خولی بارزانی نەمر بۆ تۆپی پێ‌ جارێكی تر گەرایەوە نێو یاریگاكانی كوردستان

خولی بارزانی نەمر بۆ تۆپی پێ‌ جارێكی تر گەرایەوە نێو یاریگاكانی كوردستان

خولی بارزانی نەمر بۆ تۆپی پێ‌ جارێكی تر لە سەر ئاستی مەكتەبی سكرتاریەتی یەكێتی لاوانی دیموكراتی كوردستان رێكخراوە، خولەكەش بە بەشداری سەرجەم ناوەندەكانی بالای سەر بە مەكتەبی سكرتاریەت لاوان بەرێوە دەچیت، ناوەندی باڵای سۆرانیش بە هەڵبژاردەی سۆران بەشداری كردوە.
هەڵبژاردەی ناوەندی بالای سۆران لە یەكەم یاری خۆیدا لە پازدەمین خولی بارزانی نەمر لەبازنەی هەولێر لەسەر یاریگەی بنەسڵاوە هەڵبژاردەی سۆران سەر بەناوەندی باڵامان و هەڵبـژاردەی قەرەچوغ ڕووبەڕووی یەكبوونەوە تیایدا كوڕانی لەسەر لاكێشەی سەوز جەنگان و یەكەم سەركەوتنیان كردە دیاری بۆ پایتەختی شەهیدان و هەنگاوێك لە پاڵەوانەتیەكە چوونە پێش.
گێمی یەكەم لەگەڵ فیكەی داوەردا یاریزانی سۆران جڵەوی یارییەكەیان گرتە دەست و هێرش دوای هێرش گۆڵی تیپی ڕكابەریان بەسەر دەكردەوە، ئەو هێرشانەی هەڵبژاردەی سۆران بێ بەرهەم نەبوو هەرزوو لەناو ناوچەی سزا لەهێرشێكی كتوپڕدا یاریزانێكی سۆران تووشی بەرپەچدانەوە بوو، پەناڵتیێكی بەدەستهێنا، ئیدریس كاكە لێدانەكەی جێبەجێ كردو گۆڵپارێز تۆپەكەی گەڕاندەوەو لە ڕووماڵدا هێرشبەری لاوی هەڵبژاردەی سۆران ئیبراهیم بالەكی گۆڵی پێشكەوتنی هێنا،‌ وێڕای لەدەستدانی چەند هەلێكی ئاسانی گۆڵ تۆماركردن ئەنجامی گێمی یەكەم لەبەرژەوەندی سۆران بەدوماهی هات.
گێمی دووەم هەڵبژاردەی قەرەچوخ بەفۆڕمێكی جیاوازی یاریكردن هاتنە سەر شانۆ چەند جارێك نزیكبوونەوە، بەڵام سەركەوتوو نەبوون لەگۆڵی یەكسانبوونەوە، ڕاهێنەری هەردوو هەڵبژاردە چەند گۆڕانكاریێكیان ئەنجامدا بۆ گۆڕینی ئەنجامی یارییەكە، لەكاتێكدا قەرەچوخییەكان خەریكی ڕاستكردنەوەی ئەنجامی یارییەكە بوون لەهێرشێكی هەڵگەڕاوەدا هێرشبەری هەڵبژاردەی سۆران هاوگار سەعدی گۆڵی دووەمی پێشكەشی هەوادارانی پایتەختی شەهیدان كردو ئەنجامەكەی دوو بەرامبەر كرد، بەر لەتەواو بوونی یارییەكە هەڵبژاردەی قەرەچوخ توانیان تۆری سۆران بەهەژێنن و یارییەكە بە ئەنجامی دوو گۆڵ بەرامبەر بەگۆڵێك بە سەركەوتنی سۆران بەسەر قەرەچوخ بە كۆتا هات.
بەم ئەنجامەش سۆران هەنگاوێك سەركەوت بۆ پێشەوە و چاوەڕێی براوەی یاری نێوان بارزان و خەبات دەكات و هەڵبژاردەی قەرەچوخیش ماڵئاوایی لەپاڵەوانەتیەكە كرد.
سەبارە بە بەشداریكردنی ناوەندی باڵای سۆران بە هەڵبژاردەی سۆران و ئەمانج لە بەشداریكردنیان سەردار جەبار ئەندامی بەشی راگەیاندنی ناوەندی باڵای سۆرانی یەكێتی لاوانی دیموكراتی كوردستان لێدوانێكی تایبەتی بۆ زاری كرمانجی دا.
پازدەمین خولی بارزانی نەمر لەژێر سەرپەرشتی مەكتەبی سكرتاریەتی یەكێتی لاوانی دیمۆكراتی كوردستان بەڕێوەدەبرێت و یەكەم وەشانی ئەم خولە بۆ ساڵی 1991 دەگەڕێتەوە كە ئەو وەشانە لەقەزای سۆران بەڕێوەچوو، ئەم جارەیان جیاوازە لەچوارچێوەی مەكتەبی سكرتاریەتی "ی.ل.د.ك" سەرجەم ناوەندە باڵاكانی هەرێمی كوردستان كەنزیكەی بیست هەڵبژاردە دەبن پشكداری ئەم خولەن و شێوازی بەڕێوەچوونی خولەكە بازنەیی بووە كراوەتە چوار بازنە،بازنەی كەركوك و گەرمیان و بازنەی سلێمانی و ڕاپەرین و هەڵەبجە، بازنەی هەولێر و بازنەی دهۆك .
خولەكە بەشێوەی یەك دۆڕانە و یەكەمی هەر چوار بازنە دەگەنە چوارگۆشەی زێڕینی خولەكە ناسنامەی سێ بازنە ئاشكرابووە كە هەڵبژاردەكانی ئاكرێ و كەركوك و دەوروبەری سلێمانی لەخۆ دەگرێت ،تەنها نوێنەری بازنەی هەولێر ماوە دەربكەوێت كە ئێستە یارییەكانی بەردەوامی هەیە .
ئێمە وەك ناوەندی باڵای سۆران دوای ڕاوێژێكردن ستافێكی ڕاهێنەرامان دەستنیشان كردن ئەوانیش كۆمەڵێك یاریزانی دیاری سنووری قەزای سۆرانیان كۆكردەوە و هەڵبژاردەی سۆرانمان پێكهێنا، چەند یارییەكی دۆستانەمان ئەنجامدا، ئێمە تەنها بۆ بەشداریكردن نەچووینەتە نێو ڕكابەری ئەم خولە ئامانجی هەرە لەپێشنینەمان گەیشتنە بەچوارگۆشەی زێڕین ئەگەر ئەو هەوڵەمان سەركەوتنی هێنا ئەوا لەو قۆناخەشدا هەوڵی لەبەرگرتنی ناسناوەكە دەدەین و دەمانەوێت لەڕێی بەدەسهێنانی ئەنجامێكی شایستە لەم خولە خزمەتێكی بچووك پێشكەشی پایتەختی شەهیدان بكەین.

بابەتى پەیوەندیدار وەرزشى

زۆرترین بینراو