دانیشتوانی گوندەكانی دەشتی هەریر بێ كارەبا دەمێنەوە

دانیشتوانی گوندەكانی دەشتی هەریر بێ كارەبا دەمێنەوە

محەمەد ئامۆكەیی - هەریر: ماوەی چەند رۆژێكە لە زۆربەی گوندەكانی دەشتی هەریر كارەبای نیشتمانی كەمبوەتەوە ئەوەش بۆتە جێگای نیگەرانی لای دانیشتوانی ئەو دڤەرە، زاری كرمانجی بەدواداچونی لەسەر خراپی و كەمی كارەبای نیشتمانی كردووە و تێیدا گازندەی خەڵكی گەیاندە بەرپرسی فەرمانگەی كارەبای هەریر و ئەویش گلەیی لە هاووڵاتیان هەیەو كە وەك پێویست دەست بەكاتژمێرەكانی كارەباوە ناگرن.
رێبەر حسێن، دانیشتوی گوندێكی دەشتی هەریرە گووتی" حكومەت وەك پێویست حسابی بۆ گوندەكان نەكردووە لە ڕووی خزمەتگوزارییە سەرەتاییەكان لەنێویشیاندا كارەبا بەداخەوە لەگەڵ هاتنی سەرماو سۆڵە كارەبای نیشتیمانی كاتژمێرەكانی كەم بونەتەوە بگرە لە 24كاتژمێر تەنیا 3 كاتژمێر كارەبامان هەیە ئەو چەند كاتژمێرەش لەسەر یەك نیەو نیو كاتژمێر هەیەو نیوەكەی تر دەبڕێت، بۆیە داوا دەكەین پێدانی كاتژمێرەكان زیاد بكرێن لەبەر ئەوەی ئێستا خەریكە دیاردەی كۆچكردنی خەڵك لە گوندەكانەوە بۆشارەكان رووی لە بەرزبونەوە دەكات و هۆكارەكەشی بۆ كەمی خزمەت گوزارییەكان دەگەڕێتەوە.
گەنجێكی تریش گووتی" گوندەكان وەك شار نین مۆلیدەی ئەهلییان هەبێت زۆربەی گوندەكان مۆلیدەیان نیەو ئەتوانم بڵێم ژیانی گوند نشینان كۆلە مەرگییە چونكە خراپی رێگاو بان و كەمی كارەبا ئێمەی بێ تاقەت كردووە."
ئەوەشی گووت" چەندین جار پەیوندیمان بە لایەنی پەیوەندی دارەوە كردووە گلەیی خراپی كارەبامان پێ ڕاگەیاندون بەڵام ئەوان بیانووی ئەوەیان هەیە كە لۆدێكی زۆر لەسەر كارەبا هەیە من دەپرسم زۆربەی گوند نشینەكان خەڵكی دەست كورتن و توانای چونە شاریان نیە ئەبێت ئەو ماڵە هەژارانە چ ئامێرێكی گەورەیان هەبێت بۆ ئەوەی كارەبای زیادە سەرف بكات ،بۆیە ئەمە جگە لە بیانوو هیچی ترنییە.
سەردار مەلا غەفار، بەرپرسی فەرمانگەی كارەبای هەریر، بەزاری كرمانجی راگەیاند" كێشەی كەمی و پێدانی كاتژمێرەكانی كارەبای نیشتمانی لە زۆربەی شوێنەكانی كوردستان هەیە ئەوەش دەگەڕێتەو بۆ ئەو سەرماو سۆڵەی ڕووی لە باشوری كوردستان كردووە ئەوە هۆكاری سەرەكییە كە خواست لەسەر كارەبا زۆربێت و خەڵك زۆربەی ئامێرە كارەباییەكان داگیرسێنێت و دەست بەكاتژمێرەكانی كارەباوە نەگرێت بۆیە داوا لە هاووڵاتییان دەكەین ئەوانەی سۆپای كارەباییان هەیە لە جیاتی سێ سۆپا یەك سوپا پێبكەن چونكە سۆپا كارەبایەكی زۆردەبات و لەكۆتایش هەر خەڵك بێ كارەبا دەمێنێتەوە، تاكە چارەسەر بۆ ئێستا ئەوەیە كە هاونیشتیمانییان هاوكارمان بن لە بەكار هێنانی كارەبا.

 

زۆرترین بینراو