دڵڤین شەماڵ: چاوەرێمان كرد ژمارەیەكی زیاتر ببنە پەرلەمانتار

دڵڤین شەماڵ: چاوەرێمان كرد ژمارەیەكی زیاتر ببنە پەرلەمانتار

رەمەزان هەرنی – ئاكرێ: دڵڤین شەماڵ بەرپرسی ئەنجوومەنی ئاكرێی یەكێتی ئافرەتانی كوردستان لە دیمانەیەكی زاری كرمانجیدا، رۆڵ و توانای ئافرەتانی ناوچەكەیان و گیرو گرفتی ئافرەتان دەخاتەروو.
دڵڤین سەرەتای قسەكانی بە باس كردنی رێكخراوی یەكێتی ئافرەتانەوە دەست پێكرد و گووتی" ئامانج لە دامەزرانددنی یەكێتی ئافرەتانی كوردستان بۆ بەهێزكردن و پشگیری ئافرەتان بووە لە هەموو بوارێكدا بۆ ئەم مەبەستە یەكێتی ئافرەتانی كوردستان یەكەمین رێكخراوە دامەزراوە قۆناغ بە قۆناغ جیاوازی هەبووە، بەتایبەت لە شۆڕشەكانی كوردی و سەرهەڵدانی كوردستان رۆڵێكی گەورەیان هەبووە، هەروەها بە پاڵپشتی یەكێتی ئافرەتان چەندین یاسا لە پەرلەمانی كوردستان هەموار كراونەتەوە، چەندین یاسا لە بەرژەوەندی ئافرەتان دەرچوونە, راگەیاندنیش رۆڵێكی گەورەی هەبووە لە پێگەیاندنی ئافرەتان، ئێستا یەكێتی ئافرەتان كار دەكات لە پێناو هۆشیاری سیاسی، رۆشنبیری، زانستی و هوشیار كردنەوەی كۆمەڵگە, كاركردنمان بۆ پێگەیاندنی ئافرەتانە لەسەر دەستی كەسانی خاوەن هێز و بەئەزموون و خاوەن بڕوانامە لە بوارە جیاوازەكان بۆ دروستكردنی هێزو بڕوا بەخۆبوون بە ئافرەت لە ناو كۆمەڵگە".
بەرپرسی ئەنجوومەنی ئافرەتان لە ئاكرێ باسی پلانی كار كردنیان كرد و گووتی" لە دەڤەری ئاكرێ توانای ئافرەتان زۆر بەرچاوە، بەڵام ئێمە دەمانەوێت بەهێزتری بكەین، وەك یەكێتی ئافرەتانی ئەنجوومەنی ئاكرێ پلانمان هەیە زیاتر خزمەت بە ئافرەتانی دەڤەرەكە بكەین لە چەند مانگی رابردووش لەسەر داوای ئافرەتان و بەپلانی یەكێتی ئافرەتان چەندین چالاكی جۆراو جۆرمان بۆ ئافرەتان ئەنجامداوە تا بتوانن زیاتر رۆڵ ببینن".
دڵڤین، لە بارەی چارەسەر كردنی كێشەی ئافرەتان لە سنووری چالاكییان و رۆڵی رێكخراوەكەیان، گووتی " تا ئێستا لە دەڤەری ئاكرێ ئافرەتان بە سەربەستی نەیانتوانیوە بە رێگای رێكخراوی یەكێتی ئافرەتانی كوردستان، كێشەكانی خۆیان چارە سەر بكەن، نەشیانتوانیوە وەك پێویست رۆڵی خۆیان لەم رێكخراوە گەورەیە ببینن، لە كاتێكدا ئەم رێكخراوە بە درێژایی تەمەنی خزمەتی بە ئافرەتان كردووە، دەرگای بەكراوەیی هێشتووتەوە بۆیان".
لە بارەی سەربەستی ئافرەتان بۆ چارەسەر كردنی كیشەكانیان لە دەرەوەی ماڵ، ئەم بەرپرسەی رێكخراوە ئافرەتان گووتی" پێش ئێستا تا رادەیەكی زۆر ئافرەت پەراوێز خرابوون، بە هیچ شێوەیەك هەستی بە سەربەستی نەدەكرد, دوای راپەڕین و دامەزراندنی دەزگا شەرعییەكان وەك پەرلەمان و حكوومەت، هەندێك لە كۆتەكانی كۆمەڵایەتی لەناو چوون و ئافرەت توانی هەست بە سەربەستی زیاتر بكات، توانی لە دەرەوەی ماڵا كار بكات و گەر تووشی كێشەیەكیش ببێت چارەسەری بكات".
ئەو لە بارەی چارەسەر كردنی كێشەی ئافرەتان لە دەرەوەی یاسا و لە چوارچێوەی رێككەوتنی كۆمەڵایەتی گووتی" وەك یەكێتی ئافرەتانی كوردستان داواكارین كاتێ ئافرەت رووبەرووی كێشەیەك دەبێتەوە بە رێگای یاسا كێشەكانی چارەسەر بكات، لەبەر ئەوەی بە رێگای عەشایری و كۆمەڵایەتی زۆر لە مافەكانی ئافرەت لەدەست دەچن، بەڵام بە رێگای یاسایی تەواوی مافەكانی بۆ دەگەرێننەوە, ئامانجمان یەكسان كردنی كۆمەڵگایە لە نێوان پیاو و ئافرەت و ئەم یەكسانییە ببێتە هۆكاری ئەوەی پێكەوە لە یەك ئاستدا رۆڵی خۆیان بگێرن".
دڵڤین شەماڵ، بەرپرسی ئەنجوومەنی ئاكرێی یەكێتی ئافرەتان لە كۆتایی قسەكانیدا گووتی " لە دام و دەزگاكانی ئاكرێ رۆڵی ئافرەت بەرچاوە، لە زۆربەی دام و دەزگاكاندا ریژەیەكی بەرچاویان مامۆستا, پزیشك, ئەندازیار و فەرمانبەرن، بەڵام رێژەیەكی كەم بۆنەتە بەرپرسی یەكەم, لەم قۆناغەدا ئافرەت توانیویەتی چەندین دەسكەوت بەدەست بێنێت, ئەم رێژەی ئێستا لە پەرلەمانی كوردستان هەیە چاوەرێمان دەكرد زیاتر ببنە پەرلەمانتار سەڕەڕای ئەم رێژەیەش رۆڵی ئافرەت زۆر دیار و بەرچاوە".

 

زۆرترین بینراو