دوو هاوسەری ئەڵمانی لەگەڵ سەگەكەیان گەشت بۆ هەموو جیهان ئەنجام دەدەن

دوو هاوسەری ئەڵمانی لەگەڵ سەگەكەیان گەشت بۆ هەموو جیهان ئەنجام دەدەن

دیدار- محەمەد هەسنانی
بەمەبەستی ئاشنا بوون بە كلتووری وڵاتان و گەیاندنی پەیامی خۆشەویستی، ژن و مێردێكی بە رەگەز ئەڵمانی، بە ئۆتۆمبێلی تایبەتی خۆیان دەیانەوێت گەشت بۆ وڵاتان بكەن و سنووری هەموو دەوڵەتێك ببڕن، ئەوان هەرێمی كوردستانیشیان بەسەر كردۆتەوە، نەهێنی گەشتەكەیان بۆ زاری كرمانجی ئاشكرا دەكەن.
(ئاووە ناگل) رایگەیاند " خۆم و خاتوو (میكا دومینیكا ناگل)ی هاوسەری ژیانم، لەگەڵ سەگەكەمان بەناوی (بدی تومی) وەك خێزانێكی بەختەوەر، بە دروشمی (ئێمە یەكترمان خۆش دەوێت، هەروەها تۆشمان خوش دەوێت، هیوادارین كە تۆش هەرسێكمانت خۆش بوێت) گەشتێكمان دەست پێكردووە، خەون بەوە دەبینین، سنووری هەموو وڵاتانی جیهان ببڕین و وێڕای گەیاندنی پەیامی خۆشەویستی، بە خەڵكی وڵاتان كە هاوسەرەكەم هیماكەی لەسەر ئۆتۆمبێلەكەمان نەخشاندووە، لە هەمانكاتیشدا دەمانەوێت ئاشنای كلتووری وڵاتان بین، چونكە هەر نەتەوەو كلتوورو فەرهەنگی جیاواز و تایبەت بەخۆیان هەیەو لەم رێڕەوە ژیان بەسەر دەبەن".
ئەوەش ئاشكرا دەكەن تا ئێستا توانیوویانە گەشت بۆ (9) ووڵاتی جیهان بكەن، هەروەها خۆشحاڵی خۆشیان دەربڕی كە سەردانی هەرێمی كوردستانیان كردووەو نایشارنەوە هاوشێوەی وڵاتێكی دیموكرات و پێشكەووتوە لە لە پێشوازی میوان دۆستی و بوونی كەلتوورە جیاوازەكان لەم هەرێمەو بەرچاو كەووتنی گەشتیارێكی زۆری بیانی، ئەوەش دەخەنە روو: "دوای ئەوەی سەردانی كوردستانمان كرد، ناوچەكە بەجێ دەهێڵین بەرەو وڵاتی ئێران و توركیا دەچین، لەوێشەوە بەرەو چەند وڵاتێكی دیكە بەردەوام دەبین لە گەشتەكەمان".
لەوڵامی ئەم پرسیارەی ئایا ئۆتۆمبێلەكەی ئەوان بەم مۆدیلەوە بەرگەی گەشتەكانیان دەگرێت، كە سەردانی ئەم وڵاتانە بكەن، (ئاووە ناگل) بۆ زاری كرمانجی گووتی" ئەگەرچی ئۆتۆمبێلەكەمان مۆدیل 1997 و زیاتر لە 21 ساڵە لای ئێمەیە، بەڵام خۆشبەختانە توانیومانە كارەكانی خۆمان پێی راپەڕێنین وەك دەیبینن، جگە لەوە لەناو ئەم ئۆتۆمبێلە بچووكەمان، شوێنی ئێمەو چەندین كەل و پەلی دیكەیە، لە هەمانكاتیشدا سندوقێكمان لەدواوەی ئۆتۆمبێلەكە بەستۆتەوە، كە پڕێەتی لە پێداویستی رۆژانەمان، لەگەڵ ئەوەشتی لەسەر سەقفی ئۆتۆمبێلەكەمان شوێنی خەوتن و پاڵدانەوەمان رێكخستووە، بۆیە ئێمە بیر لە مۆدیلات و ئەم شتانە ناكەینەوە، گرنگ ئەوەیە ئەم ئۆتۆمبێلە نامان هێڵێتەوەو تەنها چاودێریكردن و پاراستنی لە ئەستۆی ئێمەوەیە".
(ئاووە ناگل) ئەوەش دەخاتەروو " ئەم سەگەی لەگەڵمانە، هەرگیز دانابڕێت لێمان، هەركە سەردانی وڵاتێك یا نەتەوەیەك بكەین، بەیەك ئاماژە لە قسەو ئامۆژگارییەكانیشمان تێدەگات، پێی دەڵێن لە شوێنی خۆت بووەستە بەدیارمانەوە پاڵدەداتەوە، بەشێوەیەكی گشتیش سەگ ئاژەڵێكی بەوەفایەو ئێمەش هەوڵمانداوە هەرگیز نیگەرانی نەكەین و هەرچی پێویست بێت، بۆی دابین بكەین".
ئاماژەش بەوە دەدات: "من و هاوسەرەكەم ئەو پەڕی سۆزو خۆشەویستیمان بەرامبەر بەیەك نواندووەو لە ئازارو خۆشی و نەخۆشییەكاندا بەیەكەوەین، ئەگەرچی منداڵیشمان نییە تائێستا، بەڵام بڕیارمانداوە و بیرمان لەوە كردۆتەوە كە لە داهاتوودا منداڵمان هەبێت".
(ئاووە ناگل) گووتیشی"سەردانی هەر وڵاتێك بكەم دەمەوێت، یادگاری و چەند شتێكی سەرەنج راكێش لە دەفتەری یادگارییەكانم تۆمار بكەمەوە بینووسمەوە كە وەك یادگارییەك بمێنێتەوە، زۆرجاریش داوام لەخەڵكی وڵاتان كردووە بەزمانی خۆیان و دەستنووسیان شتێك لە دەفتەری یادگارییەكانم تۆمار بكەن و لای خۆم بمێنێتەوە".

زۆرترین بینراو