تائێستا هیچ بڕیارێك بۆ ڕێگەدان بە هاتنی گەشتیارانی ئێرانی نەدراوە

تائێستا هیچ بڕیارێك بۆ ڕێگەدان بە هاتنی گەشتیارانی ئێرانی نەدراوە

دیدار-محەمەد هەسنانی
بەڕێوەبەری گەشتوگوزاری سۆران، لە دیدارێكی زاری كرمانجیدا دەڵێت "دوای هەڵگرتنی قەدەغەی هاتووچۆی نێوان پارێزگاكان، رێژەی هاتنی گەشتیاران بۆ ناوچە گەشتیارییەكانی سنوورەكەمان لە بەرزبوونەوەدایەو زۆربەشیارن گەشتیاری شارەكانی باشورو ناوەڕاستی عێراقن.
دەشڵێت: "بۆ كردنەوەی دەروازەی نێودەوڵەتیی حاجی ئۆمەران بەڕووی گەشتیارانی ئێرانی، تا ئێستا هیچ بڕیارێك نەدراوە و چاوەڕوانی بڕیار و رێنمایی حكوومەتین.
لەبەردەوامی قسەكانیدا بارزان محەمەد، بەڕێوەبەری گەشتوگوزاری سۆران، بەزاری كرمانجی راگەیاند: "سنووری بەڕێوەبەرایەتییەكەمان هەر چوار قەزاكانی (سۆران، رواندز، مێرگەسۆر و چۆمان) بە ناحیەو گوندەكانیانەوە لەخۆ دەگرێت و بەپێی هەڵكەوتەی جوگرافییان چەندین سەیرانگە و شوێنی گەشتیاریی لەم سنوورانە بوونیان هەیە و زۆربەیان خزمەتگوزاریی پێشوازی لە گەشتیاریان تێدایە، ئەمەش بووەتە سەرچاوەیەكی گرنگی گەشتیاری بۆ ناوچەكە و بژیوی خەڵكی ئەو دەڤەرانە".
گووتیشی: "لە ئێستاشدا لەژێر چاودێریی ئێمە و بە پابەندكردنی خاوەن شوێنە گەشتیارییەكان بە رێنماییەكانی خۆپارێزی لە ڤایرۆسی كۆرۆنا، ئەم شوێنانە بەڕووی گەشتیاراندا كراونەتەوە و رۆژانە ژمارەیەكی زۆری گەشتیاری ناوخۆی و پارێزگاكانی عێراق، بۆ گەشت و سەیران روو لە سەیرانگەكانی سنوورەكەمان دەكەن".
لەبەشێكی دیكەی قسەكانیدا بەڕێوەبەری گەشتوگوزاری سۆران، ئەوەی خستەروو: "هەرچەندە چەند مانگێك لەمەوبەر بەهۆی رێكارەكانی خۆپارێزی لە ڤایرۆسی كۆرۆنا، رێگای نێوان پارێزگاكان و شارو شارۆچكەكانی هەرێمی كوردستان و شارەكانی عێراق داخرا بوو، ئەوەش كاریگەری زۆری كردبووە سەر كەرتی گەشتیاری و شوێنە گەشتیاریەكانی هەرێمی كوردستان و سنوورەكەمان چۆڵیان پێوە دیاربوو، بەمەش تەنها لە سنووری بەڕێوەبەرایەتییەكەمان بە سەدان كەس لەوانەی لە شوێنە گەشتیارییەكان كاریان دەكرد بەبێ‌ كاری مابوونەوەو زۆربەی كرێكاران ناردرابوونە ماڵەوەیان، بەڵام خۆشبەختانە لە ئێستادا سەیرانگەو شوێنە گەشتیارییەكان بە شێوەیەكی گشتیی بە رووی گەشتیاران و هاووڵاتییان كراوەنەتەوە، ئەوەش هەلی كاری بۆ زۆربەی ئەو كەسانە رەخساندۆتەوە كە بەبێ‌ كاری مابوونەوە".
بارزان محەمەد، بەڕێوەبەری گەشتوگوزاری سۆران، راشیگەیاند: "لە سەرەتاوە قەدەغەی نێوان پارێزگاكانی هەرێمی كوردستان هەڵگیرا، دواتریش قەدەغەی نێوان پارێزگاو شارو شارۆچكەكانی عێراقی هەڵگیرا، بەمەش لە سەرتاوە زۆربەی گەشتیارانی عەرەب بە ئۆتۆمبێلی تایبەتیی خۆیان سەردانی هەرێمی كوردستان و سنوورەكەمانیان دەكرد، بەڵام دواتر واتە لە چەند هەفتەی رابردوو گرووپە گەشتیارییەكان بۆ هێنانی گەشتیار لە شار و شارۆچكەو ناوچەكانی عێراق دەست پێكردەوە، بەمەش رێژەی هاتنی گەشتیاران بۆ ناوچە گەشتیارییەكانی سنوورەكەمان رووی لە زیادبوون كردووە".
بەڕێوەبەری گەشتوگوزاری سۆران، ئاماژەشی بەوەدا: "بە كردنەوەی شوێنە گەشتیارییەكان، سەیرانگەكانی سنوورەكەمان قەرەباڵغی زۆریان پێوەدیارەو رۆژانە هەزاران گەشتیاری ناو خۆیی و شارەكانی كوردستان و عێڕاق رووی تێدەكەن، بە تایبەتیش رۆژانی پشوو، كە تەنها رۆژی هەینی رابردوو زیاتر لە 25 هەزار گەشتیار روویان لە ناوچە گەشتیارییەكانی دەڤەرەكەمان كردووە، كە بە زۆریش هاتوونەتە سەیرانگەكانی سنووری قەزای رواندز، لەوانەش زۆربەیان گەشتیاری شار و شارۆچكەو ناوچەكانی باشور و ناوەڕاستی عێڕاق بوونە، پێشبینی هاتنی گەشتیاری زیاتریش دەكەین".
بارزان محەمەد، بەڕێوەبەری گەشتوگوزاری سۆران، ئەوەشی ئاشكرا كرد: "سەبارەت بە هاتنی گەشتیارانی ئێران، چاوەڕوانی بڕیاری فەرمیی حكوومەتی هەرێمی كوردستانین، بۆ كردنەوەی دەروازەی نێودەوڵەتیی حاجی ئۆمەران بەڕووی گەشتیاراندا، چونكە تا ئێستا هیچ بڕیارێكی فەرمی لەم رووە نەدراوە، بەڵام بە كردنەوەی دەروازەكە بەڕووی گەشتیاراندا پێشبینی دەكەین، گەشتیارێكی زۆر لە وڵاتی ئێران ڕوو لە هەرێمی كوردستان بكەن، باتیبەتیش شوێنە گەشتیارییەكانی ناوچەكەمان، كە هاوسنوورە لەگەڵ ئەم وڵاتە.

 

 

 

بیروڕا

زۆرترین بینراو