دیانا و سۆران دەستپێكی خولی بارزانی نەمرن

دیانا و سۆران دەستپێكی خولی بارزانی نەمرن

جەلال سەعید
خولی بارزانی نەمر بۆ تۆپی پێ‌ بۆ یەكەم جار لە دیانا و سۆران سەری هەڵداو بووە خولێكی سەرانسەری كوردستان، لە سەرجەم ناوەندە باڵاكانی یەكێتی لاوانی دیموكراتی كوردستان ساڵانە دەكرایەوە، جگە لەمەش خولی تایبەت بە مەكتەبی سكرتاریەتی یەكێتی لاوانی دیموكراتی كوردستان بۆ پاڵەوانانی خولەكانی ناوەندە باڵاكان لە شاری هەولێر رێكدەخرا.
خولی تۆپی پێ بە سەرپەرشتی مەكتەبی سكرتاریەت و چەند لاوێكی دیانا بۆ یەكەم جار لە دیانا و سۆران بە بەشداری 16 تیپی میللی رواندز و سۆران وە دیانا و چۆمان بەرێوە چوو، ئەوكات مەكتەبی سكرتاریەتی یەكێتی قوتابیان و لاوانی دیموكراتی كوردستان لە قوتابخانەی ئێستای گولی زەرد لە دیانا بوون، یاری كۆتایی خولەكەش لە نێوان تیپی لاوانی رزگاری دیانا و رواندز بە ئامادەبوونی كاك مەسرور بارزانی و زەعیم عەلی بەرێوە چوو" تیپی لاوانی رواندزیش توانی یارییەكە بە تاكە گۆڵێكی بێبەرامبەر سەركەویت و ببێتە پاڵەوانی خولەكە.
لە هەمان ساڵیشدا خولێك لە سەر ئاستی پارێزگای هەولێر بە سەرپەرشتی مەكتەبی سكرتاریەتی (ی.ل.د.ك) كرایەوە و سۆران توانی لە یاری كۆتایی لە تیپی لاوانی كەسنەزانی بباتەوەو ببێتە پاڵەوانی خولەكە.
پاشان خولی بارزانی نەمر بووە نەریەتێكی ساڵانەو سەرجەم ناوەندە باڵاكانی شارو شارۆچكەكانی كوردستان ئەو خولەیان ئەنجام دەدا.
دەتوانین بلێن یەكێتی لاوانی دیموكراتی كوردستان تاكە دەزگای پێشەنگ بوو لە دوای راپەرین گرنگی و بایەخ بە تیپە میللییەكانی كوردستان بدات و خول و پاڵەوانیەتیان بۆ ئەنجام بدات، تاكو رادەیەك ببوو بە خاوەن و ماڵی تیپەكانی میللی لە سەرانسەری كوردستان.
ئەو گرنگ و بایەخدانە تاكو ساڵەكانی دروستبوونی یاریگایەكانی بچووك بەردەوامی هەبوو، بەڵام بە دروستكردنی یاریگا بچووكەكانی(ریزگۆڵ) خولەكان ئەو بایەخ و گرنگەی نەما چونكە خولەكان گواسترانەوە نێوە ئەو یاریگە بچووكانە و تیپەكانی میللیش بەرەو نەمان چوون و بوون بە تیپی ریزگۆڵ و یاریزانەكانیش لە هێزو توانای جەستەی نەمان و ئەو كارگە باشەش نەما بۆ پێگەیاندنی یاریزانان.
لەگەڵ ئەمەشدا ململانێی ناوەندە باڵاكان لە رێژەی و ژمارەی تیپەكانی میللی بووە هۆكارێكی دیكی دواكەوتنی تۆپی پێ‌، هەر ناوەندێك بە پێی ژمارەی تیپە میللییەكانی سنووری خۆی جل و بەرگ و پێداویستی یاریزانان لە درێس و تۆپ وەر دەگرت و خەرجییەكانی خولی بارزانی نەمریشی بە هەمان پێوەری كە ژمارەی تیپەكانی بوو.ئەمەش بە تەواوی خولەكانی لە ئاست و سەنگی خۆی نەهێشت و بەرەو پشتگوێ خستن و ئەنجام نەدانی رۆیشت.
كردنەوەی خولی ئەمساڵیش كە بۆ 15 مین جارە لە سەر ئاستی ناوەندەكانی باڵا بە سەر پەرشتی مەكتەبی سكرتاریەتی لاوان ئەنجام دەدرێت، بەهیواین بە هەمان ستایل ە شێوازی ساڵی 1991 و دواتریش بەرێو بچن و جارێكی تر بە سیستەم و بەهێزی بگەرێتەوە لە ئاست گەورەی و گرنگی ناوی خولەكە بێت و بە باوەشی تیپە میللی و یاریزانانەكانی تۆپی پێش شاد بێتەوە...

زۆرترین بینراو