تەحسین سەعدوڵڵا : زیاتر لە 10 ساڵە هیچ پرۆژەیەكی ئاو لە سۆران جێبەجێ نەكراوە

تەحسین سەعدوڵڵا : زیاتر لە 10 ساڵە هیچ پرۆژەیەكی ئاو لە سۆران جێبەجێ نەكراوە

چاوپێكەوتن– ڕائیب شێروانی: تەحسین سەعدوڵڵا، بەڕێوەبەری بەڕێوەبەرایەتی ئاوی سۆران لە چاوپێكەوتنێكدا لەگەڵ هەفتەنامەی زاری كرمانجی گوتی، هۆكاری كێشەی بێ ئاوی لە سۆران بۆ نەبوونی پرۆژە دەگەڕێتەوە، كە كۆتا پرۆژە كە لە سۆران ئەنجام درابێت لە ساڵی 2009 بووە، رۆژانە نزیكەی ملیۆنێك و 300 هەزار لیتر ئاو بە تانكەر بەسەر خەڵكی شاری سۆراندا دابەش دەكەین، گەڕەك هەیە بە 72 كاتژمێر یەك كاتژمێر ئاوی بۆ دەچێت. گوتیشی، زیاتر لە 16 هەزار پێوەری ئاو بۆ سۆران بەستراوە، زیاتر لە 9 هەزار پێوەری دیكەش ماون و دەبێت ببەستین، بە سێ قۆناغ ئاگادار كردنەوە دراوەتە ماڵان، تا 1-7 دەرفەت دراوەتە هاووڵاتیان، ئەگەر تا ئەو ماوەیە هەر هاووڵاتیەك پێوەر نەبەستێت سزا دەدرێت، بۆ ماوەی سێ مانگ، بۆ هەر مانگێك بڕی 100 هەزار دیناری لێ وەردەگیرێت، لە مانگی 4 دەبێتە 200 هەزار دینار.
بەڕێوەبەری بەڕێوەبەرایەتی ئاوی سۆران، دەڵێ:" هۆكاری كێشەی بێ ئاوی لە سۆران بۆ نەبوونی پرۆژە دەگەڕێتەوە، كە كۆتا پرۆژە كە لە سۆران ئەنجام درابێت لە ساڵی 2009 بووە، مەبەست لە دروستكردنی پرۆژە، پرۆژەی پاڵاوتن و بەرهەمهێنانی ئاوە، نەك شەبەكی ئاو، پرۆژەی شەبەكەی ئاو كراوە، لە ساڵی 2009 تا ئێستا شاری سۆران زۆر گەورە بووە، ئێستاش رێژەی دانیشتووان زۆر بووە و رۆژ بۆ رۆژیش زیاتر دەبێت، دنیایەك پرۆژە و پلانمان داوا كردوونە، ئەوە چەندین ساڵە دەڵێین ئەو كێشەكانی ئێمەنە، ئەوەش چارەسەرەكانی ئێمەن بۆ نەمانی كێشەی ئاو لە سۆران و دەوروبەری، بەڵام تا ئێستا بودجەیەكی تایبەت بۆ سۆران نەهاتووە، لە ساڵی 2017 فەرمانگەی ئێمە بۆتە بەڕێوەبەرایەتی تا ئێستا 300 تا 400 ملیۆن دینار بۆ ئێمە خەرج كراوە، كە بتوانین كێشەكانی خۆمان پێ چارەسەر بكەین، ئەو بڕە پارەیە هیچ نیە بەرامبەر بە كێشەكانی ئێمە، دواین كەشف كە بەڕێوەبەرایەتی ئاو و ئاوەڕۆ بۆ كێشەكانی ئێمە كراون بە كەشف و دەرخستە بەس بۆ ئەوەی كە بتوانین كێشەكانی خۆمان بە شێوەیەكی خێرا چارە بكەین پێویستمان بە 24 ملیۆن دۆلار هەیە بۆ سۆران، پلانێكی دیكەشمان هەیە كە پلانێكی درێژخایەنە بۆ چارەكردنی كێشەی ئاو لە سۆران و دەوروبەری، ئەو پارەی كە داوامان كردووە ئەگەر بەشێوەی قۆناغ بدرێتە ئێمە بۆ ئەوەی پرۆژەكانی خۆمان پێ نۆژەن بكەینەوە و هەندێك كێشەی كە زۆر گەورەنە چارە بكەین، دەتوانین چاوەڕوان بین تا پلانە درێژخایەنە جێبەجێ دەبێت.
تەحسین سەعدوڵڵا، دەشڵێ:" رۆژانە نزیكەی ملیۆنێك و 300 هەزار لیتر ئاو بە تانكەر بەسەر خەڵكی شاری سۆراندا دابەش دەكەین، گەڕەك هەیە بە 72 كاتژمێر یەك كاتژمێر ئاوی بۆ دەچێت، وەكو دیانای كۆن، ئازادی، شەهیدانی ئازادی و دێلزیان، بەهۆی نەبوونی ئاو ئەوانە رەوشیان زۆر خراپە، لەناو سەنتەری قەزای سۆرانیش لە ماوەی 48 كاتژمێر تەنیا دەتوانین كاتژمێرێك و چارێكێك ئاو بدەینە خەڵكی خۆمان، ئەوەش بەشی خەڵك ناكات.
تەحسین سەعدوڵڵا، بەڕێوەبەری بەڕێوەبەرایەتی ئاوی سۆران ئاماژەی بۆ ئەوەش كرد:" یەكێك لە كێشە هەرە گەورەكانی ئێمە دیاردەیی زێدەڕۆییە بۆ سەر ئاو، زێدەڕۆی بە خانوو دروست كردن دەكرێت، شارەوانی سۆران و لایەنەكانی دیكە نەیان توانیوە شارەكە رێكبخەن لەرووی دروستكردنی خانوو، بۆ نموونە كاتێك كە گەڕەكێكی نوێ دروست دەبێت، دەبێت سنووری ئەو گەڕەكە دیار بێت، بۆ ئەوەی بتوانین هەموو پرۆژەیەكی خزمەتگوزاری بۆ دابین بكەین، گەڕەك هەبووە پرۆژەی ئاوی پێگەیشتووە، پاش سێ ساڵ زیاتر لە 300 خانوو بەشێوەی زێدەڕۆیی دروستكراون، نموونە زۆرن وەكو گەڕەكی جوندیان، وەستا ڕەجەب، بەختیاری، ئازادی و كانی، ئەو خانووانە دەبێتە هۆی تێكدانی شەبەكەی ئاو، جۆرێكی دیكەی زێدەڕۆیی ئەوەیە كە ئەوانەی لەناو ماڵەكانیان بەبێ ئاگاداری لایەنە پەیوەندیدارەكان ئاو زیادە ڕادەكێشن، ئەوەش كاریگەری خۆی هەبووە، بەردەوام ئێمە داوا دەكەین كە لایەنە پەیوەندیدارەكان رێگری بكەن، لە رێگەی دادگاوە ماوەیەكی زۆری دەوێت تا رێگری لەو دیاردەیە بگیرێت، داوامان لە قایمقام كردووە وەكو شارەوانی مەفرەزە دابنرێت، لەو دوو هەفتەیەدا ئەو پێشنیارە ئەنجامی دەبێت.
بەڕێوەبەری بەڕێوەبەرایەتی ئاوی سۆران ئاشكراشی كرد:" زیاتر لە 16 هەزار پێوەری ئاو بۆ سۆران بەستراوە، زیاتر لە 9 هەزار پێوەری دیكە ماون و دەبێت ببەستین، ئەو پرۆسەیە ماوەیەكی زۆرە دەستمان پێ كردووە، بە سێ قۆناغ ئاگادار كردنەوە دراوەتە ماڵان، بە نووسراوێكی بچووك خەڵك ئاگادار كراوەتەوە، ماڵ بە ماڵ گەڕاوین و ئەو نووسراوەمان داوەتێ كە سەردانی ئێمە بكەن و پێوەری ئاو ببەستن، تا 1-7 دەرفەت دراوەتە هاووڵاتیان، ئەگەر تا ئەو ماوەیە هەر هاووڵاتیەك پێوەر نەبەستێت، سزا دەدرێت، بۆ ماوەی سێ مانگ، بۆ هەر مانگێك بڕی 100 هەزار دیناری لێ وەردەگیرێت، لە مانگی 4 دەبێتە 200 هەزار دینار، ئەو ئاگاداركردنەوە چەندین مانگە دراوەتە خەڵك و ئاگادار كراونەتەوە، بۆیە دەبێت ئاگاداری ئەو ماوەیە بن.
تەحسین سەعدوڵڵا، بەڕێوەبەری بەڕێوەبەرایەتی ئاوی سۆران روونیشیكردەوە:" لە سنووری سیدەكان، خەلیفان و گوندەكان كێشەی ئاومان هەیە، كێشەش نەبوونی بڕە پارەیەكی پێویستە بۆ بەڕێوەبەرایەتی ئاوی سۆران، سنووری ئێمە فراوانە و گەورەترین قەزایە لەسەر ئاستی پارێزگای هەولێر، لە سیدەكان بگرە تا دەگەیە خەلیفان، نزیكەی 240 گوند لە خۆ دەگرێت، زۆربەی گوندەكانیش پرۆژەكانیان كۆنە، هەر بۆیە دەبێت مامەڵەیەكی تایبەت لەگەڵ سۆران بكرێت، بەردەوام داوا دەكەین و دەرخستەمان بەرزكردۆتەوە، بەڵام تا ئێستا وەڵام نەبووە".

 

زۆرترین بینراو