دوای چوار ساڵ چاوەروانی خولێك كرایەوە لە ماوەی سێ‌ رۆژدا كۆتایی هات

دوای چوار ساڵ چاوەروانی خولێك كرایەوە لە ماوەی سێ‌ رۆژدا كۆتایی هات

رەمەزان هەرنی – زاری كرمانجی: كچە یاریزانێكی ئاكرێ‌ كە ساڵی 1992 لەدایكبووەو دەرچووی پەیمانگەی وەرزشی ئاكرێیە, ئێستا قوتابی قوناغی دووەمی كۆلیژی وەرزشی زانكۆی جیهانەو لە ریزی هەڵبژاردەی عێراق و یانەی هەولێر یاری دەكات, خاوەن چەندین دەسكەوتی وەرزشیە لە كوردستان و عێراق.
یاریزان كاژین فەرزندە, لە دیمانەیەكدا بۆ زاری كرمانجی راگەیاندو گووتی" لە قوناغی شەشی سەرەتایی بووم كە وەك یاریزانێكی سەرەكی یاریم بۆ تیپی قوتابخانە دەكرد, لەو كاتەدا منیان هەڵبژارد بۆ هەڵبژاردەی پەروەردەی ئاكرێ‌, بەفەرمی وەرزی 2006 - 2007 یاریزانی یانەی ئاكرێ‌ بووم بۆ ریشەی هەوایی, ساڵی 2008 هەڵبژێردرام بۆ هەڵبژاردەی عێراق كە یاریەكی تاكی بوو, دواتر لەگەڵ تیپی یانەی كچانی ئاكرێ‌ بۆ تۆپی دەست داواكرام و بۆ ماوەی شەش ساڵ لەگەڵ یانەی ئاكرێ‌ و ماوەی سێ‌ ساڵ كاپتن یانەكە بووم, بەهۆی هەندێك ناكۆكی لە نێوان من و یانەكەدا بەیەكجاری دەستم لەكاركێشایەوە, تا ساڵی 2013 لە یاریكردن وەستام و دواتر بۆ ماوەی شەش ساڵ پەیوەندیم بە یانەی قەڵا كرد لە هەولێر, هەر لەو كاتەشدا لە هەڵبژاردەی عێراق داواكرام, ئێستاش یاریزانم لە رێزی هەڵبژاردەی عێراق و یانەی هەولێری كچان بەردەوامم, شەش ساڵ بۆ ئاكرێ‌ شەش ساڵیش یانەی قەڵای هەولێر یاریم كردووەو ماوەی دووساڵیشە لە رێزی یانەی هەولێر یاری دەكەم".
گووتیشی" لەم قوناغەدا جگە لە وەرزشی ئافرەتان بەگشتی وەرزش بەرەو نەمان هەنگاو دەنێت دەتوانم بڵێم وەرزشی ئافرەتان هەر نەماوە, ئەوە وەرزش و یاریكردن نیە چوار ساڵ جارێك خولێك بكرێتەوەی یان هەرنەبێت, دوای چوار ساڵ چاوەڕوانی خولێك كرایەوە لە ماوەی سێ‌ رۆژدا كۆتایی هات, وەك یاریزانێك ئایندەی وەرزشی كوردستان باش نابینم, نەك تەنیا تۆپی دەست, بەگشتی وەرزش بەرەو نەمان دەڕوات, دوور لە رەگەز هەر كارێك مرۆڤ بیكات كچ بێت یان كوڕ گەر مرۆڤ حەزی لە كارەكەی هەبێت گوێ‌ بە قسەی دەوروبەری ناگرێت و بەردەوامی بەكارەكەی دەدات, سەرەرای هەموو رێگریەكان ئێمە وەك یاریزانانی كچ هیچ بەربەستێكمان نەهێشت بۆیە توانیمان سەركەوین, باوكی كۆچكردووم یەكێك بووە لە پاڵپشت و یارمەتی دەرێكی زۆرم بوو, هەر ئەویش خاوەن دەسكەوتە وەرزشیەكانی منە, كۆمەڵگە لەسەر هەموو كارێك قسە دەكات, گرنگ ئەوەیە مرۆڤ دەست بەرداری حەزەكانی نەبێت, نابێ ئافرەت لەبەر قسەی كۆمەڵگە دەست بەراری ژیانی خوی بێت".
ئاماژەی بەوەشكرد" لایەنی ئابووری وەرزش لە كوردستان زۆر خراپە بۆ یاریزانان, 12 ساڵە وەك یاریزان یاری دەكەم بگرە لە 100 دۆلار سودمەند نەبوومە, لە جێگەی وەرگرتن لە گیرفانی خۆمان پارەمان خەرج كردووە, بۆ ئافرەت وەرزش نەبۆتە سەرچاوەی ژیان, بۆمن تا ئێستا وەرزش نەبۆتە كاری سەرەكیم, زۆربەی یاریزانان دوو كار دەكەن بۆ بەرێوەبەبردنی ژیانی خۆیان".
ئەوەشی گووت" ئەو كاتەی لە ریزی یانەی ئاكرێ‌ بووم بەردەوام پێان رادەگەیاندین كە قارەمانێتی گرنك نیە گرنگ بەشداری كردنە, ئەمەش زۆر كاریگەری لەسەر ئێمەی دەكرد كە نەبیتە قارەمان لە خولەكان, لە یانەی قەڵا بۆ ماوەی شەش ساڵ دووەمی كوردستان و عێراق بووین, بەڵام ئەمساڵ لە یانەی هەولێر بوینە قارەمانی كورستان و عێراق و بەشداری پاڵەوانی ئاسیامان كرد لە ئوردەن, سەرەرای ئەوەی ئەنجامی باشمان نەبوو, بەڵام بەشداریكرد بۆمان گرنگ بوو".

زۆرترین بینراو