دوای زیاتر لە 30 ساڵ تائێستا پارچە مین و تەقەمەنی لە ئیدارەی سۆران دەدۆزرێنەوە

دوای زیاتر لە 30 ساڵ تائێستا پارچە مین و تەقەمەنی لە ئیدارەی سۆران دەدۆزرێنەوە


محەمەد هەسنانی – سۆران:

دوای تێپەڕبوونی زیاتر لە 30 ساڵ لە نەمانی رژێمی بەعس لە هەرێمی كوردستان، تا ئێستا لە شارو شارۆچكەكانی ئیدارەی سۆران، لەكاتی ئەنجامدانی پڕۆژەكان بە دەیان پارچە مین و تەقەمەنی بەدەردەكەون و جێگەی مەترسین، بەڕێوەبەری گشتی كاروباری مینی هەولێریش لەو رووەوە رێنمایی بە هاووڵاتییان دەدات.
عەلی عەبدوڵڕەحمان، بەڕێوەبەری بەڕێوەبەرایەتیی گشتی كاروباری مینی هەولێر، بە زاری كرمانجی گووت: "مین و تەقەمەنی دوژمنێكی ترسناكن و پێویستە هاووڵاتییان هۆشیاربن لەكاتی بینین و دۆزینەوەی هەر پارچە تەقەمەنییەك یان مین، بەهیچ شێوەیەك لێیان نزیك نەبنەوە، بەڵكو بەزووترین كات لایەنە پەیوەندیدارەكانی سنوورەكە یان تیمەكانی مین لێی ئاگادار بكەنەوە، بۆ ئەوەی بەزووترین كات بگەنە شوێنەكە و چارەسەری پێویستی بۆ بكەن، هەروەك چەندەها مین و تەقەمەنی لەو جۆرە لەلایەن تیمەكانمان دوورخراونەتەوە و لە شوێنی سەلامەت تەقێندراونەتەوە و پووچەڵكراونەتەوە".
ئاشكراشی كرد: "تەنانەت لەم چەند رۆژەی رابردوودا دوای ئاگاداركردنەوەی تیمەكانی بەڕێوەبەرایەتی گشتیی كاروباری مین هەولێر، توانرا لە لایەن تیمی لەناوبردن EOD زیاتر لە (۸٠) پارچە تەقەمەنی جۆراو جۆر، دوایی دۆزینەوەیان لە گوندی دێلزیان سەر بە ناحیەی دیانا لە سنووری قەزای سۆران، لە كاتی هەڵكەندنی زەوی لە لایەن هاووڵاتیەك بۆ دروست كردنی پڕۆژەیەكی نیشتەجێبون، بگوازرێنەوە بۆ شوێنێكی سەلامەت بە مەبەستی لە ناوبردنیان، لە لایەكی دیكەوە لە هەمان رۆژ لە سنووری ناحیەی قەسرێ و سەنتەری قەزای چۆمان ژمارەییەكی دیكەی مین و پارچە تەقەمەنی جەنگی لە نزیك ماڵان دوایی دۆزینەوەیان لە لایەن هاووڵاتیان و ئاگاداركردنەوەی تیمەكانمان بۆ شوێنێكی سەلامەت گواسترانەوە و لەناوبران، هەروەها رۆژی دواتر لە لایەن ئاسایشی مێرگەسۆر ئاگادار كراینەوەە بە دەركەوتنی ژمارەیەكی زۆر تەقەمەنی جەنگی لە ناحیەی شێروان مەزن، دەست بەجێ تیمی لە ناوبردنی تەقەمەنی نەتەقاوە EOD، دەرچوونیان كرد بۆ شوێنی مەبەست، دوای گەیشتنیان بۆ شوێنی دیاریكراو تواندرا نزیكەی (60) پارچە تەقەمەنی جەنگی جۆراو جۆر بگوازرێتەوە بۆ شوێنێكی سەلامەت  بە مەبەستی لە ناوبردنیان".
بەڕێوەبەری بەڕێوەبەرایەتی گشتی كاروباری مینی هەولێر، ئاماژەی بەوەشكرد " بەپێی ئەوەی لەسەردەمی رژێمی بەعس لە سنووری ئیدارەی سەربەخۆی سۆران، ژمارەیەكی زۆر مۆڵگەو سەربازگەی رژێم بوونیان هەبووە، بۆیە زۆر جار لە كاتی هەڵكەندنی زەوی مین و پارچە تەقەمەنی دەدۆزرێنەوە، ئەمەش بەهۆی ئەو شەڕو ئاڵۆزییانەی كە لە رابردوودا لەو سنوورە روویانداون، بە تایبەت شەڕی هەشت ساڵەی نێوان عێراق و ئێران".