەلی كار بۆ چەندان خەڵكی ناوچەكە دەڕەخسێنێت".
ئەوەشی ئاشكرا كرد: " بەهۆی بەڕەلڵاكردنی كردنی مانگاو ئاژەڵە خۆماڵییەكان زیانی زۆر بەر ژینگەو سەوزایی ناحیەی خەلیقان دەكەووت، كە بەهۆیەوە زۆربەی دارو درەختەكانی سەر شەقام و رێگان دووچاری لەناوچوون دەبنەوە، هەروەها ببووە بێزاری خەڵكەكە بۆ ئەم مەبەستە سەرۆكایەتی شارەوانی خەلیفان هەڵمەتێكی دەست بەسەرداگرتنی ئەم ئاژەڵانەیان دەست پێكردووەو خاوەنەكانیان دووچاری پێبژاردن دەبنەوە، ئەوەش هۆكارێكی باش بووە، بۆ كەمكردنەوەی ئەم ئاژەڵانە لەسەر شەقام و كۆڵانەكانی خەلیفان.

 

بیروڕا

زۆرترین بینراو