جگە لە قەدەغە كردنی قاچاخچییەتی رۆژی چۆڵ كردنی شنگالیش بۆ پەكەكە دیاری كرا

جگە لە قەدەغە كردنی قاچاخچییەتی رۆژی چۆڵ كردنی شنگالیش بۆ پەكەكە دیاری كرا

زاری كرمانجی: فەرماندەیەكی هێزی پێشمەرگە لە شنگال رایگەیاند" دوای هاتنی پۆلیس بۆ شنگال كاری قاچاخچێتی لە پەكەكە قەدەغە كرا، ئاگاداریش كراونەتەوە تا كۆتایی ئەم مانگە شنگال چۆڵ بكەن".
قاسم دربۆ، فەرماندەی هێزی پێشمەرگەی ئێزیدی لە شنگال بە ماڵپەری (وشە)ی راگەیاندووە" دوای جێگیركردنی شەش هەزار پۆلیسی عێراقی لە شنگال، ئێستە سنووری نێوان سووریا و عێراقیان داخستووە و رێ نادەن بەهیچ شێوەیەك پەكەكە قاچاخچێتی لە شنگال بكەن كە پێشتر شوێنی قاچاخچێتی ئەوان بوو، كەلوپەل و نەوتی رەش و مەڕوماڵاتیان بەقاچاخ لە سووریا دەهێنا بۆ عێراق".
زیاتر گووتی" لەگەڵ هاتنی ئەو هێزە، ئێستە رێگرییان لێ دەكەن و ئەمەش كاریگەریی كردووەتە سەر پەكەكە، بەجۆرێك ورەیان ڕووخاوە كە هەرجارە و پەنا بۆ شتێك دەبەن بۆ مانەوە و بەردەوام خۆپێشاندان دەكەن، بەڵام سوودی نییە و كاتی دەركردنیان هاتووە".
قاسم دربۆ زیاتر روونیكردۆتەوە" بڕیارە هێزێكی سوپای عێراق بێتە سەر چیای شنگال و شوێنی پەكەكە لە ناوچەكانی چلمێرا و بورجی سەرچیا و رێكرش بگرێتەوە، چونكە ئێستە پەكەكەی لێیە و پێش دوو رۆژ ئاگادار كراونەتەوە تا كۆتایی ئەم مانگە چۆڵی بكەن و سوپا شوێنیان دەگرێتەوە".
ئەو فەرماندە سەربازییە لە شنگاڵ گووتیشی " فەرماندەی ئۆپراسیۆنەكانی مووسڵ كە كۆبوونەوەیەكیان كردووە و بە پەكەكەیان ڕاگەیاندووە"ئەگەر بەخۆشی دەرنەچن، ئەوا بە ناخۆشی لە شنگال دەرتان دەكەین، بۆیە پەكەكە جگە لە دەرچوون چارەی تریان نەماوە".
بڕیارە دوای دەرچوونی پەكەكە، هێزی هاوبەشی پێشمەرگە و سوپا دروست بكرێن و دەرەوەی شنگال بەهاوبەشی بپارێزن، رێ نادەن هیچ هێزێكی بیانی لە شنگال بمێنێت.

زۆرترین بینراو