خەڵات عومەر:  ئارەزوومە لە ریزی هەڵبژاردەی عێراق یاری بكەم

خەڵات عومەر: ئارەزوومە لە ریزی هەڵبژاردەی عێراق یاری بكەم

زاری كرمانجی– دەربەندیخان: كچە یاریزانێك تیپی بالەی یانەی دەربەندیخانە هیواخوازە تیپێك لە سەر ئاستی عێراق پێك بێت و ئەویش یەكێك بێت لە ئەندامە كاریگەرییەكانی ئەو تیپە.
د/ رەمەزان هەرەنی
خەڵات عومەر ساڵی 1995 لە دایكبووەو ساڵی 2014 دەستی بەیارییكردن كردووە تا ئێستا خاوەن چەندین دەسكەوتی وەرزشییە لە یاری بالە.
خەڵات عومەر بە زاری كرمانجی راگەیاندو گووتی" دەستپێكی یاریكردنم لە تۆپی بالە ساڵی 2014 بوو، بۆیە یاری بالەم هەڵبژارد چونكە بەلامەوە یاریێكی تەواو چێژبەخشەو پێم وابوو تاكە یارییە گونجاوە لەگەڵ حەزو تواناكانم, لەگەڵ ئەوەی لە منداڵییەوە بەردەوام لەقوتابخانەش سەرقاڵی یاریكردن بووم, بەڵام ئەوكات بەهۆی نەبوونی كات و تیپێكی كچان نەمتوانی دەست بە یاریكردن بكەم".
گووتیشی" لەماوەی یاریكردنم هەرگیز هەستم بەماندووێتی دەروونی نەكردووە هەرچەندە لەرووی جەستەییەوە گرفتی پێكانم بۆ هاتۆتە پێش و ماندوێتی زۆرم دیوە, بەڵام هەرگیز ئەوە نەبۆتە رێگرو بەپێچەوانەوە زیاتر وای لێكردووم بەردەوام بم لەیاریكردن, چونكە هەرچەندە یاریێكی قورسیش بێت و پێویستی بە ساڵانێكی زۆربێ بۆ ئەزموون وەرگرتن هێشتا لەچێژو خۆشی یارییەكە كەم نابێتەوە".
دواتر گووتی" ئاستی یاری بالە لەكوردستان تارادەیەكی بەرز ئەتوانم پێوانە بكەم لەچاو بارودۆخی سەختی یاریزانان و ئەو هەل و مەرجە ناهەموارانەی پێیدا تێدەپەڕن, هێشتاش یاری بالە لەكوردستان بەرەو پێشچونێكی زۆرباشی بەخۆیەوە بینیوە بەتایبەت لەم ساڵانەی دوایی".
ئەوەشی خستەڕوو" پێم باشە هەر یانەیەك دوو كۆمەڵە یاریزانی هەبێت, لاوان و پێگەیشتوان, بۆئەوەی لەكاتی نەبوونی یاریزانی سەرەكی بتوانرێت ئەو بۆشاییە بەیاریزانی لاو پڕبكرێتەوەو بەردەوامی بدرێت بەتیپی بەردەست, لەگەڵ ئەوەش هاوكاری خێزانەكان و پاڵپشتیان بكرێ كە هۆكارێكی گرنگە بۆ بەرەوپێشچوونی یاریزان بەتایبەت ئەگەر ئافرەت بێت، بەرنامەم تەنیا هەوڵدانە بەرەو ئاستێكی باشترو بەرزتر تا بتوانم ئەو تەمەنە وەرزشیەی لە توانامدایە پێشكەش بە تیپ و شارەكەمی بكەم، هیوام ئەوەیە تیپی هەڵبژاردەی عێراق پێك بهێنرێت و منیش یەكێك بم لە یاریزانانی ئەو هەڵبژاردەیە".
خەڵات دەیەوێ‌ ئەوە بەو كچانە بڵێت كە هاتوونەتە نێو بواری وەرزش ئەوان پێشەنگ و بەرهەمهێنەری بوارێكی تەواو جیاوازی ناو كۆمەڵگەن، وەرزش بە گشتی و تۆپی بالە بە تایبەتی واتە بوونی كچێكی وەرزشكار، پێی وایە ئەو كچانەی حەزێكی زۆریان بۆ بواری وەرزش هەیە و ناتوانن بچنە ناو دنیای وەرزش, خێزان و ترس لەقسەی كۆمەڵگەو رێگری بەردەوامی پیاوان وەك هاوسەرو براو باوك و دەوروبەر كاریگەرییان هەیە, جیا لەمەش وەرزش لە كوردستان دەسكەوت و پاداشتێكی وا بەرچاو دڵخۆشكەری نیە كچان بتوانن بچنە ناویەوەو ئەوانەی لە وەرزشیشدان بتوانن بەردەوامی پێبدەن.
لە كۆتاییدا روونیكردەوەو گووتی" پێم وایە لایەن و بەرپرسانی وەرزش چاوێكی باشتر بەبواری وەرزشی كوردستاندا بخشێننەوەو توانای خزمەتكردنی زیاتری خۆیان بخەنەگەڕ بۆ یاریزانان و وەزشوانان, بۆ ساڵی ئایندەو پاڵەوانیەتی داهاتوو چاومان لەنازناو پلەی بەرزترە، هەروەها ساڵی رابردووش لە خولی ژیانەوە بەشداربووین و پلەی سێیەممان دەستەبەركرد، بۆ پاڵەوانیەتی كوردستان و عێراقیش كە چەند مانگی پێشوو ئەنجامدرا سەرەڕای بەشداری كردنمان بۆ جاری یەكەم پلەی چوارەممان بە دەستهێناو خەڵاتی تیپی نمونەییمان پێ بەخشرا لە خولی عێراق".

 

زۆرترین بینراو