تا ئێستاش كۆچی گەنجان بۆ دەرەوەی وڵات بەردەوامە

تا ئێستاش كۆچی گەنجان بۆ دەرەوەی وڵات بەردەوامە

بەرەڤان شاكر سلێمان لاچ
ئەگەرچی ماوەیەكی زۆر كۆچكردنی گەنجان بۆ دەرەوەی وڵات ببووە مانشێتی رۆژنامەو كەناڵەكانی ڕاگەیاندن، بەڵام تا ئێستاش كۆچكردنی گەنجان بۆ دەرەوەی كوردستان بەردەوامە، رۆژانە ژمارەیەكی زۆری گەنج ڕوو لە دەرەوەی كوردستان دەكەن.
دوای سەرهەڵدانی قەیرانی دارایی و هاتنی چەكدارانی داعش، رۆژانە ژمارەیەكی زۆری گەنجی كوردستان ڕوویان لە دەرەوەی وڵات دەكرد، ئەمەش وایكرد كە لایەنە پەیوەندیدارەكان كاری لەسەر بكەن، بۆ ئەوەی ڕێگری لە چوونی گەنجان بكڕێت بۆ دەرەوەی وڵات، تەنانەت باس لەوە دەكرا لە كۆبوونەوەكانی ئەو كاتی سەرۆكی حكومەتی هەرێمی كوردستان لەگەڵ وڵاتانی ئەوروپا، باس لە كۆچكردنی ئەو گەنجانە كراوە و ڕێگەچارەیان داناوە بۆ ڕێگریكردن لە كۆچكردنی ئەو گەنجانە.
ئەگەرچی ئەو هەوڵانە بۆیە هۆی كەمبوونەوەی كۆچكردنی گەنجان بۆ دەرەوەی وڵات، بەڵام لە ئێستادا رۆژانە ژمارەیەكی زۆری گەنج ڕوو لە دەرەوەی وڵات دەكەن.
زاری كرمانجی، بۆ ئەم پرسە بەدواداچوونێكی كرد، یەك لەو گەنجانەمان دەست كەوت كە بەنیازبوو رۆژی دوای چاوپێكەوتنەكەمان بڕواتە دەرەوەی وڵات.
ئەو گەنجە ناوی ڕێژیارە و باسی لەوەكرد، ئەو كاری سەرتاشی دەكات و لە هیچ دامەزراوەیەكی حكومی كارناكات، ئەمە جگە لەوەی كاری سەرتاشی ناتوانێت بژێووی ژیانی ئەو دابینبكات، ئەمە سەڕەڕای ئەوەی وەك گەنجێك پێویستی بە لایەنی ماددییە بۆ دەستەبەركردنی ژیانی داهاتووی خۆی.
ئەو گەنجە گووتیشی، ” من لەگەڵ قاچاخچیێك ڕێككەوتووم بۆ ئەوەی بم گەینێتە بەریتانیا، هەرچی ئەو پارەیەی لەو ماوەی لە كوردستان پەیدام كردووە داومە بەو قاچاخچییە“.
ڕێژیار تاكە گەنج نییە كە نیازی ئەوەی هەبێت بڕوات بۆ دەرەوەی وڵات، هەر وەك لە ڕێگەی ئەوەوە لیستێك لەو ناوانەمان دەست كەوت كە لەگەڵ ئەو دەچن بۆ ئەوروپا و ژمارەیان دوانزدە كەس بوون.
(س،ش،م)، یەك لەو كەسانەیە كە زۆر ئاگاداری چوونی گەنجانە بۆ دەرەوەی وڵات، ئەو نەیوویست ناوی ئاشكرا بكرێت وبە زاری كرمانجی ڕاگەیاند“ ئێستاش شەوانە و رۆژانە گەنجان لە سەرتاسەی كوردستان دەچنە دەرەوەی وڵات، ئەمە تایبەت نییە بە شارێك یا ناوچەیەك، زیاتریش ئەو گەنجانەن كە توانایێكیان هەیە بۆ كاركردن، جا چ سەرتاشن یا وەستای ئۆتۆمبێڵن، یان لە هەر كارێكی تر شارەزاییان هەیە.
ئەوان بۆ كاركردن دەچنە دەرەوەی وڵات، بەڵام ئەمە ئەوە ناگەینێت ئەوەی ویستی بڕوات بۆ ئەورۆپا پێی بگات، چونكە زۆرجار هەبووە تۆشی كێشە هاتوون و لە ڕێگەی قاچاخچییە كوردەكانەوە گەڕێنراونەتەوە بۆ كوردستان“.
زیاتر گووتیشی، ”بێكاری و ناڕوونی لە داهاتووی گەنج لەم وڵاتە، هۆكاری سەرەكی چوونی گەنجانە بۆ دەرەوەی وڵات، ئەگەرنا كەس پێی خۆش نییە خێزان و وڵاتی خۆی بەجێبێڵێت، بۆیە زۆر بە ئاشكرایی دەڵێم، تا ئێستاش رۆژانە نزیكەی بیست گەنج كوردستان جێدێڵن“
هەوار گوانی، یەك لەو گەنجانەیە كە لە یۆنانە و نیازی وایە بچێتە ئەڵمانیا، ئەو بە زاری كرمانجی ڕاگەیاند“ سەرەتا كە لە كوردستان بەڕێكەوتم وام زانی من بە تەنیام، بەڵام بینیم ژمارەیەكی زۆری گەنج و خێزانی كوردستان لێرە هەنە، رۆژانەش خەڵك لە كوردستانەوە كۆچدەكات بۆ ئەورۆپا“.
هەوار گووتیشی“ من لە كوردستان سەرتاش بووم، بەڵام كارمان نەبوو بۆیە كوردستانم جێهێشت، نیازیشم نییە بگەڕێمەوە بۆ كوردستان.

بیروڕا

زۆرترین بینراو