تیروپشكی كۆپا ئەمریكای 2020 راكێشرا

تیروپشكی كۆپا ئەمریكای 2020 راكێشرا

زاری كرمانجی- ئاژانسە هەواڵییە وەرزشییەكان: لە شاری كارتاخینا لە وڵاتی كۆڵۆمبیا تیروپشكی كۆپا ئەمریكای 2020 راكێشرا، كە بڕیارە لە هاوینی داهاتوو ساڵی داهاتوو لە هەردوو وڵاتی كۆڵۆمبیا و ئەرجەنتین بەڕێوەبچێت، بەڵام ئەمجارە شێوازی یارییەكان جیاوازەو دابەش نەكران بەسەر سێ كۆمەڵەدا، بەڵكو 12 هەڵبژاردەن كە دابەشی سەر دوو كۆمەڵە كراون هەر كۆمەڵەیەك 6 هەڵبژاردە لەخۆ دەگرێت.
دوای ساڵی 1991 ئەمە یەكەم جارە كە ركابەرییەكانی كۆپا ئەمریكا بە دوو كۆمەڵە بەڕێوەدەچن، لە پاڵەوانێتی ئەمجارەشدا هەڵبژاردەی قەتەر بۆ جاری دووەم لەسەر یەك میوانی پاڵەوانێتیەكەیە و هەڵبژاردەی ئوسترالیاش هاوشانی قەتەر میوان دەبێت، كە لە كوپا ئەمریكای رابردوو ژاپۆن لە جێگەی ئوسترالیا بەشداربوو.
ئەنجامی تیروپشكەكەش بەمشێوەیە بوو، كۆمەڵەی یەكەم هەریەك لە ئەرجەنتین, ئوستڕاڵیا, بۆلیڤیا, ئۆرۆگوای, چیلی و پاراگوای لەخۆدەگرێت، لە كۆمەڵەی دووەمیش كۆڵۆمبیا, بەڕازیل, قەتەر, ڤێنزوێلا, ئیكوادۆر و پیرۆ دەبیندرێن و لە هەر كۆمەڵەكەیەك چوار هەڵبژاردە سەردەكەون بۆ قۆناغی دووەمی پاڵەوانێتییەكە.
رۆژی 12ی مانگی شەشی ساڵی 2020 یاری كردنەوەی ئەم پاڵەوانێتیە لە نێوان ئەرجەنتین و چیلی دەستپێدەكات، جیاواز لە پاڵەوانێتیەكانی رابردوو ژمارەی یارییەكانی پاڵەوانێتییەكە لە 26 یارییەوە بۆ 38 یاری زیاد دەكات.

 

بابەتى پەیوەندیدار وەرزشى

زۆرترین بینراو