توانیومە زیاتر لە 20 ئافرەت بكەمە خاوەن كار

توانیومە زیاتر لە 20 ئافرەت بكەمە خاوەن كار

محەمەد ئامۆكەیی= هەورامان: بەدرێژایی مێژوو ئافرەتی كورد شان بەشانی پیاو كاری كردووە، چەند ساڵێك دەبێت ئافرەت گەلێك هەن بونەتە خاوەن كاری تایبەت بەخۆیان، روناك فەرەج، نموونەی یەكێك لەو ئافرەتانەیە كە لە ناحیەی بیارەی هەورامان كەبابخانەی داناوە و لەگەڵ خۆشی چەند كەسی تری كردۆتە خاوەن كار، لە دیمانەیەكی زاری كرمانجی، روناك لاپەرەی ژیانی خۆی هەڵدەداتەوە هانی ئافرەتانیش دەدات زیاتر پشت بەخۆیان ببسەتن و دەڵێت"لە دایكبووی هەورامان ناحیەی بیارەم و تەمەنم 50 ساڵە پێشمەرگەی دێرینم و بەر لە 36ساڵ ژیانی هاوسەریم پێكهێناوە لەگەڵ پیاوێكی رۆشنبیر، لە شاخەكانی هەورامان قەرداغ و دەشتی شارەزورو پێشمەرگەبووم لەگەڵ هاوسەرم لەساڵی 1988 چوومەتە دیوی ئێران تا ساڵی 1991 دوای ڕزگاركردنی كوردستان گەڕاومەتەوە كوردستان, ژنێكی چالاكبووم لە بواری ژنان و گۆڕینی بیری سەقەتی گۆمەڵگەو ژنێكی وڵات پارێز و ژینگە پارێز و سروشت دۆست و مرۆڤ دۆستم و ئامانجم ئاوەدانی كوردستان بووە."
گووتیشی" دوای گەڕانەوم لە سوید بۆ كوردستان ساڵی 2010 لە گوندی خەرپانی‌ نیشتەجێبووین دوو پڕۆژەی بەرهەمهێنەرمان دروستكردووە و یەكەم پڕۆژەی گاوداری بوو بۆمانگای شیر و دابەستە دواتر كەبابخانەیێكم داناو بوومە یەكەم ژنی كەبابچی شۆڕشێكی گەورەی ژنانە لە 2012 دەستبەكاربووم كەبابخانەكەم كردە رێستۆرانت و لەبەر ئەوەی ناوچەكەمان شوێنێكی گەشتیاری و بەناوبانگە و لە هەموو شوێنەكان خەڵك سەردانم دەكەن، لە وڵاتە ئەوروپیەكانەوە وەفدیان هاتون ئەرشیفێكی دەوڵەمەندی وێنەو ڤیدیۆم هەیە."
ئەوەشی گووت" دۆخی دارایی خەڵك لەوپەڕی خراپی دایە توانیوومە لەو دۆخە هەلی كار بۆ چەندین گەنح بڕەخسێنم و جگە لەمەش ماڵ و منداڵم بەخێو دەكەم و چەندین خێزان سوودیان لە كارەكەم بینیوە، گلەیی زۆرم لەحكوومەتی هەرێم هەیە لەبەر ئەوەی حكوومەتی كوردی خەم ساردە لە ئاست پڕۆژەكانم تاكوو ئێستا پارچەیەك زەویان نەداومەتێ لەبەر ئەوەی زۆربەی ژیانم لە پێشمەرگایەتی بردۆتە سەر."
روناك ئاماژەی بەوەشكرد كە خاوەنی چەندین دیاری رێزلێنانە و زیاتر گووتی" چەندین جار دیاری رێزلێنام پێ بەخشراوە ساڵی 2017 لە كۆی دووسەد ژنی خاوەن پڕۆژە لە پەرلەمانی عێراق، پڕۆژەكەی من بووە یەكەمی كوردستان و شەشەمی عێراق، ئەوەش وایكرد خەڵات بكرێم لە لایەن جێگری پەرلەمانی عێراق، دواتر چەندین خەڵاتم وەرگرتوە و دەیەها چاوپێكەوتنی تەلەفزیۆن و رۆژنامە و گۆڤارەكانم هەیە."
روناك هەورامی، ئەوەشی خستەڕوو خاوەن دوومنداڵم لە ساڵی 2015 هاوسەرم كۆچی دوای كردووە و تا ئێستا بێ پشت و پەنا كار دەكەم، ماڵ و منداڵم بەخێو دەكەم ئێستاش بەشێكی ترم داناوە لە بیارە بۆ كۆمەڵێ خۆشەویستی خۆم زوو زوو سەردانیان دەكەم، بەڵام ئەمساڵ كۆرۆنا پشتی شكاندوین بازاڕمان لاواز بووە و میوانە دوورەكان ناتوان بێن سەردانمان بكەن, گۆشتەكانمان خۆماڵین خواردنەكانمان فرێشە دۆی خۆماڵی هەیە كارمەندەكانمان زۆرینەیان ژنە و رۆژانی هەینی و پشوەكان بە 20 كارمەند فریا ناكەوین ئەبێت بۆ چەند كاتژمێرێك نۆڕە بگرن، پەیامێكم بۆ ئافرەتانیش هەیە و دەمەوێت ئەوانیش متمانەیان بەخۆبێت هەوڵ بدەن خۆیان ببنە خاوەن كاری خۆیان چاویان لەدەستی كەس نەبێت“.

زۆرترین بینراو