بەڕێوەبەری ناحیەی دیانا: هەڵمەتێكی بەرفراوانی پڕۆژەمان دەستپێكردووە

بەڕێوەبەری ناحیەی دیانا: هەڵمەتێكی بەرفراوانی پڕۆژەمان دەستپێكردووە

 

دیدار-محەمەد هەسنانی: لەدیدارێكی زاری كرمانجیدا بەڕێوەبەری ناحیەی دیانا، باس لە كاروپڕۆژە خزمەتگوزاری و پلان و بەرنامەكانیان دەكات و دەشڵێت "ئەمساڵ چەندین رێگاو شەقامی گەڕەك و شوێنمان قیڕتاو كردون و بۆ ئەم شوێنانەش كە ماوەن چاوەڕوانی دەرچوونی پڕۆژەی نوێن".
لەبەردەوامی قسەكانیدا مەغدید عەریف ئەحمەد، بە زاری كرمانجی راگەیاند " سنوورەكەمان بەرفراوانەو بەهۆی گەڕانەوەی ئاوارەكان و خەڵكی گوندو شوێنە جیاجیاكان و شارەكانی دیكەی كوردستان بۆ سنوورەكەمان و نیشتەجێبوونیان، چەندین گەڕەكی نوێ لەم ساڵانەی رابردوو لە ناحیەكەمان دروستكراون، ئەوەش پێویستی بە ئاوڕلێدانەوەو خزمەتگوزاری هەیە، بۆ ئەم مەبەستە هەوڵمانداوە بەپێی تواناو ئەم ئیمكانیاتەی لە بەردەستمانە خزمەتگوزارییان پێشكەش بكەین، بەتایبەتیش لەرووی دابینكردنی ئاوی خواردنەوەو چاككردن و قیڕتاو كردنی رێگاو شەقامەكان و كردنەوەی قوتابخانەو بنكەی تەندروستی و فرمانگەو پاراستنی ئەمنیەتی ئەم شوێنانەو بایەخدان بە سەوزایی و هتد...، خۆشبەختانە تاڕادەیەكی سەركەوتووبوینە، راستە كەموكۆڕیش هەیە بەڵام پڕۆژەو بەرنامەی بەردەوامیشمان هەیە".
لەبەشێكی دیكەی قسەكانیدا بەڕێوەبەری ناحیەی دیانا، ئاماژەی بەوەدا "ئەمساڵ لەگەڵ دەستپێكردنەوەی كارو پڕۆژە خزمەتگوزارییەكانمان دەستمان كردووە بەچاكردن و قیڕتاو كردنی زیاتر لە پێنج گەڕەكی سنووری ناحیەكەمان، هەروەها دەست پێكردنەوەی پڕۆژەی قیڕتاوكردنی رێگای سەرەكی گوندەكانی (بناری چیایی حەسەنبەگ – گەرووی ئۆمەراغە) بە درێژایی زیاتر لە 12 كیلۆمەتر، كە لەلایەن بەڕێوەبەرایەتی چاككردنەوەو پاراستنی رێگاوبانی هەولێر جێبەجێ‌ دەكرێت، بە تەواو كردنی پڕۆژەكە ژمارەیەك لە گوندەكان و جوتیارانی دەڤەرەكە كێشەی هاتووچۆیان بۆ چارەسەر دەبێت".
گووتیشی "هەرچەندە پڕۆژەی قیڕتاو كردنی رێگای بناری حەسەنبەگ، ساڵی رابردوو دەست بەقیڕكردنی كرا، بەڵام بەهۆی هاتنی وەرزی سەرما پڕۆژەكە راگیر و ئەمساڵ دووبارە دەست بە پڕۆژەكە كرایەوەو لە نزیكەوە بەدواداچوونمان بۆ كەم و كورتیەكان كردووە، كە ئەم بەشەی ساڵی رابردوو كرا، لەچەند شوێنێك بەهۆی رووچوونی زەوی زیانی بە رێگاكە گەیاندبوو، بەڵام چارەسەری پێویستی بۆ دەكرێت، هەروەها بەشیكی قیڕەكە كە پار سال كرابوو نزیكەی كیلۆمەترێك وەكو پێویست نەبوو، بە لێدانەوەی چینێكی دیكەی قیڕ ئەویش چارەسەر دەكرێت، بەشێوەیەكی گشتی پڕۆژەكە بەپێی ستانداری ئەندازەیی كە دیاری كراوە لەلایەن ریگاوبانەوە جێبەجێ دەكریت لەرێگەی بەڵێندەرایەتی".
مەغدید عەریف ئەحمەد، ئەوەشی ئاشكرا كرد "كە زۆربەی ئەم گەڕەك و شوێنانەی كە لەئێستادا شەقام و رێگاكانیان قیڕتاو دەكرێن، پڕۆژەی ساڵی رابردوو بوونە، كە بەهۆی سەرماو سۆڵە راگیرا بوون و لەرێگەی بەڵێندەرانەوە دەست بەكارەكانیان كراوەتەوە، بۆ ئەنجامدانی پڕۆژەی نوێش چاوەڕوانی بوددجە و دەرچوونی پڕۆژەی تازەیەن، بۆ ئەوەی بەهاوكاری لایەنە پەیوەندیدارەكانی سنوورەكەمان پێشنیاری بكەین، ئایا كام پڕۆژە زۆر گرینگە لەسەرەتاوە دەستی پێبكەین و خزمەتگوزاری پێشكەش بە هاووڵاتیان بكەین لە بوارە جیا جیاكاندا، سەبارەت بەتەواكردن و قیڕتاوكردنی چەند كۆڵانێكی گوندەكانی دێڵزیان و بادلیان و چەند گوند و شوێنێكی دیكەی سنوورەكەشمان، بە هەمان شێوە لە چاوەڕوانی ئەوەیەن گوژمەی تازەمان بۆ دابین بكرێت بۆ ئەوەی بتوانین پڕۆژەی خزمەتگوزاریان بۆ ئەنجامبدەین".
بەڕێوەبەری ناحیەی دیانا، گووتیشی "توانراوە تاراددەیەكی باش رێگە لە زێدەڕۆی بۆ سەر موڵكی شارەوانی بگیرێت، بۆ ئەم هاووڵاتیانەش كە زەوی زێدەڕۆیان هەیە بەتایبەت ئەوانەی شەقام و رێگاكانیان قیڕتاو كراون و كەوتوونەتە ناو خانوو گەڕەكەكان، چاوەڕوانی بڕیاری سەرووی خۆمانین ئایا چۆن كێشەكانیان یەكلابكرێتەوەو رێگای دروستكردنی خانوویان پێبدرێت، بۆ تاپۆكردنی خانووی هاووڵاتیانیش لەچەند شوێنێكی ناحیەكەمان تاپۆكردن بەردەوامە، هەروەها چەند گەڕەكێكیش لە بەرنامەدان، دوای ئامادەكردنی نەخشەكانیان و تەواوكردنی رێكارە یاساییەكان، دەست دەكرێت بە تاپۆكردنی خانووی هاووڵاتیان بەپێی رێنمایی تازەی حكوومەت و وەزارەتی شارەوانی و تۆماری خانووبەرە".
مەغدید عەریف ئەحمەد، دەشڵێت "بۆ چارەسەر كردنی كێشەی كەمی ئاوی هاووڵاتییانی ئەم گەڕەكانەی كە گرفتی كەمی ئاوی خواردنەوەیان هەیە، هەوڵەكانمان بەردەوام بووە، بە هاوكاری بەڕێوەبەرایەتی ئاوی سۆران، بە دابینكردنی بۆڕی و پێداویستیەكانی پڕۆژەو سەرچاوە ئاوییەكانی دیانا، بەتایبەتیش دابینكردنی ترۆمپاو بۆ ئەوەی بتوانرێت بەشێوەیەكی باشترو خێراتر ئاوی خواردنەوە بە هاووڵاتییان بگات، داواكاریشین لە هاووڵاتییان ئەم ئاوەی كە بۆیان دێت بە فیڕۆی نەدەن و دوای پڕبوونی تانكی ماڵەكانیان و پێداویستییەكانیان قوفڵی ئاوی ماڵەكانیان بگەرنەوە، بۆ ئەوەی خەڵكانی دیكەش لێی سوودمەندبن و ئەم سامانە بە نرخە بەفیڕۆ نەدرێت، ئەمەش ئەركێكی ئاێنی و نیشتیمانیە".
بەڕێوەبەری ناحیەی دیانا، داواكاریش بوو لە هاووڵاتییان خۆیان بەدووربگرن لە دروستكردنی تاسەی نایاسایی لە شەقام و رێگاكاندا، بەتایبەتیش لەم شەقام و رێگایانەی تازە قیڕتاو كراون، چونكە هەركەسێك تاسە دروست بكات و سكاڵای لەسەر تۆماربكرێت رووبەڕووی یاسا دەبێتەوە، بەڵكو لەبری ئەوە ئەگەر شوێنێك پێویست بێت، با داواكاری پێشكەش بە ناحیەو بەڕێوەبەرایەتی هاتووچۆ بكەن، تا پشكنین بۆ شوێنەكە بكرێت ئەگەر پێویست بێت، تاسەی پلاستیك و یاسایان بۆ دابنرێت، هەروەها لە بەرنامەماندا هەیە كە هەڵمەتێك بۆ تێكدانی تاسە نایاساییەكان لە رێگا گشتتییەكان ئەنجام بدەین، لەبەرامبەردا ئەگەر شوێنێك گرینگ بێت تاسەی پلاستیك دابنێن".
دەربارەی قۆرت و تاسەو چاڵی رێگاكانیش، مەغدید عەریف ئەحمەد رایگەیاند: "بۆ سیانەكردن و پڕكردنەوەی ئەم قۆرت و چاڵانەی لە شەقامەكان دروست بوونە، توانیومانە برێك قیڕ دابین بكەین، شارەوانیمان لەوە ئاگاداركردۆتەوە كە دەست چاكردنەوەو پڕكردنەوەی ئەم قۆرت و چالانە بكەین و ئاستنگەكان لەبەردەم هاتووچۆدا نەهێڵین.
لەدوا قسەكانیدا مەغدید عەریف ئەحمەد ئاماژەی بەوەدا " هەوڵەكانمان بەردەوامە بۆ نۆژەنكردنەوەو بۆیاخ كردنەوەی قوتابخانەكان و بنكە تەندروستییەكان، لەوانە قوتابخانەی ئاشوریان، لە ناحیەی دیانا نۆژەنكراوەتەوەو ئاوەڕۆێكیشی بۆ دروستكراوە، هەروەها كار لەسەر بۆیاخ كردنی ژمارەیەك قوتابخانە دەكرێت، بەهاوكاری رێكخراوە بیانییەكان، بەم نزیكانەش دەست دەكرێت بە نۆژەنكردنەوەی بنكەی تەندروستی زۆزك و بەردەوام دەبین لەسەر ئەم كارو پڕۆژانە.

زۆرترین بینراو