تەزرە بۆتانی: گەنجی ئێستا مافی خۆیەتی نەخوێنێتەوە

تەزرە بۆتانی: گەنجی ئێستا مافی خۆیەتی نەخوێنێتەوە

محەمەد ئامۆكەیی- زاری كرمانجی: لە دیدارێكی تایبەتی زاری كرمانجی، خانمە نوسەر تەزرە بۆتانی، لاپەڕی ژیانی خۆی هەڵدەداتەوە و باس لە رەوشی خوێندنەوە و گلەی زۆریی لە نوسەرانی كورد هەیە و لە دەستپێكی قسەكانی دەڵێت" من تەزرە نووسەرێكی ئازاد، لەدایكبووی گەڕەكی بەستە پیازەی هەولێرم، لە تەمەنی پازدە ساڵی هاتمە ناو كاری راگەیاندن، لە رێزی ڕێكخراوە حزبیەكان و یەكێتی قوتابیان كارمكردووە، دواتر هاتمە ناو كاری راگەیاندن و لە چەند گۆڤار و رۆژنامەیەك ئەرك و لێپرسراویەتیم خستۆتە سەرشانم، هۆكاری سەرەكیم لە كاركردن شان بەشانی خوێندن پەیداكردنی بژێوی ژیانم بووە، نووسین تاكە سەرمایەی باپیرانم بووە بۆم ماوەتەوە، باپیرم رۆژنامەنووس بووە كاتی خۆی لە ڕۆژنامەی ئەهالی حزبی شیوعی نووسیویەتی، خوێندنەوە دەتوانێ روئیا و ژیانت بگۆڕێ، دەتوانێ پارەدارت بكا"،
تەزرە لەبارەی بێ بایەخی خوێندنەوە لەلایەن تاكەكانی كۆمەڵگە، بە تایبەت چینی گەنجان دەڵێ‌" گەنجی ئێستا هەقی خۆیەتی نەخوێنێ و نەخوێنێتەوە، كاتێ لە كۆلیژ بووم لەبەرامبەر هەر راپۆرتیكی رۆژنامەوانی، نزیكەی سی تا شەست هەزارم وەردەگرت، لەسایەی خوێندن بووم بە مامۆستا، بەڵام ئێستا نە دامەزراندن ماوە و نە پارە وەك جاران لە رۆژنامەكان ماوە، جاران پارەی كەم و كاری زۆر لە سایەی خوێندن و خوێندنەوە دەست دەكەوت، ئێستا كە چینی مامناوەند هەرەس دێنێ، جگە لە چەند دەزگا و كەناڵێكی پڕۆفیشناڵ خوێندەواران بە ئاسانی كار نادۆزنەوە، جگە لەوەش ئەنتەرنێت بوارێكی بۆ خوێندنەوە نەهێشتۆتەوە".
تەزرە گلەی زۆریشی هەیە لە رۆشنبیر و قەلەم بەدەستەكانی باشووری كوردستان و دەڵێ‌" كێشەی گەورەی نەمانی حەز و خولیای خوێنەر لە دوای راپەرین، ئەوەبوو كە چیتر نووسەران بە هێزو توانای خۆیان نەهاتنە پێشەوەو كۆمەك نەكران، مەگەر ئەوانە نەبن كە قەڵەمیان بۆ خزمەتی حزب و دەسەڵات خستەگەڕ، ئیدی كتێبگەلێكی زۆر كەوتە بازاڕ، زۆری و بۆری، بێسەروبەری بە قەد فڕنەكانی سەمون كتێب كەوتە بازاڕ، نووسەران لە جیاتی چۆنیەتی نووسینی كتێبێكی پڕ بایەخ، پێشبڕكێیان كرد لەسەر چەندێتی و ژمارەی كتێب چاپكردن"،
تەرزە خاوەنی رۆمانێك و دیوانێكی شیعریە"تا ئێستا رۆمانێك و دیوانێكی شیعریم هەیە، رۆمانەكە ژیانی تایبەتی خۆمە و بەخوێن و فرمێسك نووسیومەتەوە، دیوانەكەش خەمی خەڵكە بەڵام رەنگە چەندین ساڵی تریش بە دەستنووسی بمێنێتەوە و جورئەت ناكەم بڵاویان بكەمەوە".

زۆرترین بینراو