جووتیارانی بناری حەسەنبەگ شێوازێكی نوێ‌ بۆ ئاودێری كشتوكاڵی بەكار دەهێنن

جووتیارانی بناری حەسەنبەگ شێوازێكی نوێ‌ بۆ ئاودێری كشتوكاڵی بەكار دەهێنن

بۆ یەكەمینجارو بەشێوەیەكی گشتی جووتیارانی بناری حەسەنبەگ لە دەڤەری سۆران، بە سیستەمی دڵۆپە بەرهەمە كشتوكاڵییەكانیان ئاودێری دەكەن و پێشیان وایە ئاسانكارییەكی باشە و سەركەوتووش بووە، بۆ چارەسەری گرفتی كەم ئاوی.
ئارام عەزیز، یەكێكە لەم جوتیارانەی ساڵانە لە بناری چیایی حەسەنبەگ، كاری كشتوكاڵی دەكات بەزاری كرمانجی رایگەیاند: "بناری حەسەنبەگ شوێنێكی كوێستانەو چەندین كانیاو زەووی بە پیت و بەرەكەتی كشتوكاڵی لێیە، كەزیاتر بەرهەمی تەماتە و خەیار و كودی و بامیەو بانجانی لێ‌ بەرهەم دەهێنرێت و ساڵانە لەكاتی پێگەیشتنی ئەم بەربوومە كشتوكاڵیانە بە سەدان بار رەوانەی بازاڕەكانی شارو شارۆچكەكانی كوردستان دەكرێت، بەتایبەتیش لەم دووساڵانەدا خەڵكی بەشێوەیەكی بەرچاو روویان كردۆتە بەرهەمهێنانی كشتوكاڵی لە دەڤەرەكەدا".
گووتیشی: " ئەگەرچی بەهۆی زۆرینی كێڵانی زەویە كشتوكاڵییەكان، تا راددەیەك كێشەی كەمی ئاو بۆ ئاودێری دروست ببوو، بەڵام لەمساڵدا جوتیارانی دەڤەرەكە بۆ یەكەمینجار و بەشێوەیەكی گشتی بە سیستەمی دڵۆپە بەرهەمە كشتوكاڵییەكانیان ئاودێری دەكەن، ئەمەش لەچەندین رووەوە خزمەت بە جوتیاران دەكات، لەوانە بەكارهێنانی ئاوێكی كەم بۆ ئاودێری، كەمبوونەوەی بژارەو گژوگیا لەناو بەرهەمە كشتوكاڵییەكان، هەروەها زوو تێكنەچوونی بەرهەمەكان و گەشەكردنیان".
ئەوەش دەخاتەروو: "من خۆم زیاتر لە 30 ساڵە وەك جوتیارێك لە بناری چیایی حەسەنبەگ كاری بەرهەمهێنانی كشتوكاڵی دەكەم، یەكەمینجارە سیستەمی دڵۆپە بۆ ئاودێری بەرهەمە كشتوكاڵییەكان بەكاربهێنن، بۆیە هەست دەكەین ساڵانی رابردوو ماندووبوونی زۆرمان چێشتووە ساڵانە ئاوێكی زۆرمان بە فیڕۆداوە، وەك دیاریشە ئەم پێداویستیانەی بۆ بە سیستەمی دڵۆپەی ئاودێری بەرهەمە كشتوكاڵییەكانمان بەكار دەهێنین، نرخەكانیان تا رادەیەكی باش گونجاوەو زۆربەی پیداویستیەكانیش بۆ ساڵانی داهاتووش دووبارە بەكار دەهێنرێنەوە.
لەلای خۆیەوە حەكیم عەبدولڵا، بەڕێوەبەری كشتوكاڵی سۆران، رایگەیاند: " وەك هاندانێك بۆ جووتیارانی دەڤەرەكەمان بەتایبەتی بناری چیای حەسەنبەگ كە ساڵانە بەربوومی كشتوكاڵی زۆری لێ‌ بەرهەم دەهێنرێت، گوێمان لە سەرەنج و گرفتەكانیان گرتووە، بەتایبەتیش ئەمساڵ دڵخۆشین كە رووبەرێكی بەرفراوان زەویی كشتوكاڵی چێندراوە، هەروەها پەیڕەوكردنی سیستەمی دڵۆپە لەجیاتی ئاودێریی سونەتیی پێشوو، كە جووتیاران بە شێوەیەكی بەرچاو روویان تێی كردووە، هەم ئاوەكە بەهەدەر ناڕوات هەمیش كەمتر گژ و گیا لەناو بەرهەمە كشتوكاڵییەكان سەر هەڵدەدات و ئاسانكارییەكی باشە بۆ جوتیاران".
گووتیشی: " ئێستا هاوكارییەكانی ئێمە بۆ جووتیاران، زیاتر سەردانی كردن و هاندانیانە، هەروەها دابەشكردنی قڕكەر و لەناوبردنی دەرمانی كوللەیە بەسەر جووتیاراندا و هیوادارین لە داهاتووشدا بتوانین زیاتر هاوكاریی جووتیاران بكەین و ئاوڕیان لێبدەینەوە

زۆرترین بینراو