بەیەكگرتووی نەبێت كورد ناتوانێت لەگەڵ سوریا و روسیا رێكبكەوێت

بەیەكگرتووی نەبێت كورد ناتوانێت لەگەڵ سوریا و روسیا رێكبكەوێت

رەمەزان هەرنی – هەولێر: دوای نزیكەی مانگێك شەڕ كردن لە رۆژئاوای كوردستان و بەردەوامی هێرشەكانی توركیا بۆ سەر ناوچە كوردنشینەكان ئاگربەست لە نێوان هەریەك لە ئەمریكا و توركیا، روسیا و توركیا كرا، لە ئەنجامدا زیاتر لە 350 هەزار كەس كە كوردی رۆژئاوان لە سەر ماڵ و حاڵیان دەربەردەرو ئاوارەبوون. مامۆستایەكی زانستە سیاسییەكانیش دەڵێ، دوای ئەو هەموو قوربانیدانە و زیانانەی بە رۆژئاوا گەیشتووە ئاسۆیەكی روون هەیە، بەڵام پێویستە كورد لە رۆژئاوا مامەڵەیەكی ژیرانە لەگەڵ بارودۆخەكەدا بكات تابتوانێت سەركەوێت، بۆیە بەیەكگرتووی نەبێت ناتوانێت لەگەڵ سوریا و روسیا رێكبكەوێت.
د. بۆخاری عەبدوڵڵا، مامۆستای زانستە سیاسییەكان بۆ زاری كرمانجی دیاركرد:" توركیا بە رەوای نەبینی كورد لە رۆژئاوا بژیت، بۆیە ئەو هێرشە قورسەی بۆ سەر ناوچە كوردنشینەكانی ئەنجامدا، لە بنەڕەتدا هەسەدە دەیویست ناوچەكە بێ شەڕ بۆ توركیا چۆڵ بكات, بەڵام توركیا ئەمەی نەویست و پەلەی كرد، ئەمریكاش بە ئاشكرا بە توركیای نەیگوتبوو هێرش بكاتە سەر رۆژئاوا، بەڵام ئەوەی ئاشكراكرد كە ئێمە بەرگری لە رۆژئاوا ناكەین و پاڵپشتی توركیاش ناكەین لەم ئۆپەڕاسیۆنەدا، ئامانجی سەرەكی شەڕكردنی توركیا لەگەڵ رۆژئاوا دەركردنی كورد بوو لە سەرێكانی و گرێ سپی ئێستا ئەو ناوچە كوردنشینانە بێ كورد ماونەتەوە 350 هەزار كەس ئاوارە و دەربەدەربوونە و ماڵ و حاڵیان جێهێشتووە.
بۆخاری ئەوەشی گوت:" لەدوای دەستپێكردنی شەڕ لە رۆژئاوا كە توركیا بەردەوام هێرشی دەكردە سەر ناوچە كوردنشینەكان كاریگەریەكی زۆری لەسەر كۆنگرێسی ئەمریكای دروستكرد، لەگەڵ وڵاتانی ئەوروپا ئەمە بووە هۆكار كە رووسیا بێدەنگی بشكێنێت و بێتە سەر هێل لەبارەی رۆژئاوای كوردستانەوە كە توشی پەلامار و شەڕ بووە، لەگەڵ هاتنی روسیا بۆ ناو بابەتی شەڕی توركیا لەگەڵ رۆژئاوا یەكسەر ئەمریكا خۆی كشاندەوە، پێشبینكراوە كە رێككەوتنێك لە نێوان ئەمریكا و روسیا هەیە بۆ دوارۆژی سوریا بۆ چۆنیەتی رێكخستنەوەی سوریا، چونكە ئەم رێككەوتنەش لەسەر پشكی ناوچەكانی حەلەب و ناوچەكانی تر نابێت كە لەژێر ركێفی توركیادایە، بەڵام ئەم رێككەوتنەی نێوان رووسیا و توركیا ئەو ناوچانەش چارەسەر دەكرێن، لەبەرامبەردا توركیا دەیەوێت چەكدارە ئاوارەكانی بەلای سوریا رابكێشیت.
عەبدوڵڵا، ئاشكراشی كرد:" رێككەوتنی نێوان روسیا و توركیا بەناچاری كورد پێی رازیبووە، لە هەمانكاتدا لە نێو خۆی سوریاش هەندێك لایەن دژی بۆ چوونەكانی روسیانە و دژایەتی دەكەن، لەگەڵ ئەوەش كورد زەرەری زۆری كرد و چەندین بریار كە دراون بە ناچاری پێی رازیبووە، ئارمانجیان ئەوە بووە هێزی كوردی لاواز بكەن لەو ناوچانە، بەڵام ئەگەر كورد یەكگرتوو بن و بەرەیەكی یەكگرتوو دروست بكەن لەگەل روسیا و رژێمی ئەسەد گفتوگۆ بكەن ئەگەری زۆر هەیە ئەوان بتوانن بەو هێزە خۆیان لە ناوچەكەدا بسەپێنن و زۆر شت بەدەست بێنن لە سوریای داهاتوو, چونكە سوریای ئێستا لە بارودۆخێكی باشدا نیە و خراپە لە حالەتی هێزدا نیە و ناتوانێت بەرامبەر هێزەكانی هەسەدەش شەڕ بكات، ئەوەی ئێستا روودەدات كورد بەناچاری پێی رازی دەبێت، روسیا زیاتر لە هەموو لایەك كاریگەری دەبێت لە نێوان گفوگۆیەكانی نێوان كورد و رژێمی سوریا ئاسویەكی روون دیارە بۆ كورد لە رۆژئاوا.
د. بۆخاری عەبدوڵڵا، مامۆستای زانستە سیاسییەكان ئەوەشی روونكردەوە:" دوای ئەو هەموو هێرش و ناخۆشیانە ئەگەر بارودۆخەكە ئارام بێتەوە، باشترە ئەمریكا سەرپەرشتی ئەو ناوچانە بكات لەوەی روسیا بكات, رووداوەكانی رۆژئاوای دوای ئەو هەموو قوربانی دانە و زیانانەی پێگەیشتووە ئاسۆیەكی روون هەیە و دیارە بەڵام پێویستە كوردیش لە رۆژئاوا مامەلەیەكی ژیرانە لەگەڵ بارودۆخەكەدا بكات تابتوانێت سەركەوێت، بۆیە بەیەكگرتووی نەبێت ناتوانێت لەگەڵ سوریا و روسیا رێككەوێت".

زۆرترین بینراو