تروسكە هەر بە عاشقی دەمێنێتەوە و باسی ماچ و یار دەكا

تروسكە هەر بە عاشقی دەمێنێتەوە و باسی ماچ و یار دەكا

چاوپێكەوتن- محەمەد ئامۆكەیی- هەولێر: لە هەڤپەیڤینێكی تایبەتی زاری كرمانجی خانمە شاعیر تروسكە تووت ئاغاجی، باس لە ژیان و دۆخی ئێستای شیعر و هاتنە پێشی ئافرەت لە سەرجەم بوارەكانی ژیان دەكات و لە دەستپێكی قسەكانیدا دەڵێت" لە دایكبووی ساڵی 1976 لە شاری ئاڵا و كۆمار و پێشوام، دایكم و باوكم هەر دووكیان مەهابادین و خاوەنی 5 منداڵن، باوكم مامۆستای قوتابخانەیە و دایكیشم پەرستار، هەموو شانازی ژیانم لەوە را دەستی پێكرد كە لە بنەماڵەیەكی خاوەن فەرهەنگ و سەواد و زانا دا لە دایكبووم، ماوەی چەند ساڵە لە هەولێر دەژیم و بەدەر لە كاری نووسین خاوەنی چێشتخانەیەكم و شان بە شانی پیاو خەریكی كاسبیم و 21 ساڵە ژیانی هاوسەرگیریم كردووە و پڕە لە هەرچی جوانییەكانی ئازادییە، لە ناو قەفەسی زێڕینی ژیانی هاوبەش داین قەفەسێك كە دەرگاكەی ئاواڵەیە، بەڵام هیچمان حەزمان لە فڕین و رۆیشتن."
تروسكە، لە بارەی هاتنە نێو دونیای نووسین گووتی" من شیعرم زور درەنگ ناسی رێك لە كاتێكدا كە نەمتوانی هەستەكانم دەرببڕم رێك كاتێك كە لە كولتوری ئێمەدا كچ دەبوا بێدەنگ بێت رێك لە كاتی هەست پێكردنی خوشەویستیدا، من شیعرم كرد بە هاوار و فریاد بۆ هەموو ئەو وشانەی شارد بوومنەوە."
خانمە شاعیر تروسكە مەهابادی، ئەوەشی خستەڕوو" گەر تەواوی شتی دونیا هەڵگری یاسا و كات و سات بێت شیعر وا نیە شیعر شۆڕشێكە لە ناو خەیاڵ، بەڵام بە پێناسەی زمانەوە شیعر دەستكرد نییە و نەكات دەناسی و نە یاسا، من مرۆڤ وەك بوركانێك دەبینم كە جار جار پریشكە و گڕكانی خۆی هەڵ نەڕێژی دەتەقێتەوە."
دەربارەی ئەو كەسانەی لە دوای ساڵانی دووهەزار وە هاتونەتە مەیدانی ئەدەب و دەستیان بردووە بۆ نووسینی شیعر، تروسكە لەو بارەوە دەشڵێت" هیوادارم ئەو جوابەی دەیدەمەوە كەس دڵی لێم زوویر نەبێت، بەڵام لە لای من ئەوانەی ئێمە دەینووسین و نەوەی نوێ دوای ئێمەش دەینووسن، لە چاو شیعری شاعیرانی پێشوو ‌ترمان بەرە و لێژایی رۆشتووە و لە لوتكە دوورتر بوینەوە، شیعر زۆر پیرۆزە بۆ وێنە یەك نیو مصراع شیعری م. هێمن، ئارەزوومە هەرچی ئینسانە بە ئازادی بژی، یان م. هەژار، لای هەڵوی بەرزەفڕی بەرزە مژی چۆن بژی شەرتە نەوەك چەندە بژی كە واتا ئێمە ئەو قوناغانەمان جارێ تێنەپەڕاندووە."
تروسكە تووت ئاغا جی، راشی گەیاند" من رەگەز ناناسم چۆن هیچ كات لە حاڵەتێكدا نەبووم بزانم چۆن چۆنی جیاوازیەكەی هەست پێبكەم، لە بنەماڵە‌یەك ژیاوم كە ئەو شتانەی براكەم توانیوویەتی بینووسێت و بیڵێ و بیەوێت، ئێمەش توانیوومانە و گووتوومانە و نووسیومانە، بەڵام دیسانیش بە پێی زۆر جیاوازی دەروونی و رووحی و هەستی نێوان ژن و پیاو، جار جار دەنگی وشەكان دەگۆڕدرێن و تامی شیعر جیاواز دەكات، بۆ نموونە پیاو بۆ ناسكی و جوانی ژن شیعر دەنووسێت و منی ژن، بەهێز و باهو و شان و شەوكەتی پیاو هەڵ دەڵێم كەواتا ئەدبیاتەكە خۆی جیاوازی دادەنێت."
خانمە تروسكە، وەك ئافرەتێكی بوێر بە راشكاوی باسی ماچ و چاوی یار و كێشەی كپتی ئافرەتانەوە دەكات و دەشڵێت" ئێستا كێشەی كپت لاواز بووە و زۆر زۆر گۆڕاوە و جێگای خۆشحاڵییە كە منی ئافرەت زۆر بە راشكاوی هەم باسی خۆشەویستی و ماچ و چاوی یار دەكەم و هەم زۆر بە شانازی خوار دەبمەوە و تۆزێ پۆستاڵی پێشمەرگەیەكی نیشتمان ماچ دەكەم، كەواتە چ جیاوازی رەگەزی هەست پێناكەم بۆیەش زۆر گەشبین ترم هونەر ببێتە هەوێنی یەك گرتنی ژن و پیاو."
ترووسكەی مەهابادی، وەك هەر مرۆڤێكی تری ئەو سەرزەمینە دڵی شكاوە و بەدەر نەبووە لە دابڕان لە خۆشەویستی، ئەو لە كۆتا قسەكانیدا لە چەند دێرێكدا باسی خۆشەویتی دەكات و ئاماژەی بەوەكرد"خۆشەویستیم كردووە و جیاش بوومەتەوە و دیسان خوشەویستیم كردۆتەوە و پێی گەیشتومەوە تا دواین رۆژی ژیانیشی هەر بە عاشقی دەمێنمەوە، بەڵام لە زمانی شیعر و هەستی كەم نابێتەوە، چوون ئەوینێكی زۆر بەرز و گەورەتر هەموو وجودی گەماڕۆ داوە كە ئەویش خاك و وڵات و نیشتمانە و تا من مابم نەپێی دەگەم و نەلێی دادەبڕێم.

زۆرترین بینراو