تەمەنێكی كەم و دەستكەوتی مەزن بۆ زانكۆی سۆران

تەمەنێكی كەم و دەستكەوتی مەزن بۆ زانكۆی سۆران

زاری كرمانجی، هەولیر: رۆژی پێنجشەممە‌، ڕێكەوتی (9-1-2020) لە شاری هەولێر و لە مەراسیمێكدا بە ئامادەبوونی (د. ئارام محمد قادر) وەزیری خوێندنی باڵا و توێژینەوەی زانستی و (د. موسلح مستەفا) سەرۆكی زانكۆی سۆران و، ژمارەیەك لە وەزیرانی حكومەتی هەرێمی كوردستان و ڕاوێژكار و سەرۆكی زانكۆ حكومی و تایبەتییەكان و بەڕێوەبەرە گشتیەكان و، یاریدەدەرانی سەرۆكی زانكۆكان، بەدروشمی (ڕیزبەندی نیشتیمانی ... شاڕێی كرانەوە و متمانە و دڵنیایی) بۆ (جاری چوارەم)، ئەنجامی ڕیزبەندی نیشتیمانی زانكۆكانی كوردستان بۆ ساڵی (2019) ڕاگەیەنرا.
ڕیزبەندی نیشتیمانی بریتیە ڕێكخستنی پێشبڕكێ لە نێوان زانكۆكانی كوردستان لەسەر بنەمای پێوەری زانستی و ئەكادیمی، بە تایبەت ئەو پێوەر و مێتریكسە نێودەوڵەتیانەی كە كاراییان لەسەر پێگەی نێودەوڵەتی زانكۆكانی كوردستان. پێوەرەكانی ڕیزبەندی نیشتیمانی بریتین لە توێژینەوەی زانستی، ستافی ئەكادیمی، چالاكی نێودەوڵەتی، كواڵیتی، ئاستی گەیشتن بە سەرچاوە زانستییەكان، چالاكی كەلتوری و پەیوەندی زانكۆكان لەگەڵ كۆمەڵگا، تێڕوانینی قوتابیان و خوێندكاران، بەدواداچوونی دەرچووان. لە نێو پێوەرەكاندا توێژینەوەی زانستی كاریگەری بەرچاوی هەبووە لە ریزبەندییەكە و تا ئێستاش زانكۆی سۆران پشكی شێری هەبووە، بە تایبەت بڵاوكردنەوەی توێژینەوە لەو گۆڤارە زانستیانەی كە لەلایەن (كلاریڤەیت ئەنەلەتیكس) ئیندێكس كراون.
" پێوەرەكانی ڕیزبەندی نیشتیمانی بریتین لە توێژینەوەی زانستی، ستافی ئەكادیمی، چالاكی نێودەوڵەتی، كواڵیتی، ئاستی گەیشتن بە سەرچاوە زانستییەكان، چالاكی كەلتوری و پەیوەندی زانكۆكان لەگەڵ كۆمەڵگا، تێڕوانینی قوتابیان و خوێندكاران، بەدواداچوونی دەرچووان"
لە گشت خولەكانی ریزبەندیی نیشتیمانیدا، زانكۆی سۆران وەك پیشەنگی زانكۆكان دەستنیشانكراوە، لەم ساڵیشدا جارێكی تر وەك باشترین زانكۆ دەستنیشانكراو لە لوتگەی پێشەنگایەتی مایەوە. ئەمەش لە كاتێكدایە كە زانكۆی سۆران نەك هەر لە ریزبەندی نیشتیمانی بگرە لە ریزبەندیی دەزگا نێودەوڵەتییەكانی وەك ویبۆمێتریكسی ئیسپانی و یۆنی رانكی ئوسترالی لەڕووی كوالیتی خوێندن و ستافی ئەكادیمی و كارگێری وەك باشترین زانكۆكانی عێراق و كوردستان هەژمار دەكرێت.
" زانكۆی سۆران هەر لەسەرەتای دروستبوونیەوە توانیوەتی توێژینەوە لەگۆڤارە ئاستبەرزەكانی جیهان بڵاوبكاتەوە"
زانكۆی سۆران هەر لەسەرەتای دروستبوونیەوە توانیوەتی توێژینەوە لەگۆڤارە ئاستبەرزەكانی جیهان بڵاوبكاتەوە. هەموو ئەو توێژینەوانە، خاوەن ئیمپاكت فاكتەر و سایتسكۆڕی زۆر بەرزن، لەدیارترین ئەو گۆڤارانە لانسێت (ئیمپاكت59)، نایچەر(ئیمپاكت43)، پێرانۆستیك (ئیمپاكت8) و هتد. تاكو ئێستا زیاتر لە 320 توێژینەوەی خاوەن ئیمپاكت فاكتەرن و زۆرترین توێژینەوە كە بڵاوكرابێتەوە لە ساڵی پار بوو كە 97 توێژینەوەی ئاستبەرزی جیهانین و خاوەن ئیمپاكتن. خۆشبەختانە توێژینەوەكان نەك بەس تەنها لە بواری (جی ای اس) بەڵكو لە زۆربەی بوارەكانن وەك كیمیا، بایلۆجی، جیولۆجی، نانۆتەكنەلۆجی، نەوت، هتد. ئەم وێنەیەی خوارەوە، بواری توێژینەوەكانی زانكۆی سۆران پیشان دەدەن لە داتابەیسی سكۆپەسی جیهانی.
بەس تەنها لەساڵی ڕابوردوو، توێژینەوەكانی زانكۆی سۆران كە لە بوارەجیاجیاكان بڵاوكراوەتەوە، 215 ئیفاكت فاكتەری كۆكردیتەوە كە لەلایەن دەیان توێژەری زانكۆی سۆران بڵاوكرایتەوە كە ئەمە ئاستێكی پێوانەییە بۆ زانكۆیەكی نوێ بە بەراورد لەگەڵ زانكۆكانی دیكەی كوردستان كە هەم لەڕووی مێژوو كۆنترن و لەڕووی ستافیشەوە زیاترن.

زۆرترین بینراو