حزبێكی ئیسلامی دانیشتوانانی خەلیفان نیگەران دەکات

حزبێكی ئیسلامی دانیشتوانانی خەلیفان نیگەران دەکات

زاری کرمانجی - خەلیفان: حزبێكی ئیسلامی سیاسیی كوردستان، لە شارەدێی خەلیفانی سەر بە قەزای سۆران بە مەبەستی كاری خێرخوازی هەڵساوە بە دابەش كردنی هەندێ جۆری خۆراك تەنها بەسەر ئەندامانی حزبەكەی و خەلكی تری كەمدەرامەتی لێ بێبەش كردووە، ئەمەش ناڕەزایی خەلكی خەلیفانی لێكەوتۆتەوە و بە كارێكی نادادی و نایەكسانی دەزانن.

بەهۆی تۆماركردنی حاڵەتێكی ڤایرۆسی كۆرۆنا، ماوەی پێنج رۆژە خەلیفان بە 40 هەزار دانیشتوویانیەوە، كەرەنتینە كراوە و هەموو جموجۆڵ و هاتنووچونێك قەدەغە كراوە، خەلكەكەی لە دۆخێكی دەروونی ناخۆش دەژین، ئەم كارەی ئەو حزبەی ئیسلامی هێندەی تر نیگەرانی كردوون و دەڵێن " حزبە ئیسلامیەکان هەمیشە باسی باسی یەکسانی دەکەن, ئەوەی لە خەلیفان کردیان دوور لە بەهاکانی ئیسلام بوو.

ئازاد خەلیفانی چاڵاكوانێكی شارەدێی خەلیفانە بە زاری کرمانجی گووت " دانیشتوانانی خەلیفان بە گشتی پابەندی رێنمایەكی حكومەت و وەزارەتی تەندرووستی و ناوخۆن، هێزە ئەمنیەکان رۆڵێكی باشیان هەیە لە كۆنتڕۆڵ كردنی بارودۆخەكە، بەڵام پێویستە حكومەت زیاتر ئاوڕ لە خەلیفان بداتەوە لە هەموو روێك بە تایبەت كەرتی تەندرووستی لە دابین كردنی داو و دەرمان و رەوانە كردنی پزیشكی پسپۆڕ چونكە ناتوانن بۆ چارەسەریە تەندرووستیەكان روو لە هیچ شوێنێك بكەین".
لەبارەی دابەش کردنی خۆراک و خورادەمەنی ئەو چاڵاکوانە گووتی" بەشێك لە دەزگاخێرخوازیەكان تا رادەیەك هاوكاریان بۆ خەلكی خەلیفان هێناوە و هەندێكیشیان بەڵێنییان داوە لە رۆژانی داهاتوو شتوومەك و كەل و پەلی خواردن پێشكەش بە دانیشتووانان بكەن، بەڵام ئەوەی ئێمەی خەلكی خەلیفانی نیگەران كردووە، رەوانە كردنی هەندێ خۆراكە لەلایەن كۆمەڵی ئیسلامی کە تەنها بەسەر ئەندامەكانی خۆیان دابەش کردووە, ئەمەش بە کاری حزبی و سیاسی ئەژماری دەکەین نەك كاری مرۆیی و خێرخوازی، لەم كات و ساتە هەستیارەشدا كاتی حزبایەتیی نەبوو".

ئازاد خەلیفانی، گووتیشی" پێویست بوو كۆمەڵی ئیسلامی ئەو بڕە هاوكاریەی بۆ هەموو دانیشتوان یان سەرجەم كەمدەرامەتەكان دابەش كردبا، چونكە خەلك هەیە زۆر لە ئەندامانی كۆمەڵی ئیسلامی كەمدەرامەت تر و باری ئابوورییان خراپترە، ئەگەر مەبەستییان خێرە و دەتوانرا پێشكەش بەوانیش كرابا نەك تەنها ئەندامانی خۆیان".
ئاماژەشی بەوەدا" ئەم كارەی كۆمەڵی ئیسلامی لە خەلیفان كرا، بریندار كردنی هەستی خەلكی بوو بە تایبەت كەسانی كەمدەرامەت، ئەو كارە لە خۆ دەرخستن و كاری تەسكی حزبایەتی زیاتر هیچی تر نییە و خەلكیش بە گشتی بەم كارەی ئەوان دڵخۆش نین".

سەرباز بایز گەنجێكی دانیشتووی سنووری خەلیفانە بە زاری کرمانجی گووت" لە ماوەی كەرەنتیینەكردنی گشتی خەلیفان و دەرووبەری، وەفدێكی حزبی كۆمەڵی ئیسلامی كوردستان هاتووە بۆ خەلیفان بە حساب خێر بە خەلك دەكەن، بەداخەوە لەلایەن ئەو حزبەی ئیسلامی هەر یەكێك لە ئەندامانی خۆی نەبووایە هاوكاریان نەدەكرد، ئەمەش بە كارێكی زۆر خراپ دەزانین و دڵی زۆر خەلكی هەژار و كەمەدارەتییان شكاند و کاردانەوەی نەرێنی بەدووای خۆیدا هێناوە".

زیاتر دەڵێ" لە خەلیفان ماڵی ئەوەندە هەژار دراوسێی ئەندامەكەی كۆمەڵی ئیسلامی بوو كە خێری هەموو دونیای پێدەچێت، بەڵام بە بڕیاری ئەو حزبە بڕە هاوكاریەكە نەی گرتەوە و بێبەش كران، ئەمەش كارێكی زۆر نایەكسانی و دوور لە مرۆڤایەتی بوو، لە ئێستەدا حزبایەتی ئەوە كە بەبێ جیاوازی بتوانی خزمەت بكەی، نمونەی دەزگای خێرخوازی بارزانی كە بێ گوێدان بە حزبایەتی هاوكاریەكان هەموو كەس و لایەن و هەموو شا و شارۆكەیەك دەگرێتەوە".

لای خۆشیەوە، وەیسی سەعید ئەندامی لیژنەی ئەوقاف و كار و باری ئاینی لە پەرلەمانی كوردستان بە زاری کرمانجی راگەیاند:" یەكێك لە كارە پیرۆزەكان كە هەمیشە ئاینی پیرۆزی ئیسلام هانی هەموو موسڵمانان دەدات پێوەی پابەندبن و ئەنجامی بدەن، خێركاری و كاری بەخشینە، مایەی خۆشحاڵییە لە كاتی درووست بوونی رەوشێكی نەخوازراو بار و دۆخێكی نەخوازراو بەسەر هەرێمی كوردستاندا دێت، خەلكی دەوڵەمەند و خێرومەند و خێرخواز دەستی هاوكاری و یارمەتی بۆ یەكتری درێژ دەكەن ئەمە هەنگاوێكی زۆر گرنگە و مایەی دەستخۆشی و رێزە".
روونی کردەوە, بەخشین و خێر, ئەبێتە هۆكارێك بۆ بڵاو بوونەوەی زیاتری برایەتی و خۆشەویستی لە نێوان هەموو چین و توێژەكانی كوردستان، ئەوەی لە هەمووی گرنگترە لە كاتی ئەنجامدانی هەر خێرێك یا هەر كارێكی بەخشین و چاكە، هیچ جیاوازیەك نەكات، بەتایبەت لە رەوشێكی وەك ئێستە كە جیهان گیرۆدەی دەستی كۆرۆنایە، پێویستە ئەوانەی باری ئابووریان باش نییە بەبێ جیاوازی پێداویستی و هاوكاریان پێشكەش بكرێت".

ئەو ئەندامەی پەرلەمانی کوردستان دەڵێت" لە شەرعی ئیسلامیش ناكرێت جیاوازی لە نێوان خەلكی كەمدەرامەت بكرێت، ئەوجا جیاوازی خێلەكی یا لە روانگە سیاسیەكەی، چونكە جیاوازی كردن دەبێتە هۆكارێك بۆ بڵاوبوونەوەی دووبەرەكی و درووست بوونی رق و كینە، باشتر هیچ جیاوازیەك نەكرێت ئاینی پیرۆزی ئیسلامیش بەوشێوەیە هانمان دەدات".
وەیسی سەعید , گووتیشی" گرنگە هەموو دەزگا خێرخوازیەكان لە ژێر هەر ناو و درووشمێك بێت، ئاینی یا نەتەوەی بێت یاخود بە درووشمی مرۆڤ دۆستی بێت، لە كاتی ئەنجامدانی بەخشین و كارە خێرخوازیەكانی خۆیان هیچ جیاوازیەك لە نێوان خەلك و هاووڵاتییاندا نەكات، بیر لەوە نەكەنەوە كەسانێك ئەندامی ئێمەیە و خێری پێدەكەین و كەسانێك ئەندامی ئێمە نەبێت بێبەش بكرێت، بەداخەوە ئەمە دیاردەیەكی زۆر ناشرینە دەمێكە ئێمە لە كوردستان هەستی پێدەكەین، لە كاتی جەژن و کاتەکانی تر هەبووە لەگەڕەكێك خێر بۆ ماڵێك چووە ماڵێك پشتگوێ خراوە ئەمەش بۆ سیاسەتی هەندێ حزبی ئیسلامی دەگەڕێتەوە".

زۆرترین بینراو